Accueil - sefarad.org

La berendjena

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LA BERENDJENA
 
 
  

El begendi kebap no es judyo ! Musulmana
dezmazalada i se tapa la karika !

Porke tiene LECHE  en el begendi ke se aze
kon sos beshamel ...

Difisil koza.....No es la fin del mundo
si no se kome.... Se puede uzar pure al lugar
del begendi para la noche de mued.
Pure sin leche por seguro ,
o el aroz kasher kasher sin espanto.

---


Komidas djudias de berendjena kon karne

Pedasikos de karne es una maraviya para azer
el taskebab, el goulash, el begendi
kebap ke es kon berendjenas....el islim kebap
kon berendjenas tambien el talash kebap ke
es una boreka....


Por empesar kozer la karne :))

Lo mas savrozo es del braso, kortado fino a la
largor i no a la antchura..


Deshar arepozar un poko kon agua i sal
para ke le salga toda la sangre i lavarlo.
(Le puedemos meter allado un magazin aver
livyano (!) para ke no s'enfasye de asperar !)

En un tendjere meter azete i sofriyir la karne.
Kuando troka kolar meter ariyento un poko
de karota fina kortada, pimienton fino kortado
pedasoz muy grandes de sevoya seka i ke todo
esto se kozga en lumbre chikichikitiko...
....Antes de abashar lo de la lumbra
10 minutos ansina...koze kon 1 kupa de vino
blanko sal i pimienta korolada o preta o blanko.

Si keresh ke tenga kaldo para unti unti (untar)
sos tomat o domat rayada o tomatada kon
agua i kozer fina ke se kozga la karne
(Las mizmas kozas aryento sin la sevoya)
Si ay tomat en la komida, adjustar 1 kuchara de
dondurma (glace- ice cream - glida) de asukar.
(no la dondurma por sedaka !!!!)

El kaldo es super !!! A mi me plaze blanko i no
kolorado ...Dunke desho en el fridge la famiya
de las domatas. - El vino i la pimienta vana
ser blankos si no ay domat , kon domat al lugar
de sevoya meter ajos ma ajos ke konosemos no
por nazarlik aya....oy veeeeee -
    


 
Komidas djudias kon talleth i kipa ma......

   

Deskansar un poko ....Kitaremos la
prostela brodada ...un kafiko de keyf kon
2 biskochikos de raki ..1 telefoniko aki
2 yamadas por aya...i al mupak siiiiiiii

Agora de muevo prostela ( no la de l'ashuar
ke es brodada... la de kada dia ! )

Vamos a friyir berendjenas ! Yeh !


Vamos a friyir UN POKO pedasoz largos i finos
de berendjena (arepozada en agua kon sal tambien
para ke se vayga l'amargura, i sekada en
esprimyendolas kon las manos dospues, antes de friyir)

ISLIM KEBAP

azer una bohcha (bogo) kon estas berendjenas fritas.
En primero uno a la largor una a la anchor otros
diagonales etc....i meter la karne aryento de este
bogo. Serrar kon kurdanikos (no de plastik !) i
meter a l'orno kon un pedaso de tomat i de pimienton
ensima de kada bogito. Kale ke seyan komo el punyo
de la persona.


Las NOVYIZIKAS (komida ke m'ambezi de mi esuegra
i me namoro de esto ) son muncho mas chikitikas.
Se azen kon karne tartikada (areyevan sevoya
pimienta sal afilu oregano etc).
La berendjena frita , larga i fina
se inche kon karne tartikada (no kocha) i se aze
rulos detenidos kon un kurdan. El tas kebap tambien
lo tengo empleyado para las novyizikas .

Estas novyizikas no son tapadas kon velo blanko
i no son innosentes NO ! Fritura.... karne....
azete....Ma una lokura de savor !

Wohouuuuuuuuuuu



BEGENDI KEBAP (No es kasher)

Las berendjenas se kozen ensima de la lumbre
o en el grill, se mundan i se tartikan en un
resipiante no de metal kon una kuchara de
tavla de preferensya (no metal has ve halila !)

Se aze una sos beshamel -
(Arina kon margarina a la lumbre..
Adjustar avagar avagar  la leche )

i la berendjena tartikada se vazya en esta beshamel.

Kale ke se aga komo un malebi. Se sierve
kayente kon el tas kebap blanko o korolado kon
kaldo ensima...(Bueno para unti unti :)
- Ke no me oyga mi ijo ! Todo esto es
defendido por la salud i por la Ley ! -

Esta karne se puede gizar tambien kon shampinyones
kon agua sin vino
sote kon almendras i pasas
vino korolado tambien
kon sevoya o sin
kon ajo al lugar de la sevoya etc etc


estas komidas son bueno para murir :)

La mizma komida se puede azer kon garones
de kodrero o antrekot

Sharope blanco



La sos beshamel ke se uza para azer 
el begendi es margarina/manteka kon
arina lavorado en la lumbre i al kual
se le echa leche avagar avagar.....

Agora,  los turkos komen esto kon
tas kebap ensima...Dunke no tiene
kipa en la kavesa...


Yo penso ke se puede komer el begendi
kon la sos beshamel ma sin karne
kon la sos tomat - aki abasho -
Yo lo ago i lo komemos muncho ansina
porke esto tratando de no komer karne..
Dospues de los 50 ke karar de manko ke
karar de bueno !!!

LA SOS PARA EL BEGENDI

Un kilo de tomat bien echas se mundan
i se azen pedasos grandes
250  gramos de pimienton ke se kortan
finamente
- Kortar kavesas i puntikas, partir en 2
a la largor por alimpyar lo d'arriyento -

una kuchara de asukar
sal - pimienta korolada ke no kema
pimienta korolada ke kema, un poko
basilikum (fresko mijor o seko)
munchos dientes enteros de ajo 
o ajo molinado
1 kuchara d'arina
100 gr. de azete d'oliva
1 karota rayada
un poko de agua

En un tendjere se boltan un poko
arriyento de l'azete de oliva
los pimientos, la carota rayada
i el ajo.  2 minutos(lumbre avagar)
En 1 kupa de agua se echa l'arina
i se meneya bueno para ke no keden
bultizikos de arina. Se vazya al
tendjere.
Se echan las tomatas, las pimientas
korolado (1 ke kema l'otro ke no kema)
la sal i l'asukar, el basilikum
(menta ken kere )(oregano ken kere)
se koze a la lumbre komo kandelika !
Fina ke todo se aga kom un malebi
aguado.  Kale menear kon kuchara de
tavla d'envez en kuando para ke l'arina
no pege al tendjere.

Aprovadlo i vos vash a tresalir :)))

Ke tengash un dia maraviyozo
kon los ke amash....

sharope blanko
kon el chapeyo largo de los gizanderos
 

- Copyright © sefarad.org - 1997 - 2017

Retour au site sefarad.org -