Accueil - sefarad.org

Vos kontare los djugetes

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

VOS KONTARE VOS KONTARE ....


 

VOS KONTARE.. VOS KONTARE .....


 

1.  LOS DJUGETES

 

 

Yo tengo selos !  No Has ve Halila selos de lo bueno
de los otros. Grasyas al Di-o no me interesa del todo.
Puedeser porke tengo todo lo ke topo nesesaryo por

una vida repozada i lo ke veygo en mi kaza me agrada....
Miro las flores, la verdura, mis animalitos...

Ay Tobi, el ke me mira de arriva del palo alto ande
enkolgo  mis chantas, un pantalon de akel diya, una

esharpa..... Ya entenditesh de kualo avlo !  Yo lo
yamo "Adam".   Benadam no puedeser porke no tiene
alma.  Benpalo tambien no puede ser porke  no lo paryo
un palo. Alora solo "Adam".  Es el uniko  "Hombre" de mi

kaza kuando, ke no me manke, mi ijo no  esta aki.

 

- Tobi es el perriko blanko ke me trusho mi ijo antes
munchos munchos anyos. 

 

- Tengo "creamy" ke  es el lonsiko
savrozo ke se echa kon mi. 


 

 

- Ay Felisya, mi gato blanko, asentada ensima de su
kavesal enfrente de la puerta d'entrar i munchos otros
ensima del raf (etagere)

 

Ke azen dia entero ?  Dedikodu ! (Commerage !) 

Me kitan ! Me meten !

 

Por la gente son djugetes. No para mi !  Azen partido
de esta kaza i de mi vida.  Les avlo, les konto, los
abraso....i a vezes les grito todo lo ke no puedo gritar
a los otros. Ma dospues todo se olvida i somos amigos

de muevo...I....no kale olvidar mi "lazy boy" ke es mi
fotolyo el mas konfortable del mundo !  Komo se puede
bivir sin un "lazy boy"  no me lo kero ni imajinar ! 
Barminan ! M'asento, durmo, komo, eskrivo, penso, do

lisyones (lavoro) ensima d'el.  Me "echo en sus brasos"
i so la mas oroza del mundo !

 

Papeles i kalemes... i todo esta justo para bivir...


                    

2.  ESKRIVIR I SHESHBESH (tavli) - Backgammon -


 

 

 

Vos estava kontando ke tengo selos !  Komo no ? !!!
Ay personas ke pueden i saven eskrivir kon bruido
kon la TV, personas ke avlan en kaza, el bruido
de la kaye, el telefon ke sona... la puerta....

Miliun "nada" ke te "arranka" a lo ke estas azyendo !
Yo no puedo ! Me se vazya todo en la kavesa !
Por esto prefero eskrivir de noche.  Mas tadre,
mas ermozo ! 

 

Agora esto dando razon a siertos eskritores ke se ivan

" a la ida del Dio " para "kitar" sus livros. Puedeser
i yo kale ke me vayga ande  "ni gayo kanta ni perro
grita "!  Alora me ago i yo eskritora eh ?

Muy shik de dizir  "Moro en X u -un djehennem koy-

(kazal ande se arapa el guerko)  para eskrivir letras
a SM! De pishar de la riza !  No....seryozo agora !
Komo ke los eskape mis livros si tengo el tino en
jugar sheshbesh (backgammon) en el Yahoo del internet

de la komputadora de mi kamareta ? !!! 

 

Esta komplikado...Si.  Tenesh razon ma no es mi kulpa
si la teknolojia lo fraguo ansina !

 

 

Estava dizyeno ke esto jugando tavli...Ayyyyy ke me

namoro yo para este djugo !  No es shakas lo mio !
Ay 4 anyos ke esto lazrando para tener un "rating"
(puntos) komo se deve !  Grasyas al Dio ya lo allogri !
Esto djugando en ligas.  5 Ligas egzaktamente ande se

azen torneos siempre.  So una jugadera fuego !
Dayinda no tengo un numero en los mijores del mundo
para este djugo ma ya me muero ke me kero ir a
los "opens" en Las Vegas.  Deke no ?  Un poko de
mazaliko i yo sharope, me asento al numero 1  !

