Accueil - sefarad.org

Una komunidad Djudia en la Diaspora 1: Bensyon Pynto

    MENU    
Sefarad
[Klara]
Help us
Retour
Una komunidad Djudia en la Diaspora

Klara Perahya

Kualo es una kommunidad djudia etnikamente i relijyozamente en estado de minoridad en su payis de nasimyento?

Por seguro un grupo de personas fuertemente atadas las unas a las otras por una mizma anksyedad i tambyen una mizma esperansa , todo en no formando syempre un grupo homojeneo en su manera de pensar ni en su vizyon del futuro.

Eternal paradokso humano, aunke afektivamente muy serkanos los unos de los otros, los myembros de una aglomerasyon de djudyos son kaji syempre en estado de litijyo i de kontestasyon resiproka al sujeto munchas vezes de problemas enteramente abstraktos. Un vyejo refran djudeo-Espanyol dize “doz Djudyos, tres Keilot” (dos personas tres ideas diferentes.)

Sean lo ke sean los motivos de disidensya, una komunidad djudia en la diaspora es syempre solidarya , kada uno pronto a koryer para akudir los ke se topan en estado de apreto o de desmamparo.Ansi es muestra komunidad de una solidaridad inkomparavle entre sus komponentes, ma syempre en situasyon de protestasyon

Vos do debasho estas linyas el rezultado de las entrevistas ke tuve la okazyon de realizar kon los 3 ultimos prezidentes de muestra Komunidad.

1)

BENSİYON PİNTO

Avlar de Bension Pinto es un poko avlar de una epoka i de un fenomeno de trokamyento en la mentalidad de muestra komunidad )

Komo es kaji syempre el kavzo de munchas kolektividades djudias del Oriente, la muestra tambyen (aunke muy sensivle a los akontesimyentos de su payiz de nasimyento) era relativamente enserrada en si mizmo, tornada la mas parte del tyempo verso su pasado i sus propyos problemas komunales.

No era indiferensya; a ningun momento muestra komunidad no se despego del destino de su patria i syempre sentia un profundo karinyo enverso eya, ma avia en su manera de pensar un djenero de timidez i un “sentimyento egzajerado de prekosyon” heredado probavlemente de sus antepasados, komo una inkyetud atavika kontra la kuala eya luchava, sin pueder enteramente trespasarla.

Ma, ay de esto mas de 20 anyos, uvo en muestra kolektividad un periodo de indesizyon ke anunsyo des del prinsipyo un trokamyento en la persepsyon de los eventos i una mueva vizyon del futuro...I un dia se vido surjir un mansevo un poko diferente de los otros, temerero, absolutamente franko en su manera de avlar, kon una retorika korajoza i direkta, sin rodeos verbales ni ofemizmos, leshos del lenguaje diplomatiko ke era mas o menos abitual...

Mi defundo marido i yo fuimos los testigos okularyos de estos momentos, eramos muy serkanos de Sonia (z.l.) i Baruh Pinto (z.l.), tia i tio de Bension...Me akodro ke una noche, en una asemblea ande Bension Pinto devia tomar la palavra, mi amiga Sonia partikularmente atada a su sovrino por aliansa, me murmuro a la oreja “ esto tremblando de espanto ,eske la asistensya lo va entender?”, un kuarto de ora mas tadre, se oyo en la sala komo turguelos de aplozos; la asistensya lo avia entendido.

En desparte de su fasilidad a estableser relasyones amigavles, Bension Pinto korye infayivlemente verso kualkyer lugar ande ay un problema o un akontesimyento negativo, pronto a akudir a la mezura de sus posibilidades, komo pushado por un sentimyento imperativo de eternal solidaridad .

Tuve munchas vezes la okazyon de avlar i diskutir kon el, i vos do debasho de estas linyas las repuestas ke resivi:

K.P. Bension, no se si es djusto de empesar esta chika entrevista kon una referensya al ultimo paragrafo de mi introduksyon, ma para mi es un punto de grande importansa... “de ken heredates este insesante menester de akudir kualkyer persona ke se topa en el desmanparo? Probavlemente de la persona ke te metyo al mundo. La mas parte del tyempo ay un djenero de transmisyon afektiva ke la madre realiza desde el momento ande empesa a alechar su ninyo. En todo kavzo,esto segura ke tu propya mujer Eti Pinto intensifiko ainda mas este sentimyento de solidaridad ke se topa en ti. Es ke te puedo demandar de avlarmos a este sujeto?

B.Pinto. De prima vista munchos problemas ke pueden ser rezolvidos paresen ser sin solusyon a las personas direktamente konsernadas, undidas eyas en sus emosyon. Esto lo bivi desde mi chikes i un dia me ize de mi para mi la promesa de ayudar kualkyer persona (de ke relijyon o rasa ke sea) ke se topara en una semejante situasyon.

K.P. Agora avlaremos de la epoka de tu prezidensya . Es klaro ke una grande konosensya de la juridiksyon del payis ande bivimos es absolutamente nesesarya para una perfekta jestyon de una komunidad . Supozo ke tus relasyones de grande amistad kon el avokato Selim Kaneti (de bendicha memorya) ombre de syensya i de refleksyon, tuvyeron una influensa muy pozitiva sovre la reushita de tus 3 mandatos.

