De Vez en Kuando es Bueno de Rovar un Diya del “Felek”

    MENU    
Sefarad
[Karen]
Help us
Retour
De Vez en Kuando es Bueno de Rovar un Diya del “Felek”!

En Turko, tenemos una dicha ke dize “Rovar un diya del Felek”. “Felek” es una fuersa supernaturala ke eskrive los mazales de las personas. Si una persona bive un diya del kual toma grande plazer i este plazer era inasperada i una sorpreza, alora se dize ke esta persona se rovo un diya del Felek, porke el Felek no teniya en kuento este diya maraviyozo para esta persona.
En muestro tiempo, kada uno i uno de mozotros estamos embabukados kon muestros echos, famiyas, kazas ets ets, i ya mos olvidimos lo ke es de azer un keyf, una de las kozas las mas importantes de la vida oriental; lo ke mos da el plazer de bivir; lo ke mos akodra ke estamos en este mundo para tomar plazer de la vida i de sintirla asta la mas chika selula de muestro puerpo.
Espesialmente mozotras, las mujeres emansipadas de la mueva jenerasyon ke en muestra manseves tomavamos a muestras madres a la shuki porke estavan djugando kartas kada diya i no teniyan nada ke azer si no djugavan kartas, no tenemos tiempo ni para tomar reflo! Mos fuimos de una ekstremita a la otra. Agora esto entendiendo ke muestras madres saviyan bivir la vida buena. se alevantavan la demanyana, aziyan el echo de kaza, aparejavan el komer para la noche, i a las dos despues de midi, se vistiyan, se atakanavan, se fardavan i se ermozeyavan i se andavan ande las amigas para el “fikso”; para djugar el djugo de kartas ke era la moda akel tiempo. En enverano, komo las kazas ke se alkilavan por egzempio, en la Ada (izla) eran chikas, se puediya ir a nadar a las 10 de la manyana i kedar en la plaj asta midi, komer un sandvichiko en el bodre de la mar, despues vinir a kaza, azer banyo, vistir, atakanar i de muevo ir al fikso. Ohhh, ke buena vida!
Ama, mozotras, la manseves ke teniyamos las narizes en el aver i ke no begeneavamos nada de lo ke aziyan muestras madres, diziyamos, “Ayyy, ke desgrasia de vida, ke no azen nada estas mujeres!”. Agora, ke mos alevantamos amanesyendo, apenas si komemos un bokado de dezayuno i bevemos un kafe kon adjile, ayde ya mos echamos a las kayes para ir al echo, lavoramos el diya entero, despues vinimos a kaza, ya es aparejar a komer, ya es las lisyones de los ijos, ya es lo ke ay del echo de kaza ke no izo la “femme de ménage”, i despues o mos asentamos delantre de la television i mos kedamos durmiendo o kontinuamos a lavorar si trushimos echo a kaza. Yo me akodro, ke kuando viniya mi papa a kaza del echo la noche, despues de komer siempre era el tiempo ke mos asentavamos a oyir lo ke iva kontar mi madre de lo ke se paso akel diya en el fikso; todos los dedikodus, lo ke kitaron del rey i metieron al vizir, lo ke komyo, lo ke disho la una i disho la otra i ansi pasavamos muy bueno, sin television ni nada. Agora ni dos palavras se dizen marido – mujer; o tienen echo, o ay mach en la television, o ay filmo, i si ay los dos, el uno se va a mirarlo en una kamareta, i el otro se va a la otra kamareta, porke el standard de vida mos se ennaltesio i tenemos a lo manko dos televisiones en las kazas, i asi pasan diyas sin avlar ni tujir... Esto es la vida ermoza, moderna, la vida mijor de la de muestras madres!
Esto todo ke vos konti era la introduksion para lo ke vos va kontar agora. Yo tengo dos amigas, i todas las tres lo tomimos de uzo de “rovar un diya del Felek” de vez en kuando. Komo todas lavoramos i semos de las mujeres modernas ke vos konti ariva, esto mos se fada una vez a los sesh mezes ama kuando ya mos se fada, arekojemos una enerjiya ke mos tura unos sesh mezes mas. A vezes afita ke solo las dos puedemos toparmos i no la tresera, ma yene mos topamos. Mos vamos a un lugar ande ay ermoza vista, ermozo komer i ermoza ambians. Pasamos unas kuantas oras avlando de aki de aya, i siguro en aziendo dedikodu, porke el dedikodu es la savor de boka de la vida, i komemos komidas interesantes i savrozas, bevemos kafikos i a la fin tornamos a kaza kon la kara riendo i akeya noche tenemos muncho de kontar a muestra famiya. Es ansi ke siempre es bueno rovar un diya del Felek. Vo lo rekomendo de korason. Azevos una sorpreza i topa una amiga o un amigo ke tiene la mizma gana vuestra de gozarselo de akel diya i gozavoldo. Si no agora, kuando? Kuando ya no mos esta tomando las pachas? En tomando la manera de bivir del oksidente, mos olvidimos la savor de bivir ke tiene el oriente. Es por esto ke la palavra “keyf” solo egziste en el oriente, es un soplo de ayre del Bosfor, es la golor de un ermozo kafe, es la ermozura de sintir el sol en vuestra kara, es una ermoza melodiya ke vos da ganas de yorar, es la riza de un bebe ke vos arelumbra el korason i es asentarse en un fotolyo repozado i mirar en el aver en no aziendo nada. Esto es keyf, esto es el sintimiento de bivir. Ayde, kedavos un poko i rova un diya del Felek en aziendo un keyf inolvidavle. Salud!

- Copyright © 2001-2013 Moïse Rahmani -