Accueil - sefarad.org

Kaldo - Sumo - Derrido de - Esprimido de

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

KALDO - SUMO - DERRITIDO DE - ESPRIMIDO DE ......

Uzamos el Sumo para dizir el nektar, la agua de......
Sumo de portokal/narandja, sumo de mansana...
Por empesar yo se ke el sumo es una palavra espanyola. Nunka la tenemos uzado en Istanbul. Por kontra diziyamos " esprime las uvas i mete el 'esprimido' en el kaldo del poyo (Es una maraviya !} "
El "esprimido" de agranadas, el "esprimido" de narandjas o portokales (tomado del turko) el "esprimido" de toda manera de fruta era el biervo uzado aki. Esto no kere dizir ke en otras sivdades o rejyones no se uza " sumo "....Puedeser...
El kaldo es una koza echa kon varios ingredientes. Puede tener agua, vino, esprimido de frutas, de karota, de sevoya etc.. i en kualo adjustaron o no; sal, asukar, limon, ajo, pimyenta arina etc. o si es koza dulse shokola derritido, leche o un poko de miel etc...
(tengo ambre supito yo !!!! )
Vos propozo de bever kon mi un "CRAPLE" , la mijor bevyenta asigun mi ijo ! Tienen innombrables efektos de bien-estar ! El "craple" es el jus de carrotas kon el de las mansanas.....
Una pura maraviya para los ojos, la sangre, el ilgado, para los ke sufren de los reines para los ke tienen ambre i preferan no komer (!) ...es una freskura ke vos traye pishin la soriza a la karika por ke vos karesa el korason... Es dulsiko, muy savrozo, una grande kupa da artura por 3-4 horas .
Attensyon por los ke tienen el diabet..... Esto kale en primero demandar a vuestra dietetisyana.
Por seguro savesh todos ke devemos tener para todo manera de sumos ekstreyidos en kaza la makina d'esprimir frutas o legumes duros komo la mansana, la pera, la sevoya, la kalavasa, el pipino, el bimbriyo, las patatas ets....
Lo tenemos de menester para bever direktamente el esprimido o uzarlo en las koftikas de karne o de poyo, en las supas, en las sauses, en las kompotes....
Un otro esprimedor es para los limones, las narandjas las pamplemuses las mandarinas i las agranadas !
Espesyalmente las agranadas kon narandjas es kurarse de todo manera de hazinuras ke mos pueden vinir en la kavesa ! Es salud... Es vida ! Kombate el kanser i la gripa !
Uvas es bueno para el korason...
Se pueden esprimir ...... Se pueden adjustar al esprimido narandjas, agranadas, mansanas, peras.... karotas..
Una kupa de vida : Esprimido de karotas kon kalavasika ! Freskura i salud..... Vos va tapar la gana i vos va enfuerteser !
La mijor sauce del mupak : La salsika para todo !
Sofriyir un poko por empesar una kavesika de ajo majado/rayado Rayar domatas maduras grandes i karnudas....
Echar un poko de sukar, sal, paprika i meneyar enjuntos. Kortar finamente las piperushkas vedres i koroladas o lo ke ay en kaza... Ma ke eskriva en su karta de identitad PIPERUSHKA !
I adjustar a la salsa.... Komo lo amash puedesh meter aryento turmeric, menta, oregano....
Es una salsa majika ! Se puede komer kon pan komo salata en la meza... SE puede meter guevos aryento para azer una shakshuka maraviyoza, se puede uzar por la pasta (los spaghettis) , el aroz, el patlidjan begendi, la pure de patatas, la pure de spinaka i en todos los platos ke no vos estan plazyendo para komer... Esta sauce los transforma majikamente !
Si keresh demandarme kozikas kon konaeksyon a estas reseftas me puedesh eskrivir a sharope.blanco@gmail.com i vos va dar respuesta en este kantoniko del Sinyor Rahmani.

HAG SAMEAH - MOADIM LE SIMHA
ANYADA BUENA A TODOS KON VUESTROS KERIDOS
SIEMPRE A VUESTROS LADOS, SANOS I REZYOS - AMEN

sharope blanco
http://groups.yahoo.com/group/Sefaradimuestro/

- Copyright © sefarad.org - 1997 - 2017

Retour au site sefarad.org -