BLOG - sefarad.org

Haim Vitali Sadacca

El Peshkador

    MENU    

SEFARAD.org

INDEX - Haim Vitali Sadacca
[POEZIAS]
PRECEDENTE Page

AIDEZ-nous

El Peshkador

La peshka era mijor ofisyo en su vida,
Kon luvya i mismo kon tempesta el se iva
El bivir dependia de esta vida dura,
Se entendia su fatiga de su figura.

Una tempesta empeso...era de largura,
Tres ninyos i su esposa eran de amargura.
Kon sus miradas le dezeavan buena suerte
En rogando a ke kalme akel ayre fuerte.

Una lampa flaka alelumbrava sus karas,
Se via sus penas en akeas ondas varas.
Sus suspiros abatian las ganas de bivir,
No ay sinyo de su buelta,kuando va vinir?

Tempestas ,relampagos,el mundo se undia,
Bruidos fuertes i turguelos se sintia.
En la kabana un silensyo komo de luto,
Rogavan de alma a ke kalme el tiempo bruto.

Ocho ojos en la ventana kon dezesperos
Lo esperavan kon sombayos verdaderos.
Supito de leshos vieron al ombre kerido
Su kaminada kansada,komo un ferido.

Las alegrias i sus kerensyas en la alma,
Lo abrasaron kon sus lagrimas ke no kalma.
Era entero mojado,tremblando del frio
Triste i abatido en su figura no brio.

"Pasi oras fuertes" le dizia a su espoza,
Nunka me tengo rankontrado kon esta koza.
La mar estava tanto furiosa i salvaje
Ke me sinti medyo bivo,medyo muerto kaje.

Un sielo preto,tanto oskuro,sin luna,
Mi barko flako aryento de esta fortuna.
Kuando me via en el sielo,supito en pozo,
Unas nuves terivles,un tiempo muy espantozo....

Tuve un ayudo del Dio,unos me travaron
Sali a una isla,de murir me salvaron.
En la baraka avia fiesta komo antes
Se sintia sus rizas kon sus ermozos kantes.

Haim Vitali Sadacca
Montreal

- Copyright © sefarad.org - 1997 - 2017

CONTACT

Retour au site sefarad.org -