Accueil - sefarad.org

Tantine

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
 
Shavua Tov !
Semanada de Luz i de Alegriyas ermaniko !


Kerido Yehuda,

Tu titia Sidronia Z"l me akodro mi Tantine,
Alice Camhi Z"l, ermana chika de mi muy kerida
Granmamika maternal Claire Camhi de Monastir.

Se muryo muy manseva a la edad de 38 anyos.

Tu titiya Sidronia Z"l era komo una tresera
aguelita por seguro ! Komo te komprendo
Yehuda... Mi tantine Alice Z"l, ermoza de
las ermozas ma enklavada a su kanton porke
era paralizada dezmazaladika i un angelo de
persona kon su immensa buendad, edukasyon
i diferentes talentos, mos dava a mi mamita
i a mi konsejos komo los de titiya Sidronia !
Era chika yo kuando se muryo.... Teniya unos
10 anyos no mas... Kon mi kavesa de oy iva
eskrivir todas las perlas ke kitava de su boka !

Lo mas interesante es ke en su kondisyon de
mujer manseva, muy muy ermoza NUNKA se
kesheva ! Inkreyivle ! Ke vida teniya en
su kanton en el salon ? Sin pueder kaminar,
asentada komo una kukla ! Jente viniyan a
vijitarla kada diya.... Munchas personas
de todo los serklos. La adoravan ! Doktores,
ministros, profesores, vendedores de flores,
todos los ke vendiyan frutas i kozas del
merkado, amigitas i amigos, membros de la
famiya por seguro, vizinos, artistos,
jurnalistos.... Su salon era renomado i era
un privilejio de azer partido de su serklo !

Tantine era lo bueno mio i de mi mamita.
Su mosa Melek era komo una aguelita para mi !
Adorava asentarme ensima de sus piernas al
mupak i komer sevoyas dulses ke le embiyavan
de su puevlo kon pan fresko untado al sal !
Melek ke sinyifika angelo en turko era el
angelo verdadero ke Di-o le embiyo a Tantine
en su estado i eya diziya kon grande emuna
"El Di-o nunka aharva de todas las partes,
tengo muncha suerte de bivir komo una reyna,
tanta amada i regalada por todos i Melek,
ke no me manke, es la luz de mis ojos i la
koza la mas ermoza ke tengo en mi vida !"
Vedra ke Melek teniya una karika de angelo
i grandes grandes ojos blus ke miravan kon
una dulsura inkreivle .... La mirava a
Tantine i se okupava de la kaza i del gizado
de la mijor manera ke puediya ser.
Tantine se divertiya a azer kuklas kon
handrajos i saliyan maraviyozos ! Eskriviya
kon sus manikas tuguertas... No se ke izyeron
de todo lo ke eskrivyo !!! Ke pekado ke no lo
tengo i no se de ken demandarlo....

La vida.....

Sharope blanco


B"H


Shalom!

Kerida Sharope

Otra vez yori a meldar tu letra sovre tu
Tantine Alice Camhi  Z"l.  Oyir kozas sovre
una persona de grande korason i savyedura
me plaze muncho.  Penso ke las personas de
"al tiempo"  teniyan un mas grande korason
i no teniyan tanto egoizmo.  Oy veygo ke ay
buenas personas ma no tenemos tantos kontaktos
kon eyos porke no savemos ken son i si son
buenos o malos.  Mos kedamos kon muestros
amigos de siempre i los ke konosemos de serka
sin empesar muevas amistades komo antes.

Yo ya empesi a trokar de ideya en meldando las
letras de SM.  Me azen alegre.  En vezes yoro
i en vezes riyo porke topo buenas personas ke
son vedra komo tu, el Rav Charles B. Abraham
i todos los otros.


-----------------------------------------

Kerido ermanito.....
Yo penso las mismas kozas, komo tu,
en meldando muestro foro kon personas
maraviyozas ke konosko de sus eskritos
i personalmente tambien.  No te estas
yerrando mi keridito...SM  es un lugar
de vedra muy espesyal i ay muncha amistad
i sinseritad en eya.
El Di-o mos esta embiyando korasonikos de
oro komo el tuyo !... Los otros ni se aserkan !
No toparan interes en muestras valores,
muestra manera de ver la vida, se burlaran
de muestra sinseritad, no seran kapaches
de azermos sintir esta amistad ke mos
arekoje en el mijor kantoniko del WEB !
Vana vinir a mozotros avagar avagar los ke
mos asemejan.  Pokos i eskojidos digo yo.

SM  es Amor !
Tu dizes es Sinseritad i Maestriya....
SIIIIIIII   ESTO TAMBIEN !


<sharope.blanco@gmail.com>
http://groups.yahoo.com/group/Sefaradimuestro/
 


 

- Copyright © sefarad.org - 1997 - 2017

Retour au site sefarad.org -