Accueil - sefarad.org

El djadjik peryo su djadjkes o... el tapet de rizas

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Resefta - Memoryas - Nostaljiya

100 % Sharope blanco !
EL DJADJIK PERYO SU DJADJIKES
(O....... EL TAPET DE RIZAS !)

Lo peryo su djajikes porke ? Porke no save mas, dezmazalado, kuando vinir a las mezas !
I todo esto pormodo del pipino ! Si ! Antes, el pipino era verdura d'enverano ...Saliya en medyo enjuntos kon la ropa ke se kitava de las malas, de las validjas buen guadradas kon naftalin i alevantadas d'en medyo kuando viniya l'invyerno.
Yo me tresaliya estar al lado de mi mama kuando se avriyan estas valijas o malas o afilu bohchas (paketo echo kon ropa) porke via estos vistidos de muevo, dospues de mezes i mezes. I mezes i mezes en lachikes eran komo anyos i anyos !
Agora mos esta pasando el tiempo muy presto ! Estos vistidos goliendo naftalin me transportavan a la memorya de l' enverano pasado, a los jugos kon mis amigos kon ken mos topavamos kada enverano....I ke desiluzyon era kuando uno d'eyos no viniya porke sus parientes aviyan preferido ir a otro lugar o pormodo de kualkera otra razon.

El naftalin de akel tiempo no goliya komo la desgrasya de koza de oy ! Barminnnnnam !
No merko mas esto yo ! Esta golor de naftalin (akeya de antes) era komo el empesijo del enverano o de l'invyerno, porke el mizmo echo se aziya a la pasada a l'invyerno. Lo ke se aziya a l'empesijo del enverano era muncho mas difisil porke se tratava d'alevantar tapetes, kolchas, battaniyes (kuviyertas), mantos...
No se alevantavan los tapetes antes de lavarlos i ... Ke lokura de echos ke aziyan al tiempo !
Agora ya esta mas livyaniko para mi !
No alevanto los tapetes... basta !
Los embiyo a lavar... punto !
Paltos no uzamos mas .... No ay mas frios komo aviya en mi chikes... Naftalin no se kere !
I lugar en los armaryos ya ay (grasyas al Di-o) para apartar lo d'invyerno de lo del enverano ! Livyanes !

Me akodro el segundo anyo k'estava en Israel....
Me aviya yevado de Istanbul el tapet (maraviyozo) ke mis tiyos me aviyan regalado kuando me kazi..
No lo aviya alevantado kon naftalin en enverano.
Me se fuyo del tino ! ...Mazal del tapet ! Se lo komyeron kon salud los tchitrifilikos blankos i minudos ke bolan, las puliyas !. .. D'ensima no vide nada. Tomi la makina para alimpyar lo i ke veygo ? !!!! Pedasikos chikichikitikos de tapet bolando a mis piezes ! Bendicha mi madre !
1000 guerkos del gehinnam ! Se fue el tapet a l'estomago de las puliyas ! Mal les vere !
Yoro mayuyo ...10 puntos i no mas ! Ke iva azer yo d'este tapet en no me manke mi payis ! v Pezgada koza sin menester. Alimpya...Lava... Mete a sekar...Le plaze sol, no le plaze sol.... Se mancho ! Va goler ! ... I si lo arovan ? v Se kere sigurita ? no ? Al diavlo ke se vayga ! Lo echi por la ventana kon los milyones de puliyas ensima, yami jente de la iriya ( munisipalitad), echaron kuras en kaza i en la guerta i fin d'istorya !

Kon akel tapet maldito se bolaron tambien mis ansiyas por la ventana ! (solo pormodo de la prezensya de sus majestades este tapet , no tomi un perriko a kaza... Dospues ke se bolo vino Jimmy...embiyado de los sielos a mi lado... Ma esto lo vo kontar otro dia skD)

Dospues kada ves ke me akodro d'esto (komo agora) vo riendo riendo ! ....El tapet de puliya se troko en tapet de riza ! Ansina es !

El djadjik ! no me olvidi ! Estava dizyendo por el pipino ! Dunke, el pipino era l'ingrediente prensipal, dospues del yogurt para azer djadjik . Una sinyora me demando reseftas de komidas. Vos enkomendo este plato muy sano i ekselente para los ke keren azer rejim !

Esto se aze kon yogurt, dishimos, i un poko de agua, buen meneado , se mete la sal, dereotu (va eksplika agora ke es esto ! Yervizika fina fina komo kaveyos ! si ! Es el kompanyero del prishil ! Reushi parese ! ) = l'aneth !
De muevo !

- yogurt i agua (asigun lo keren aguado)
- ajo majado para ken le plaze - yo me namoro !
- dereotu (de l'aneth)
- pipino rayado fino
en esta supa blanka i muy freska....

Meter a yelar i antes de servir pasar un poko

- d'azeyte d'oliva,
- paprika,
- una oja de preshil....

El djadjik no s'inyerva si no le azej makiyaj antes de servirlo !

Esto es el "djadjik" !
Ma esto se komiya en enverano ! Se asperiya kon savores en la boka .. Kon la berendjena o la kalavasa frita endjuntos nada de mas savrozo !
Agora ya staaaaaa....El pipino k'esta un pipino !
Hormones i todo bueno para ke kreska pishin !
Kon savor de pishkado ! Vedre i duro i chiko i grande .. Al ver lo, un suenyo de pipino !
Lo keres bezar ! Al komer...a mi no me plaze !
Aryento del djadjik kon ajo i todo ya esta indo ! Esto es lo ke ay ! Punto !
I no se kere mas asperar el enverano !
Se izo eskova de kada diya ! Peryo su djadjikes !

Sharope blanco
http://groups.yahoo.com/group/Sefaradimuestro/

- Copyright © sefarad.org - 1997 - 2017

Retour au site sefarad.org -