Accueil - sefarad.org

Lentejas

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

L E N T E J A S

 

KE LO BUENO MIYO
DE LAS LENTEJIKAS DE MI MADRE !

Oy vos kero avlar de un plato ke no egziste kaza
judiya ke no gize este plato muy sano i amado por
todos los miembros de la famiya, i spesyalmente
si esta bien echo, sharopeyado i pomponado komo
una komida sharonfonfon !

Vos asemeja plato baratiko,  no ?  

Yo vo lo prezento komo una maraviya de mezas
de fiesta...  Orijinal i muy savrozo  !  A ver.....


INFORMASYON GENERAL   :

________________________________

La lenteja no es komida ke se kome en fresko.
Se seka i puede ser guadrado munchooooo tiempo !
Ay vedres, koroladas i amariyas.   Mozotros komemos
las vedres en komidas i en salata i las koloradas
azemos supas maraviyozas !

No kale olvidar ke las vedres tienen sus kashkaras
ensima ma las koloradas i las amariyas no las
tienen i es por esto ke se desazen muncho mas presto
i se uzan en las supas.

Kontiene alta kuantitad de proteina i es un buen
substituto para la karne.  Los vejetaryanos lo uzan
muncho.  

Dan lentejas a komer a los ke nesesitan sangre por
mankura de fierro !  Es ekselente.

TIP  :  La sal puede endureser la lenteja.
          Meterla dospues de kozinar.

*

SUPA DE LENTEJA KOLORADA    (puede ser i amariya)
_________________________________________________

Ingredientes  :
*

El pecho de una gayna

4-5  kucharas de azeyte de oliva

2 grandes sevoyas sekas

1 kupa de lenteja kolorada 

1  karotta
1  patatika chika

2  kubes de bouillon MAGGI  o KNORR

Prishil, sevoya freska, oregano, sal, pimyenta kolorada

Kozinar  :
*

El pecho de la gayne se korta menudo
i se friye un poko en boltando en la azeyte

Se adjunta la sevoya kortada menudo
i se kontinua  a boltar

Se adjunta la karotta menuda i se bolta mas
Se adjunta la patatika se abolta
Se adjunta la lenteja se bolta

I se inche la kaldera kon agua kaynte  (5 kupas approx)

Se adjunta el/los kubes de bouillon diluados
kon agua kaynte  i oregano.

i se desha a kozer fina ke todo esta blando i kocho.

Lo todo se pasa al mikser para obtener una supa
homojen.  Si esta muy espesa se puede adjuntar
agua kaynte.

Si izitesh esta mizma supa  SIN LA GAYNA, lo ke
es posivle tambien, puedesh adjuntar  leche kaynte.


Antes de servir se mete ensima (komo vos plaze..)
sal i pimyenta kolorada i

preshil i sevoya freska kortada muy finamente
(komo lo dezeyash i si tenesh en kaza o solo prishil ets,)

ESta supa, muy sana, i pan kaynte vos detiene artos
por el diya entero !

 

KOMIDA DE LENTEJIKAS  (Vedre)
____________________________

De la noche meto las  LENTEJAS  lavadas en un
resipiente de vidro  (verre)  kon agua limpya
para ke se aunflen.

La demanyana la echo ensima de un tefsin para
ver si ay piedrizikas o suzyo aryento !  En vezes
ay lentejas ke no se ablandan i kitan un bruido
mas stridente ke los otros !  Las echo tambien.
Lavo otra vez i las meto a buyir.  Dospues ke
buyo la agua las eskuro kon un tripito.  Echo la
agua buyida.

En una kaldera vazyo medya kupa chika de AZEYTE
de oliva.

Ajunto a la azeyte kaynte  2 grandes  SEVOYAS
kortadas minudamente i las sofriyo un poko,

Ajunto  MEDYO KILO DE KARNE  de kodrero o de veau
kortada en pedasikos chikos.  Las friyo fina ke la karne
i la sevoya se aze dore komo karamela un poko....

Ajunto la lenteja medya kocha

Ajunto  SAL  i SALSA de TOMATE, PIMYENTA PRETA.

Desho kozer lo todo.  Kontrolando para ke no se keme !


SALATA DE LENTEJIKAS 
____________________

Lentejikas buyidas i yeladas
Sevoya freska, kortada finamente
Karota buyida  kortada finamente
Pimyentones kolorados kortados finamente
Prishil finamente

Agro, azeyte de oliva, sal, pimyenta preta

*


NO VOS OLVIDESH KE EL AROZ SE PUEDE
TAMBIEN SHAROPEYAR KON LAS LENTEJIKAS
KOMO GARNITUR  O  EMLESKADO EN UNA
KOMIDA DIFERENTE .
( Los arabos yaman esta komida Mujaddara ! )


Espero ke estas reseftas vos plazeran i vash a
pensar en mi en komyendo !


Salud i beraha

Sharope blanco

 

- Copyright © sefarad.org - 1997 - 2018

Retour au site sefarad.org -