Accueil - sefarad.org

Una komunidad Djudia en la Diaspora 3 : Sami Herman

    MENU    
Sefarad
[Klara]
Help us
Retour
Muestro Prezidente aktual

Sami HERMAN

Sami Herman syendo el Prezidente de muestra Komunidad aktualmente en funksyon,me es, en este momento, imposivle de azer una verdadera analizis de su jestyon global, la kuala se anunsya ekselente i muy rasyonal en sus desizyones.

Es la razon por la kuala me limiti a formular kestyones a las kualas el respondyo kon muncha amabilidad.

K.P) Kerido Prezidente Sami Herman, ay mas de 30 anyos ke te konosko, desde ke eras myembro aktivo i mas tadre prezidente de “grupos de mansevos” en los kampos de la kultura, byenfezensya i echos komunitaryos ets... Kedates syempre el mizmo, seryo ansi ke amavle, muy aktivo en tu lavoro, diskreto ma nunka indiferente, komprensivo en la vida sosyal, fasilmente abordavle, avyerto “al otro” i la oreja syempre tendida verso tu interlokutor...

Elie (mi marido) me dizia munchas vezes “veyo espuntar un futuro prezidente”... Es la razon por lakuala te rogo de avlarmos lo mas anchamente posivle, de ti, de tu chikez, de lo ke te pusho kaji immedyatamente despues la adolesensya a entrar en la aktividad komunitarya, de tus proyektos de 30 anyos antes, a esta edad ande el adolesente se syente devenir un ombre responsavle.

S.Herman. So la tresera kriatura de una madre i un padre partikularmente amavles. Nasi en el anyo 1950 i asta la edad de 9 anyos tuve una vida yena de alegria. Ma en 1959 pedri mi ermano “Selim” aedado de 20 anyos, estudyante en segunda klasa de “indjenyeria” en la Universidad Robert Kolej, a la sigida de un terrivle aksidente durante “kursos i praktikas” ke el azia en una fabrika.,

La muerte de Selim undyo la famiya entera en una total dezolasyon. El era un joven partikularmente intelijente, kon una verdadera personalidad de Lider i se avia echo remarkar en varyas organizasyones de manseves de muestra komunidad asta devenir prezidente de munchas aktividades.

Su interes por la komunidad i su lavoro sosyal me influensaron profundamente i syempre me esforsi de realizar lo ke el no tuvo el tyempo de kumplir. Es probavlemente la razon por la kuala senti tambyen el mizmo sentimyento de solisitud ke el enverso muestra kolektividad i el dezeo de meterme a su servisyo; esto me pusho desde la edad de 18 anyos a lavorar en munchas asosyasyones afin de pueder a mi torno realizar kozas pozitivas.

Tuve ansi la okazyon de asumir diferentes postos durante largos anyos. Me ambezi munchas kozas, konosi munchas personas i senti una grande alegria de lavorar en el espasyo komunal. Puedo afirmar ke kon todo lo ke eya me ambezo, resivi personalmente mucho mas de lo ke yo pude dar a la Komunidad.

K.P. Ke sinyifika para ti la prezidensya? Una responsabilidad difisil a asumir, espesyalmente en estos tyempos kaotikos ande mos topamos? el dezeo de propozar un muevo "plan de aksyon "pozitivo i realizavle? O byen (lo ke no kreo) la simple satisfaksyon de egzersar esta “voluntad de potensya” ke se topa, (a niveles diferentes) en kada persona?

S.Herman. Kada shefe de grupo yeva en el, la vizyon de un muevo proyekto ke el espera realizar, i tambyen dezea topar el medyo de rezolver de la mejor manera posivle, los problemas ke kontinualmente aparesen. Esto es realizavle partikularmente kuando se tyene el apoyo de la grande mayoria de los kolavoradores.

Anyos antes, partisipi a las aktividades de la Komisyon del Budjeto Komunitaryo, kon el defundo Elie Perahya ke me influenso muncho kon su manera de pensar . Ansi tuve la okazyon de ir kon grande frekuensa a vuestra kaza, lo ke me permetyo de meldar las “ermozas dichas filozofikas de diferentes eskritores”, ke se topan enkuadradas sovre las paredes de la entrada de vuestro apartamento. Una de entre eyas sinyada por “Rabindranath Tagore” me avia muncho impresyonado.

“Durmia i vide en mi sonyo ke la vida era alegria
Me desperti i vide ke la vida es servir
Servi i entendi entonses kel servisyo es alegria.”

