Accueil - sefarad.org

Unas kuantas resetas para dias de entre semana

    MENU    
SEFARAD.org
HELP us
Print
Retour

Unas kuantas resetas para dias de entre semana

Novyizikas de merendjena
(Ýngredyentes:revanadas lonjitudinalmente kortadas de merendjenas largas mundadas o no mundadas, -guevos i azeyte para la fritura- i enfin karne pikada kruda ,sal i pimyenta , i por terminar- komo garnitura- chikas rodanchas de tomat i chikos pedasos de pepirushka, sal i tomatada)

a)Deshar prealablamente, durante 30 minutos, las revanadas de merendjena mundadas o no, segun la voluntad del ke lo aparej, aryento de una sufizyente kuantidad de agua salada afin ke el legumbre pyedra su amargura. Dospues se lava byen i se desha eskurir en tropito.

b) azerlas friir (no muncho) en la azete, sovre huego no muy fuerte, despues de aver untado kada una de las revanadas kon guevo batido o byen sin guevo(a voluntad).

c) deshar repozar entre dos pligos de papel absorbante antes de enrolar kada revanada de merendjena frita sovre una chika ma sufizyente kuantidad de karne pikada lavorada prealablemente kon miga de pan mojada, sal, pimyenta i una tomat mundada i rayada .

d) Por terminar, azer un poko kozer al orno kon un poko de salsa i chikas garnituras syempre de tomat i tambyen pepirushka.

Yaprakitos de ojas de pazi (feuilles de blette):( Ojas de pazi , karne mulinada , sal, pimyenta , sumo de limon).
a)Lavar byen las ojas de “pazi” , kitar kon delikateza la kanya ke se topa en medyo, i deshar en agua buyendo asta obtener ojas fasilmente maleables antes de enrolar kada una sovre una chika ma sufizyente kuantidad de karne pikada lavorada prealablemente kon miga de pan mojada i esprimida, sal i pimyente , serrar byen las dos ekstremidades de kada paketiko ke se mete a kozer kon poko azeyte, sal i absolutamente un chiko sumo de limon . No olvidar de adornar kada uno de estos paketikos kon chikos pedasikos de tomat i pimyenton.

Almodrote de merendjena ( un kilo i medyo de merendjenas redondas “bostan”,miga de pan mojada, dos tasas de kezo seko rayado, dos o tres guevos).
Asar las merendjenas direktamente sovre la lumbre , alimpyarlas de sus kashkaras kemadas debasho la huente, deshar byen eskurir en un tropito durante dos o tres oras antes de batirlas kon una kuchara o espatula de tavla asta obtener un gomo mas o menos omojeneo... adjuntar miga de pan mojada ma byen esprimida ,dos tasas de kezo seko no muy salado rayado,un poko de azeyte(a voluntad) i dos o tres guevos. Kontrolar la salador del kezo antes de meter o de preferensya no meter sal.

Kalavasucho. ( un kilo i medyo de kalavasa, un punyadiko de” eneldo”(aneth), una kupa i medyas de kezo rayado, dos o tres guevos enteros) )
Lavar byen i rayar finamente la superfisia eksteryor del legumbre kon la lama de un kuchiyo , i despues fuertemente kon un rayo , meter en tropito ,finyir kon la mano para eliminar el maksimo de sumo , adjuntar una punyado de eneldo (aneth) miga de pan mojada byen esprimida, un poko de azeyte (a voluntad), una i medya o dos kupas de kezo seko no muy salado rayado i dos o tres guevos . (kontrolar syempre la sal del kezo)

-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-

- Copyright © sefarad.org - 1997 - 2013