Accueil - sefarad.org

Mustachudos

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

MUSTACHUDOS


Este es el dulse lejandaryo de los judyos de  IZMIR  !

Mozotros en ISTANBUL  azemos el  TEZPISHTI !

Ayyyyyyyyy, no vos di dayinda la resefta ?

Ande tengo mi kavesa !  Komo me puedo olvidar de esto
ke es  la  "agada"  mizmo de PESAH !!!!

Dingunos pueden azer el tezpishti komo mi madre
ya esta en Ganeden, lo saviya azer... Imposible porke
es la savor de sus manos ke mankariya si nada mas....

Los mustachudos  o los "moustashus"  Izmirlis, dulse de
namorar, kon savor de "mas i mas"   son la spesyalite
de las balabayas judiyas ke no peryen dinguna okazyon
para mostrar sus talentos kulinaryos a todos, para ke las
metan en el raf  (etagere)  el mas alto de la eskala sosyal !
Mujer ke no konose todos los sekretos del mupak es
" hmmmmm "  !

Komo se azen estos "moustashus"  Izmirlis ?  Veremos  :


-  Medyo kilo de  "buena" muez pasada  o rayada
   o almendras dulses o avyanas krudas molinadas
   o de todo endjuntos... Kon almendra es maraviya !


-  Medyo kilo de  asukar


-  2 gueyvos grandes o 3 chikos


-  3 kucharas de supa de agua o de leche


-  8-10   biskuis dulses (petit beurre)  ke se minudan


Mesklar i lavorar kon el mikser los gueyvos, la asukar i la leche.
Adjuntar los biskuis espedasadoz chiko chiko, minudo.
Mesklar bueno lo todo

Esta meskla se vazya a una grande kacharola i se mete
a la lumbre muy dulse... Se uza de una kuchara de tavla
i se va mesklando siempre para ke no apege.

Se abasha de la lumbre  kuando lo todo esta homojeno
i se desha a yelar. 

Se lavora esta masa komo kualkera masa.

Agora mos keda de darles una forma !

Lo mas se azen trianglos !  Yo ago letras !

se arrodeyan aryento de polvo de pistachio o de koko

o de shokolad o de karamela kaynte ! 

O simplamente en la asukar en polvo !

Bon appetit !


 


 

- Copyright © sefarad.org - 1997 - 2018

Retour au site sefarad.org -