BLOG - sefarad.org

Haim Vitali Sadacca

Korason de Oro

    MENU    

SEFARAD.org

INDEX - Haim Vitali Sadacca
[POEZIAS]
PRECEDENTE Page

AIDEZ-nous

Korason De Oro

Un ombre prove sono la puerta de un aedado,
Tenia ambre keria salvarse de su estado,
Este vyejo de buen korason estuvo muy tokado
Partajo su alegria,su bevyenta i su bokado.
Lo arto,lo abrigo por salvarlo del frio fuerte
Kontente de verlo un poko aleshado de su suerte...

*****

Pokos dias despues el ombre kon las manos atadas
La polisia lo trusho,sus miradas amatadas.
Verguensozo delantre de akel ombre aedado,
Ke lo avia artado i vistimienta dado.

*****

Estava akuzado por kulpa de aver rovado
Platas de esta kaza ke el avia vijitado.
Kuando la polisia amostro las kozas rovadas,
Se enkanto de ver akeas platas kaje olvidadas.

*****

Seniores todo esto se los di yo komo regalo
No akuzesh este prove kon un akto tanto malo.
Su estado me avia echo pena,kije ayudarle,
El dinero de estas kozas puedra una mano darle.

*****

Dezataron las manos en el ombre lagrimas se via,
Estava komo akel muerto ke se arebivia.
El vyejo kon miradas amargas i lastimozas
Komo kerer dizirle: Porke izites estas kozas ?

***** La polisia se espartyo kon miradas enkantadas
Lo avia atorgado ke las platas eran rovadas.
El ombre yoro fin la manyana por su negro destino,
El vyejo enrikesyo su korason kon el jesto fino.

*****

El akto del filantropo en ningun korason kavia ,
Kreyiya al regalo de los sielos ke lo sostenia .

******

Haim Vitali Sadacca
Montreal

- Copyright © sefarad.org - 1997 - 2017

CONTACT

Retour au site sefarad.org -