Accueil - sefarad.org

Dolmas de pazi kon lechua i prunas vedres

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

DOLMAS DE PAZI KON LECHUA I PRUNAS VEDRES !


Keridas Amigitas

Viernes Ayhan (mi vizinika)  i yo mos asentimos
en el balkon i pensimos, pensimos, pensimos kualo
gizar de sharanfonfon para Shabat... Un plato
diferente de lo ke estamos auzadas.

Las dos amamos dolmas/sarmas  ke son piperushkas
o kalavasas o berendjenas o kol o domat inchidas
de karne pikada o de aroz kon sevoya i pinyones ets.
Toma un poko mas de tiempo ma es komida de reyes
si se reushe bien...

Esta vesz desidimos de inchir las ojas de PAZI.
(Va eksplika agora ke es el pazi !)  Son grandes
ojas (vedres !!!).. MIri al diksyonaryo en el
Internet.. En Inglez eskrivyo ke es el "Chard/
white beet",  "la bette"  en Fransez, "acelga"
en Castillano i en Portugues.   ESTO !
Se puede azer lo mizmo kon ojas de ispinaka o
por seguro kon ojas de vinya (el mijor !)
ma kon la acelga (el pazi) salyo de namorar !

Teniyamos en kaza  :

acelga
kiyma/karne tartikada/pasada
aroz
lechua
prunas vedres/zirguelas
sevoya
prishil
menta  (seka o vedre)
ajo en polvo
pimyenta preta
sal
azeyte de oliva
agua

 

La karne  (pasada 1 vez solo i un poko grasa)
2 sevoyas rayadas
una kuchara de supa de aroz lavado
prishil muy minudo
pimyenta preta
menta muy minudo
polvo de ajo (un poko)
sal


Todo esto se lavora bueno kon las manos komo una masa.

 

Se lavan bueno los ojas de acelga/pazi
i se les kita los sapes  =
(sap en turko >  la tige/ el pedunculo)

se meten aryento de la agua buyendo un poko
para ke se puedan lavorar en ablandandosen
(El mizmo proseso para la ispinaka,
la kol, los ojas de vinya)


Dospues se va al balkon
i se asenta frente kon frente kon Ayhan
tomando eya la karne lavorada
i yo las ojas ablandadas de acelga
ke meti en un tripito para ke eskura la agua...
Se avla de aki de aya, se riye muncho
i kuando mos viene el keyf de lavorar....

Avrimos kada oja separamente delantre de mozotros.
La parte briyante de la oja boltada a la meza !
Metemos un pasiko de la masa de karne aryento
lo emburujamos bueno kon la oja.  Se aze un paketiko !

Esto es una dolma !  O un sarma !  Mmmmmmmmm !

Eskapamos ansina todas las ojas inchidas de este gomo.

En una ermoza kaldera kolorada de preferensya
(o vedre.... o bleu !)

metemos las ojas de lechua bien lavadas
para azer una ermoza kama para las dolmas.
(Kale ke se sonyen ke se estan azyendo muy savrozas !)


Duzudamos/arreglamos las dolmas ensima de esta kamika
para ke durman kuando se estan kozyendo.

Metemos las prunas sin los kueshkos ensima de las dolmas

un poko de sal
un poko de azeyte de oliva
agua fina kovrir las dolmas

Kuvijamos lo todo kon ojas de lechua para ke no se yelen

I tapamos el tendjere/la marmita kon el kapak/la tappadera.

Lo metemos a kozer a flama dulse.... Fina ke kozga !

NO KOMIMOS KOZA MAS SAVROZO DE ESTO !


Kon karinyooooooooooooo

Sharope blanco
kon el chapeyo alto de los gizanderos !


 

- Copyright © sefarad.org - 1997 - 2017

Retour au site sefarad.org -