Es ansi ke syento una enorme kontentes de ser util a muestra kolektividad i so seguro ke todos los ke lavoran en varyas Ovras karitativas resyenten la mizma koza.

Partisipi durante largos anyos a la aktividad de diferentes asosyasyones djudias, lo ke me permetyo de konoser los sujetos i la manera de lavorar de muestra komunidad, eksperyensa ke me fue muy util kuando me propozaron el posto ke okupo oy en dia.

Kuando vyene la ora, i ke la persona se syente pronta a enkargarse de la responsabilidad ke le demandan de asumir, es una immensa felisidad de pueder dezir “esto a vuestro servisyo” a los ke durante lungos anyos vos tomaron entre eyos, vos formaron i vos dyeron los prinsipyos de baza para azer adelantar mas i mas muestra kolektividad.

K.P. Ya se ke a kada epoka, segun la situasyon del dia, kada muevo prezidente tyene en kavesa un programa muevo a propozar . Es ke puedo demandar kual es el tuyo?

S.Herman. En el periodo aktual, muestro objetivo de baza es una re-organizasyon i un aumento de los revenidos de muestra komunidad.

Muestras posibilidades de aumentar los revenidos egzijen esforsos nesesaryos para reorganizar las institusyones aktuales segun las egzijensas de muestro tyempo i aunar si es posivle “institusyones semblavles entre eyas” lo ke va asegurar una grande ekonomia en los gastes i tambyen una produktividad mas ancha.

Visto las difikultades kon laskualas se topa aktualmente enfrentada la klasa ekonomikamente flaka un apoyo del eksteryor se aze munchas vezes sentir de una manera imperativa en el kampo de la edukasyon de los ninyos i adolesentes, komo tambyen en el de la salud i de la vejes.

Es la razon por la kuala, en el buto de kontribuir a solusyonar semejantes problemas sosyo-ekonomikos de muestra kolektividad, tomimos la desizyon de fokalizar una partida de muestra aktividad sovre este sujeto i de aumentar muestros esforsos en konsekuensa.

K.P. Es ke (en la situasyon prezente, kon su kriza ekonomika al pareser insurmontavle i las diverjensyas de opinyon sovre varyos sujetos) se puede realizar kualkyer koza de realmente pozitiva para asegurar, komo lo dezeas, un mejor futuro a las jenerasyones a venir?

S.Herman . Por seguro . En diminuando los gastes ke no son de primera nesesidad, pensamos enforteser i enrezyar los ke son indispensavles i ansi optimizar muestro budjeto en la mezura ke es posivle.

Oy en dia la mayor partida de las entradas de muestra komunidad se kompozan de las donasyones ke mos son echas. Pueder asegurar revinidos estavles kon kuentos koryentes i lokasyon de byenes immobilyaros seria ideal.

Muestro eskopo es de valorizar las propriedadas komunitaryas i mizmo komo segunda posibilidad, si es nesesaryo, aunar varias asosyasyones, lo ke (sin prejudisyar sus aktividades) amenguara los gastes, afin de pueder responder mas anchamente a nesesidades de urjensya i render mas grandes servisyos sosyales, tal el adelantamyento de las jenerasyones futuras.

Los myembros de muestra Komunidad dyeron syempre la prioridad a la edukasyon de sus ijos i ijas. Eyos se esforsaron syempre de asegurarles una instruksyon rezya i de buena kualidad afin de mijor aparejarlos para el futuro; uno de muestros grandes dezeos es de ayudarlos.

K.P. Muestra epoka mos rezerva kada dia, eventos muevos ke egzijen de un “shefe” una adaptasyon immedyata, penso ke deve ser difisil de enfrentarlos espesyalmente kuando se tyene la karga de una komunidad eya mizma dividida en su manera de konsiderar las kozas, los unos tradisyonalistos, kalmos i arresentados, los otros mas impetuozos en sus kuesta de un futuro mas moderno... Ke azes en semejantes kavzos?

S.Herman. Es perfektamente normal ke los myembros de muestra komunidad tengan opinyones o esperansas diferentes, esto es tambyen una rikeza i la prova de una grande vitalidad.

El dever de los dirijentes es de ser de mas a mas en kontakto kon eyos, de oyirlos, mirar de entenderlos i bushkar los elementos komunes ke se topan entre los diferentes puntos de vista afin de pueder ayegar a una syerta koezyon i mizmo a un syerto konsensus.

La mejor manera de servir la kolektividad es djustamente de konoser sus aspirasyones i menesteres.

