Accueil - sefarad.org

Fasulya, avas, turlu, kuartikos, Piyazi i plaki

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

FASULYA  -  AVAS -  TURLU -  KUARTIKOS  -  PIYAZ I PLAKI
-------------------------------------------------------------------------------------------------
 
Si demandan a una mujer turka ke komesh
en vuestro payis dira
 
-  De todo !
- Azeme una lista!
- piyaz  -  plaki
- Fasulya, Ayshe kadin, boncjuk fasulya, avas sekas  ets...ets...
 
Komo lo entenditesh por seguro avlamas de las  "haricots"
i toda su famiya...  Mujer, kreaturas, onkles, primos todos !
 
-  Tenemos la  "ayshe kadin fasulya"  ke tiyene los granos
mas grandes ke la
 
-  "chali fasulya"  (polo beans) i
-  la  "sheker ayshe"   mas plata
 
ma todos estos, vedres komo las ojas de los arvoles,
 freskas, i ke se kozen 
 
sofriyendo la sevoya en primero
 kon azete de oliva,
tomat freska
un poko de asukar
(siempre ande ay tomat ay de meter un poko
asukar diziya mi mamita) 
sal i muy muy poko agua
kon lumbre muy basha.
 
 
La "Barbunya fasulya"  freska ke es blanka kon
manchas koroladas,  tambien la kozemos de la misma
manera.   Todas estas komidas  "zeytinyagli"
al "azete de oliva" se komen yeladas tambien i
son muy buenas para la salud.
 
Komo tenemos todos estos inviyerno komo enverano
no los merkamos en kavanoz (glass jar) o en
konserva (tin box).  Egzisten en los supermerkados
ma no se ken los merka !
 
Las avikas blankas sekas  (los granos de esta
fasulya vedre ke Turkiya produize i exporta )
puedo dizir ke es la komida nasyonal de este Payis.

Se venden en sakos de medyo kilo  1 kilo o dos.
Ay lugares ande se venden avyertos i puedesh
merkar kuanto keresh.  
 
La noche, deshamos las avikas ariyento de
buen karar de agua. La demanyana las buyemos
i echamos la agua.

Las kozemos komo lo ekspliki ariva o azemos un
piyaz  !
 
EL PIYAZ

Esto abasho de los sielos !
Kale kale i kale ke lo digamos a todas las
senyoras ke no saven kualo es esto !
 
A vedra ke yo no se de ke sielos abasharon
estas komidas ! De los de Espanya/Portugal
antes unos 500 anyos kon el sonido de una gitara,
manos chafteyonda el ritmo del flamenko
o del fado ke asuve komo un grito del korason....
 
Puedeser ke abasharon de los sielos de Gresya ?
Kon el sonido del buzuki....i el bruido de los chinis
ke se rompen al lugar del " oleeeeeeee " espanyol !

O mas mas....Del blu limpyo i maraviyozo de
los sielos del Imperio Ottomano kon las melodiyas
orientales a vezes tristes i a vezes tanto allegres
ke ensitan las personas a baylar, a saltar i a
olvidarsen todos los dertes (problemas) del
mundo !

El PIYAS i el PLAKI deven ser
akompanyados....I komo !
Estas komidas muy famozas en los Balkanes
i en Turkiya son   " mezes "
 (salatas spesiyales ke se komen yelados o kayintes)
para dar ganas de bever raki (el uzo turko) o uzo
 o al kontraryo; bever el raki o el uzo kon estos
 mezes para ke seya mas savrozo i puedeser ke
no endjideye en bevyendo sin komer !

Un arte, una eksperyensa komo dinguna otra,
un dono es el saver gizar las komidas del mupak
djudyo/turko/balkan !

Ke tienen de komun el Piyaz i el Plaki ????
Si :) Por seguro ! Todo los dos empesan kon
la letra P: Ma todos los dos se azen kon
(fasulya ) avas sekas ke se meten al mojo la
noche. [-
 
 Estas avas les plaze englenarsen de noche
en el mupak, nadan, de flakitas se azen godritas,
de blanko se azen un bej dulse i s'aprontan a la
demanyana -] El gizado es el mas kolay (fasil) ke
puede ser !
 
 Se buyen kon sal fina ke se ablandan
i se vazyan en un tripito para ke eskurga la agua.
El gizado eskapo !
 
Agora kale azer las el makiyaj !
azete de oliva, limon, pimyenta preta (poko)
Sevoya freska kortada fina, anito
(ke es el Dereotu turko)
prishil fino, ojikas de menta freska (seka si no ay)
kortadas finamente...
.A ken les plaze makiyaj de noche (!)
azer gueyvos haminados i kortarlas en 4 para meter
ensima del plato ! ESTO ERA EL PIYAS.

El PLAKI   se giza kon las avas buyidas
ke se meten al tencere/marmite  dospues ke
el  ajo,
las karotas kortados chikitiko,
muy poko de apyo/seleri  (lo vedre sovre todo)
sos tomat,
azete de oliva i
pimyenta korolada ,sal
i muy poko de patatas kortadas komo la karota
ya estan medyas kochas.
El prishil es para el makiyaj :)

No merkamos avas buyidas en konserva. No se uza aki.
No merkamos kaji nada en konserva.  Azemos muestras
komidas mozotros kon ingredientes freskos ke merkamos
en los merkados.
 
EL TURLU
 
El "turlu" en konserva dayinda egziste.
Yo me akodro ke mi mamita gizava esto muncho porke
mos plaziya.   Yo no lo uzo porke prefero gizarlo
fresko kon karne de kodrero en "guvech" 
(Kaldera de terracota) noche entera al orno....
 
El turlu guvech se giza kon 13 ingredientes !
fasulya, piperushkas, kalavasikas, berendjenas
bamya (okra) sevoya, ajo, tomat,azete de oliva (siempre
en mi kaza)  sal i pimienta  muy poka agua i la karne
en pedasikos chikos.  Es la mas maraviyoza komida
ke egziste en enverano.  Es pekado ke en inviyerno no
tenemos la bamya !
 
KUARTOS DE KALAVASA KON BERENDJENA
 
Al lugar del turlu, en inviyerno gizo kuartos de kalavasas
kon berendjena piperushkas tomat ajo prishil
 (sukar sal pimienta korolada i azete de oliva)
 kozido kon muy basha lumbre.
Se puede komer en yelado tambien i es muy savrozo.
 
Garvansoz se buyen tambien a la demanyana dospues ke
durmiyeron en la agua noche entere  !  
 No merkamos esto en kutis.
En Israel me namorava por el humus ke aziya en kaza.
No se deke no me se va la mano a azer esto en Turkiya !
Es la  psikolojiya del echiziko !   Aya biviya komo Izraeliana
i aki bivo komo mi nonika !  
 
 Ayyyyyyy ke en Inglaterra yo so una "Lady" ke no tiene
nada de ver kon la Sharope de Israel o de Turkiya ! 
 Gizo las dezgrasyas inglezas, lo mas lo ke viene pronto
i se mete al mikroondas, salatas alimpyadas
al presyo de oro, frutas egzotikas ke no tenemos en
Turkiya  (komo el lychies  ke adoro  i el pomelo) sin olvidar
el famoso  salmon fume , el pishkado salado de las kostas
ekosezas.  I... Ya me vino ambre a mi... Me esto indo a komer !
 
Abrasos a todossssssss
 
Sharope blanco

- Copyright © sefarad.org - 1997 - 2017

Retour au site sefarad.org -