Accueil - sefarad.org

La shakshouka

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LA  SHAKSHOUKA

Mis keridos,
 
 
Los Izraelyanos konosen esta komida delisyoza
de los bufetes de la kaye o mizmo de ermozos
restaurantes oryentales.   La vedra ke se aze de
diferentes maneras.  En Turkiya se konose komo
el MENEMEN, los judyos lo yaman GUEYVOS
KON DOMAT..
 
 
El ermozo de esta komida muy savroza es ke se
aze  "a la minute"  kuando se tiene supito ambre
i ke no ay komida pronta en kaza... Afita... O
kuando viene un musafir  (vijita) ke no se asperava,
para las kreaturas o los inyetizikos ke no les plaze
esto i esto i el otro !  Esto les va plazer por seguro !
 
 
Yo adoro gueyvos al plato kon domat i tengo mi
manera de azerlo ke plaze a todos...  Pensi trayervos
savores a la boka kon una resefta muy fasil i ke
siempre sierve de tener en tino !
 
En los mupakes oryentales la Shakshouka se guiza
kon ajo.  No ande mozotros, los Judyos de Istanbul.
*
Yo lavo las domatas i las korto en dos.
Las rayo en la parte godra del rayador
fina ke keda el kueriziko solo ke echo...
 
Meto azeyte de oliva en un sahan (la poele)
aspero ke seya kayinte kayinte antes
de echar la pure de domat aryento.
Bolto fina ke se sofriye la domat a fuego dulse.
 
Echo 
pimyentones kortados finamente
sal,
pimyenta kolorada,
una chika kucharika de asukar (la domat es agra !)
Oregano
Prishil
un poko de menta freska o seka
kuando todo esta kuaji kocho
rompo los gueyvos aryento
Sarpiko un poko de sal i pimyenta preta
ensima de los gueyvos
Kale ke keden enteros,
lo blanko kocho i el amariyo medyo kocho
para untar paniziko fresko !
Bon appetit !
Sharope blanco
 

- Copyright © sefarad.org - 1997 - 2017

Retour au site sefarad.org -