B.Pinto: Uvo varyas personas ke me ayudaron muncho kon sus konsejos; mi tio Baruh Pinto i su mujer Sonia (z.l.), kon sus grande enkorajamyento. Elie Perahya, tu marido, ke fue uno de los primeros entre los ansyanos a presentir ke devia aver un trokamyento en la jestyon de muestra komunidad. I enfin (tyenes razon) mi grande amigo, el Avokato Selim Kaneti (de bendicha memorya) ke durante 9 anyos, yo personalmente konsultava a lo menos tres vezes kada semana.

K.P. Ay varyas maneras de konsiderar un mizmo kavzo; ansi penso ke devia ser envezes difisil (sovre todo kuando se tratava de situasyones mas o menos kompleksas) de azer akseptar tu punto de vista a tus kolavoradores i a tu entorno.

B.Pinto: Efektivamente durante los 9 anyos de mi prezidensya, enkontri munchas vezes un syerto reselo al seno de mi komite, partikularmente en el korso de mi ultimo mandato ande tenia 12 opozantes en la meza. Esto djugo un rolo pozitivo en la reushita de mis mandatos... diskutiamos sin prejuisyo i teniamos largos kambyos de ideas asta ayegar a un verdadero konsensus... Komo ya lo savesh, un grande filozofo fransez avia dicho ay de esto kuatro o sinko siglos ke “del golpe de ideas sale la luz”... Devo tambyen dezir ke, en semejantes sirkunstansyas, mi primer konsejero era (Alava Shalom) Henri Yaşova.

K.P. Es ke enkontrates en muestros korelijyonaryos una kualkyer retisensya a afirmarsen en varyos kampos de aktividades otras kel komersyo o ke las kareras liberales?

B.Pinto: Raramente “si”... En todo kavzo, personalmente yo so partizano de una mas grande avyertura de muestra komunidad al grande publiko, lo ke me esforsi de espesifikar en mi livro, debasho la denominasyon “Geniş Toplum”.(el grande publiko) Ya se ke munchas personas me kritikaron, ma yo mantengo syempre esta mizma idea .

K.P.Durante la epoka Otomana las komunidades minoritaryas (espesyalmente la muestra) eran konsideradas komo “entidades protejadas”, lo ke las metia en una pozisyon de eternal devdores...

B.Pinto:A mi pareser, la komunidad djudia no fue solo uno de los pedasos de la Mozaika Otomana, ma uno de los elementos del immenso bloke de marmol ke era el Imperyo.Los fragmentos de una mozaika pueden salir de sus lugar, ma no los de un bloke de marmol. En 1492 el Imperyo Otomano avia resivido kon brasos avyertos muestros leshanos avuelos ekspulzados de Espanya. En 1941/42 durante la segunda gerra mundyal, la Turkia resivyo (syempre kon brasos avyertos) muestros korelijyonaryos i mizmo los ijos de muestros korelijyonaryos ke tenian un pasaporto Turko... i munchas vezes (kuando era posivle) varyos savyos de raiz djudia ke no tenian la sujestyon Turka fueron ansi salvados de la muerte.

K.P.Tus relasyones kon varyos dirijentes de Turkia fueron ekselentes ansi ke muy amigavles i tengo la sertitud ke munchos de entre eyos te apresyan syempre muncho. Ma de otra parte segun el rezultado de varyas enkuestas, una muy grande partida de la populasyon Muzulmana no konose verdaderamente sus konsivdadinos djudyos... Es ke oy tambyen semos konsiderados (tal ke era el uzo en la era Ottomana) komo “simples protejados”? Ke puedemos azer para dar a muestros konsivdadinos muzulmanos un imajen mas real i mas favoravle?

B.Pinto: Desde mi manseves ize parte de diferentes Institusyones Nasyonales komo por egzemplo la “Sanayi Odası” (Kamara de komercho). Tuve ansi la posivilidad de azerme amigos muy presyozos, loskualos okuparon ulteryoramente postos superiores en el Governo i kon los kualos guadri un kontakto muy amistozo. A este propozito, devo espesifikar ke en mis relasyones kon ken ke sea, me guadro syempre de tener un lenguaje ekivoko; so syempre partizano de una absoluta lealdad, komo tambyen de una total derechedad.

K.P. Tengo la konviksyon ke uvo faktos muy interesantes en el periodo de tu prezidensya, muestros lektores seran muy kontentes de oirlos de tu propya boka.

B.Pinto: El evento ke me marko por syempre fue en el anyo 2003 los dos asaltos terroristos kaji simultaneos, kontra el Neve Şalom i el Kaal de Şişli. Yo me topava en estado de orasyon en el Midrash de la sinagoga de Şişli, kuando se produzyo la desgrasya i (komo munchos de los yahidim) fuyi por la puerta de detras. Ansi vide kon mis propyos ojos, en toda su dimensyon, la oror de la situasyon. Tengo la konvinksyon ke esta imajen kedara syempre gravada en mi esprito.

K.P. I por konkluir, una kestyon muy indiskreta: Asumites durante un largo tyempo la prezidensya de muestra kolektividad, lavoro ke tuvites el merito de kumplir de una manera briyante ...ke fue tu estado de umor despues de aver akavado tu ultimo mandato?

B.Pinto: Bendicho el Dyo, los myembros de la kolektividad djudia de Turkia no se olvidaron de mi, i kuando tyenen problemas vyenen demandarme konsejo i mezmo (en kavzo de menester) ayudo, lo ke me rekonforta m

-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-

- Copyright © sefarad.org - , 1997 - 2017

Retour au Site sefarad.org

Loading