K.P. Ke dizes a propozito de este enorme problema ke se abatyo sovre el mundo kon la operasyon wikileaks? Es ke una transparensya absoluta es posivle? Es ke en kada individuo kual ke sea “ombre de estado” o byen “simple sitizano” no ay espasyos personales de refleksyon ke deven ser respektados en sus intimidad?

S.Herman: La transparensya es por seguro una kualidad muy presyoza i pozitiva kuando eya se mete al servisyo del interes publiko i de las valores demokratikas komo la klaredad i la estabilidad, a kondisyon por seguro de situarse entre syertas limites.

Esto dicho, devemos akseptar ke las varyas solusyones por un mizmo problema, pueden ser personalmente diferentes.

Meldamos i oyemos kontinualmente las novedades del dia o de la semana en las gazetas i en diferentes otros medyas. Segimos munchas vezes lo ke dizen varyos komentadores eksperimentados afin de mijor entender la situasyon global, ma envezes devemos konfesar ke enkontramos interpretasyones de un mizmo evento ,diametralmente kontraryas las unas de las otras.

De la mizma manera, personalidades del Governo, diplomatos ansi ke sus kolavoradores pueden tener, en desparte de las notisyas ofisyales konsernando syertos enkontros, opinyones i apresyasyones personales. La vulgarizasyon de estas refleksyones subjetivas pueden munchas vezes krear situasyones dezagradavles. Las egzijensyas de la vida i la sinseridad no se topan syempre en estado de konkordensya absoluta.

Konsernando el kavzo “Wikileaks”, el es una koza muy risyente i se dize ke solo uno por syen hue vulgarizado. Es por esto ke no se puede ainda dezir si es profitavle o danyozo.

K.P. Es ke pensas ke la mundyalizasyon, esta meskla de kriansas umanas diferentes las unas de las otras, kada una kon su pasado, sus kreensas i konsepsyones, puedra un dia omojeneizarse i dar en el futuro rezultados pozitivos?

S.Herman: La posibilidad de viajar i konoser varyas populasyones i kulturas mos permete de ver ke en munchas sivdades kosmopolitas, personas de rasa, kolor, relijyon, nasyonalidad i tradisyones diferentes reushen a bivir serka las unas de las otras de una manera bastante armonyoza, komo en las Universidades i tambyen los medyos de negosyo o sosyales, ande mujeres i ombres, kada uno kon su propya individualidad, parvyenen a lavorar endjuntos.

Las diferensyas de orijen no empiden la posibilidad de formar ekipos de lavoro; munchas vezes mizmo estas diferensyas konstituen una rikeza.

Los ke parvyenen a entender ke “la diferensya de orijen no es un impedimyento ma un avantaje” partisipan al desvelopamyento de las valores umanas. Esta manera de ver kontribue igualmente a revitalizar las investigasyones syentifikas i teknolojikas ansi ke la produktividad en ke kampo de aktividad ke sea.

Si en muestra kavesa parvenemos a konsiderar las diferensyas de orijen i de kultura de una manera pozitiva, komo un faktor de adelantamyento, aparejamos entonses un terreno komun muy konstruktivo. Es la razon por lakuala, penso ke kuando personas de orijen i kulturas diferentes se enkontran kon frekuensa, eyas se ambezan a mijor konosersen, lo ke krea inevitavlemente una syerta omojeneidad i un seguro faktor de progresyon i de armonia..

K.P. Mi ultima kestyon: Ke djenero de komunidad dezeas deshar despues de tu mandato?

S.Herman: So konvensido de la importansa de utilizar de una manera provechoza el tyempo i de azer sin tadrar lo ke deve ser echo.

“No tomar o no pueder tomar una desizyon, deshar al tyempo la karga de realizar lo ke deve ser echo immedyatamente” es una manera de fuir de muestra responsabilidad i de muestro dever.

Los dirijentes deven sin tadrar meter a egzekusyon las propozisyones bazadas sovre analizes i solusyones djustas i egzaktas, despues de aver resivido el konsensus de la mayoria.

Mis kompanyeros de lavoro i yo tenemos dos objetivos primordyales: 1) Mostrar i provar a las jenerasyones mansevas i a todos los myembros de muestra Komunidad ke la ensenyansa relijyoza, istorika i kultural puede akordarse kon las valores aktualas i ke son transmisivles, lo ke va asegurar una syerta kontinuidad..

2) Desvelopar (kon una estruktura komunitarya moderna) muestras institusyones afin ke sus servisyos sean lo mas provechozos posivle .

K:P: Mersi Prezidente Herman

-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-

- Copyright © sefarad.org - , 1997 - 2017

Retour au Site sefarad.org

Loading