Accueil - sefarad.org

Bulemas de Monastir

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
Kerido Mickey,
 
Por empesar grasyas por tus komplimentos
sovre mis eskrituryas...Me plazen i a mi
muncho i me veygo riyendo kuando los meldo
dospues ke se publikan komo si fuera otra
persona ke los eskrivyo !
 
Ansina de tontedad no se tiene visto ! 
Empeso a meldar kon interes komo si no savyera
de kualo se trata !  Madre mia bendicha !  Esto
peryendo la kavesa parese  !!!!
(Esto me afita siempre kuando meldo ALMENDRA !!!)
 
Ayyyy ke difisil, povretiko, de ser vejetaryano !
De ande te vino este mal ? 
Ya esta bastante komplikado de bivir ansina sin
ke tengamos menester de komplikarla mas....
Yo digo ansina !  No meter nombres ! Una ves
ke dizes ke sos vejetaryano, mismo a tu mizmo,
es difisil de salir de aryento.   Va dize ke no
tiyenes ganas en akel diya de komer karne o
produktos animales...Deshate una puerta avyerta,
sin serrar todas !  No komas ma no metas nombres !
Puedeser te va travar la alma un gueyviziko
haminado .....no se yo !  No te kero meter
savores en la boka.... Difisil tu vida..... !
 
Mis bulemas son kura i una puerta ke se avre al
Gan Eden para los vejetaryanos ! Estas bulemas son
halis (real) Monastirliyas i se preparavan para el
Shabat la demanyana dospues del kal kon gueyvos
haminados, salata de berendjena, pimyentones
asados kon azeyte de oliva i ajo, azeytunas 
(Los djudyos del Afrika del Norte no komen
azeytunas en Shabat, mozotros si...) domat
mundada en kuartikos, dulse de rozas, de bimbriyo,
de igos o de berendjena chikichikitika freska. 
Una bokaliko de raki para los hombres de una
parte i las kreaturas kon las mujeres de otra
parte.  Era meza de allegriya ke arekojiya toda
la famiya, chikos i grandes, buenos vistidos i
era defendido de yorar, de inyervarse o avlar de
kozas tristes...Mizmo en los Shabates
de dolyo (Komo se save no se tiyene dolyo en Shabat)
Todo esto para  "ke no se fuyga Shabat"  !!! 
Yo demandava  " Ande ken se fuye ? " i diziya 
"lo ataremos a muestra puerta para ke no fuyga ! "
 
 
BULEMAS DE MONASTIR
 
Las bulemas !  Si si  !  Agora te vo dizir komo
se azen !
 
Por empesar ke estas bulemas son muy kansadas i
tiyenen de arepozarsen i durmir  kada poko ! 
A mi me trayen inyervos de verlas tan kansadas i
les digo  :  " Hayde....A durmir agora i no vos
espertej nunka ! "
 
Se avre la arina kon  2 mizuras de agua, 1 de
azeyte o margarina derritida i medya mizura de agro
(yo meto vino blanko).
 
La masa deve ser de la blandor de los mushos !
(Es en este momento ke se le embiya un bezo i
se le dize a la masa " ke el mazal te valga " )
Lavorar esta masa i meterlo a arepozar kon una
tovaja limpya en el frijider.
 
Dospues de 2 oras  avrirla i espandir muy poka
de margarina kon una furcha (brush).  Otra vez a
durmir...Ansina 3-4 vezes.

Mi mamita la avriya 12 vezes ! Por siguro no te
olvidez de sarpikar arina ensima de la laja antes
de avrirla !  SE apega i empesas a demandarte
porke vinites al mundo ! Dunke para unas bulemas
buenas echas la arina deve bolar en el aver i en
el palo kon elkual avres la masa ! 
 
Es defendido de aharvar la masa kon este palo.
Tus djestos deven ser dulses, la kara kon una
soriza i hasvehalila no darle entender ke la
keras furladarla (to throw) por la ventana !
Por sedaka !  Se inyerva i se seka !  Kuando
esta masa durmyo unas kuantas vezes i la
pintates kon la margarina kada ves ke la
avrites esta pronta para inchirla.
 
Lo de aryento  :
 
/ Spinaka (kozida i esprimida) kon kezo i gueyvo
/ patatas kon kezo i  gueyvo
/ berendjena tartikada kon kezo i gueyvo
/ kezos rayados, prishil i gueyvo
/ muez rayada kanela i asukar
/ almendras uvas pinyones
/ o no se yo komo sin gueyvo o kezo !!!
kale demandar esto al guru !
 
A la largor, muy fino kon una anchura de unos
10 santimetros se avre la masa, se inche de
esto savrozo aryento i se forman komo sigaros
godros de Havana ! Se aboltan komo para formar
una roza i se meten al tepsi  ande vana kozer
en el orno fina ke se azen un poko ruvyos. 
Ensima los pintas kon el amariyo del gueyvo  i
le puedes sarpikar  lo ke te plaze....
Yo meto pimyenta korolada !
 
Kuando estan prontizikos antes ke se yelen muncho
los komes !
 
....Ayyyy  atensyon los dedikos !......
 
Karinyozzzzzzz
Sharope blanco

- Copyright © sefarad.org - 1997 - 2018

Retour au site sefarad.org -