Ken save....Si Dio lo kere todo sale...No es ke so
mas bova del primer del mundo ! El ombre ke me regalo
el fostaniko me disho ke so intelijente !  Si lo
disho es ke es vedra !  Para kualo ke diga mintiras eh ?


 

 

                      
3.  RIYIR I YORAR

 

 

Ayyyyyyyy  ke kadar ke me plazyo kuando me disheron
ke una dammika  telefono para dizir ke se eskarinyo
de mis eskritos porke se riye disho !...

Ke riyga siempre ma no se porke s'esta riyendo ! 
Yo so seryoza persona !  No eskrivo por riyir ma
parese ke sale ansina.... Mas mijor :) I a mi me plaze
muncho riyir. 

 

Ay filmos ansina de riyir muncho ! Me tresalgo yo por

eyos...En vezes todos se kayan i solo yo rio....
Dospues me averguenso ! Ma mijor de yorar ... No ? 
Un dia me afito ke me fui a un filmo i fue el kontraryo !
Estava la sola a yorar en el sinema.  Deke no se...

La djente no tienen mas apiyadad parese ! Sus korasones
se izyeron piedrizikas del bodre del mar  ! El mio es
muy blando porke me yamo sharope blanko, deve de ser,
komo este asukar ke venden en los sirkos i en los parkes

ande se van las kreaturas.  Akeya koza grande  de sukar
en el palo !  Me namoro !  Solo ke pormodo de esto yoro
mas de los otros i rio mas fasilamente.

 

 

Riyir es kolay ma ke azesh kuando yorash i vos olvidatesh

la rida en kaza ? Mil guerkos del ginnam !  Murir de
soflamas !  Ya me tiene afitado i mijor no pensar en
esto !  Agoro siempre kontrolo si tengo una rida antes
de salir de kaza !  La djente kontrolan si tienen el

telefon de aldikera !  Estos telefonikos chikitikos ke
entran afilu el la aldikera de la kamiza !
Ke ermoza de koza ! Yo me iva merkar ma no tengo kon ken
avlar afuera ! Alora... Para kualo ?  Mirar lo i
inyervarme porke no sierve a nada ?  Avlo kon el telefon

de kaza si tengo de menester i punto !

 

 

4.  HAYIM VITALI SADACCA  I  DR. BEKI BARDAVIT

 

 

Ayyyyyy  no vo los dishe dayinda ?  So loka de
no aver kontado una koza tan importante !  Los

konosi al sinyor H. Vitali Sadacca, el maestro
de las poezias en ladino i su kerida mujer la
sinyora Janet Sadacca.  Vide sus eskritos en
letras rashi i me empresyoni muy muncho.  El
sinyor Sadacca eskrive en Rashi komo estenografia !


 

 

Estava envitada ande eyos i estavan aya la sinyora
Doktora Beki Bardavit i su espozo.  Komo me plazyeron !
Estuve enkantada de konoserlos...No solo me plazyeron,
los kije bien de los primeros puntos !


 

 

Yo so ansina...Kero bien del empesijo o nunka !
En vezes sale personas kon ken no me siento bien
alora prefero no inkontrarme mas kon eyos...
Muy raramente afita ke los kero tanto bien ke no veygo
ke no valen la pena del todo !


 


No embarasa...Torno a mi lugariko i ago komo si nunka
egzistieron !  Siento el pezgo en mi korason por
un sierto tiempo porke a dingunos les plaze yerrarse
ansina !

 

Ya avli bastante... 4 Partidas !  Es ke yo no se

kedarme kuando tengo el kalemiko en la mano.
Espero ke no vos enfasyi kon todo lo ke dishe i ke no
inche ni una avyanika !  (Yo no lo penso ansina !)
Ke seyga !  Ya lo se ke me keresh bien i vos plaze
ke vos konte ansina...kuentizikos !


 

 

Lo mas importante es meldar en muestra lingua i
akodrarse de palavras o ekspresyones ke mos se fuyeron
kon el tiempo !

 

Bezikos i abrasos a mis amigas
i mijores suhetos a los ijikos


 

 

sharope blanko

- Copyright © sefarad.org - 1997 - 2017

Retour au site sefarad.org -