Accueil - sefarad.org

La sevoya - un regalo de los sielos

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LA SEVOYA -  UN REGALO DE LOS SIELOS
 

Mis keridikos.

Oy  vos kero avlar de la sevoya !

Aviya 3 mezes ke no meti en boka sevoya kruda
malgrado ke me plaze muncho i siempre pensi
ke mi salud la deviya a mi gusto de komer
sevoya kon la komida.... Mi asistentika ke
prepara mis komidas i me las traye a  mi lado
en kualker kanton ke mi tope en kaza nunka
penso a esto i yo no le demandi, no kijyendo
tener boz en kestyon de los alimentos ke me dan !

La otra demanyana, si , de demanyana (!) me
vino una fuerte ganas de sevoya...  En la punta
de los piezes me fui a la kozina i soriyi a una
ermoza sevoya ke me mirava kon sus ojos de miel.
La korti pedasos, le meti sal, pimyenta korolada
i un poko de azeyte de oliva, tomi una revanada
de pan i me lo komi en mi kantoniko el mas
leshos de la kaza tsam tsam tsam mamm mmm.
Ganeden !  Ke ideya de yamar la sevoya kerida
ALLIUM CEPA   !!!!

Portante la ALLIUM CEPA  es una planta de mil
maraviyas ke kijyera prezentarvos en este eskrito :


Di-o kriyo las plantas i las yervas
i dyo salud kon las manos de las personas
a setenta males ... 
Kuro setenta hazinuras
kon estas plantas.... !

Por la salud se uza la sevoya seka antes ke
de burjones... Kruda i de dinguna manera
kozida i friyida.  Es orijinarya del oueste de
Asya i del Sud de la Siberiya.  Es una planta
rika en munchas vitaminas ke da fuersa i salud.
Amijora el estomago. Enderecha los intestinos
i es bueno para los renes.  Es diuretiko.
No kura el diabetis ma puede abashar la
asukar en la sangre.  Es bueno para la sirkulasyon
de la sangre.  Previene la gripa, la abashada,
la enflamasyon del garon i la tos.  Se les puede
dar a las kreaturas koratada finamente kon miel
para ke no kaygan hazinos si toman yelor !
Para TOS FUERTE  i kreaturas kon la Coqueluche
la kura sera 

EL SIROP DE SEVOYA   :

Kortar finamente una sevoya
Adjuntar 2-3 kucharas de asukar
medya kupa de agua
Buyir 3 minutos a fuego dulse.

Asperar 3 horas para ke se yele
Pasar lo todo por un fino handrajo
(retirar el likido)

Se beve  5-6  vezes al diya 1 kuchara de supa


La sevoya enfuertese el korason  :

Siendo un diuretiko, ayuda a eliminar los
toksines del puerpo i alimpya la sangre.
Da ganas de komer i fasilita la dijestion.
Aze lavorar los intestinos tambien.
Kontiene muncha vitamina C  dunke enfuertese
la defensya del puerpe.  Abasha la fievre.
Kon los estudyos ke se izyeron ultimamente
se topo ke la sevoya 
AVRE LAS VENAS KORONERAS !

A parte de todo esto la sevoya se uza por kurar
los modriskos de moshkitos, de bizba.
Se mete ensima de los granos para madurarlos
i kavzar ke se kuren presto.

La sevoya tiene muncho  vitaminas  A- B i C.
Tambien  Fosforo, Iyod, Silis i Sufro.  Es un
antibiotika natural i kontiene fermentos ke
fasilitan la dijestion.  Es bueno para los ke
sufren de la prostata, tienen el pankreas ke
no lavora bien (diabetikos)  los ke tienen inyervos
flakos, romatizma, hazinuras del kuero,
difikultades seksuales, estomago hazino.
Echa la agua i el ure del puerpo.  Alimpya los
intestenes de los parazites... Dezenfekta la
tripa i e ilgado.

No kale guadrar la sevoya kon las patatas
porke estas les apegan mojo i la sevoya
deve estar en lo seko i en lo fresko.

La golor de la sevoya en la boka dezaparese
en komyendo preshil i la krosta del pan.

Es el enemigo numero uno del Kanser  !!!

Por los ke saven el Turko, un sityo
inkreyivle  !

http://www.herbalistatabay.com/


Salud kumplida para todos


Sharope blanco

- Copyright © sefarad.org - 1997 - 2017

Retour au site sefarad.org -