Accueil - sefarad.org

Iskender Kebab

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Oyyyyyyy No !
Keridito miyo,
Iskender kebabi ke es una de las komidas las
mas populares en Turkiya no es del todo echo kon
poyo !  (En los dalkavos tiempos en siertos lugares
estan asando las alas de poyo kon pimyenta
korolada i estan  siervendo kon el Iskender.. Ma
 no es el orijinal !)
Iskender es el nombre turko para dizir
Alexandre sharonfonfon !
Es la komida la mas  NO KASHER  ke egziste i te
kero kontar ke a mi amiga ke vino de Israel le asuvyo
chapetas malgrado ke no es demazayada atada a la Ley.
Iskender kebab es el doner kebab preparado de
manyera muy spesiyal. Me vaza demandar ke es el
Doner kebap.....Doner, asigun su nombre en turko
es koza ke abolta. " Donmek"  aboltar.  Se pasa
grandes pedasoz de karne i karne tartikada kon
 gudrura de kodrero a un shish de 1 metro
aproks. (el shish es un palo de 1 cm de  diametro
echo de metal kon una punta ke puede burakar
la karne)  este shish se monta allado de un radyan
ke da muy muncha kalor i asa la karne kuando el
 shish va aboltandose komo una balerina en puntas !
Kanibales ya somos i por esto la vista de esta
karne asandose en boltando i kon las golores ke
sale de esto da ambre mizmo al rey tan arto , i es
una de las kozas las mas fotografyadas en este
 payis.   Ya lo tengo vido i en otros payizes
por sierto.....Agora el mundo entero konose el
doner turko.
 http://en.wikipedia.org/wiki/Doner_kebab

 
Kuando el doner ya se aso se korta revanadas muy
delgadas i se mete esta karne ensima de la pita
turka un poko seka.  Se mete pedasoz de karna asada
i koftikas estrechas i largas (meat balls), domat
i pimyenton vedre largo asados i se vazya ensima
 la sos echa kon salsa, pimyento korolado i manteka
sofrita.  Esto se siyerve en platos largos lo mas
en kovre i kon el kapak (kuvyerto) ensima para ke
no se yele.  Lo ke aze no kasher esta komida es
el yogurt en el mizmo plato, la kondisyon del
 Iskender kebab !  No egziste Iskender sin Yogurt
sin Pita seka, sin salsa kon manteka i sin el
biber(pimiyenton)0 i la domat. Unas kuantas patatikas
fritas ( no muy freskas malhorozamente ) i no
savrozas viene kon el plato.  La djente las deshan
 ayi i no las komen el mas del tiempo ! El plato es
tan grande ke la verdad no keda lugar para estas
patatas sin savor, mizmo en el mijor restaurant !.
Iskender kebap fue inventado por el sinyor Iskender
ke le dyo su nombre i se izo famozo en Bursa en el
siglo 19.  La forma orijinal era el shish no en pies
ma echado ensima de la lumbre de arvoles sekos.
 El restorante orijinal en Bursa egziste dayinda i
siempre yenno dia i noche !  Es kuryozo...Sierven
1 posyon o  1,5 porsyon ke se enkomenda al empesijo.
Nunka vana siyervir el sigundo plato ! Vana dizir
" Keremos ke su savor kede en vuestra boka, ke no lo
 olvidej i siempre ke tornej aki ! "  Kon una soriza
de aki finasta aya !
Trokaron las kozas ?  No se !

Saludos
sharope blanko pensando  "ke tontos estos !"

sharope.blanco@gmail.com

http://groups.yahoo.com/group/Sefaradimuestro/  
 

- Copyright © sefarad.org - 1997 - 2017

Retour au site sefarad.org -