Empesamos kon el nombre del Dio

    MENU    
Sefarad
[Karen]
Help us
Retour

EMPESAMOS KON EL NOMBRE DEL DIO


(13 Enero 2009)

Todo en delantre anyos munchos i buenos a todos los ke mos estan meldando.

Muestro amigo Moise Rahmani empeso una aktividad ke tendra muncho profito para el futuro del Judeo-Espanyol. Aki en estos kantones mos reuniremos kon todos los interesados del mundo ke keren prezervar i dokumentar esta lingua de muestros abuelos ke fue la mas grande parte de sus identidades durantes siglos enteros i ke malorozamente por razones politikas, geografikas, demografikas i siguro no mos olvidaremos la modernizasyon, esta en perikolo de desapareser.

La primera koza ke kero dizir es ke ya es tiempo ke mos unisemos en la manera de eskrivir esta lingua muestra. Ya ay dekadas ke este pleto de la grafiya no se eskapa ma yo kreyo ke ay unos kuantos anyos ke ya pudimos arivar a un konsensus, espesialmente todos donde se ve lo mas de eskritas en Judeo-Espanyol: Aki Yerushalayim, Ladinokomunita i El Amaneser. La manera ke eskrivimos es fasil, refleta todos los sonidos ke tenemos i ke ya no egzisten mas en el Espanyol moderno, i no tiene diakritikos, ke komplikarian la vida ke tenemos la mas grande parte de muestros dias en el internet. Si todos azemos un esforso para standardizar muestra eskritura, esto va sirvir para ennalteser el presitijio de la lingua. Una lingua donde todos eskriven a sus manera no es respektada por dingunos. Es por esto ke mozotros en Turkiya, ke tenemos la sigunda mas grande komunidad Sefardi en el mundo desidimos de adoptar esta grafiya fasil i no-komplikada. Auguro ke todos agan la mizma koza.

En estos dias de gerra kuando no tenemos muncho keyf de nada, estamos todos rogando al Sinyor del Mundo para ke mos traiga la paz, este regalo tan elusivo al mundo judio. Kuando no ay paz, la persona no toma dingun plazer de la vida i todo modo de sujeto kaye a la sigunda posizyon. Oy en dia dingunos no keren saver de la kultura, de la lingua o de otras kozas; todos estan pensando a las reperkusiones de estas matansinas ke no se estan eskapando. Yo toda mi vida kreyi en el motto ke dize “Todo lo ke aze el Dio es por bien” i siempre vide ke esto fue djusto. Esto asperando para ver kualo va ser “por bien” de todo lo ke se esta pasando en el mundo oy.

Eskapare este artikolo kon una nota de alegriya. Estamos muy orgulyozos ke muestros amigos Haim Vitali Sadacca i Reneta Sibel Yolak ganaron el primer premio en el Festiladino 2008. Tambien mos alegro de ke muestro koro de chikos, Estreyikas d’Estambol, enkavesado por Izzet Bana, interpreto la kansion ke gano sigundo premio. Komo eskrivi en El Amaneser de este mez: “los Turkanos metieron sus estampa al Festiladino este anyo”. Vos auguro dias de muncha alegriya i yenas de melodias ermozas.

- Copyright © 2001-2013 Moïse Rahmani -