Accueil - sefarad.org

Buyukada, la perla de la mar Marmara

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

B U Y U K A D A
 
LA PERLA DE LA MAR MARMARA
 

Vos esto yevando a munchos anyos atras,
a las enveranadas de los anyos 50, 60 i 70
ke fueron la epoka la mas brilyante de todas
las islas por modo de la kultura, de la
rikeza i del buen gusto de la djente ke
se ivan a morar en eyas por 3-4 mezes, kuando
las eskolas se serravan fina ke se avriyan
de muevo.

http://www.istanbulinfolink.com/photo_gallery/photo_istanbul/photo_34_buyukada.htm

Vos kero eskrivir por empesar sovre las madres i
las ijas ke se asentavan en los kafes del debarkader
de Buyukada para pasar el tiempo kon las amigas i
brodar akeyos manteles i savanas de una inestimavle
valor para los ashuares de las novyas.
 
*
 
Para el ke kere saver  :
El triko(t) es el lavoro ke las mujeres azen
kon dos shishes (algujas muy largas de
maz o menos 30 sentimetros, a vezes delgadas
a vezes godras (asigun el model del lavoro),
por kitar en medyo una jaket, una bluza,
kalsadikos para bebes, un shal o un kashkol
o un ermozo sveter para el ijo o el marido !
Se uzan ilos de koton, de lana o sentetikos...

Yo me namoro de ver estos "chiles" de kolor
biva en las vitrinas de siertos magazenes.
(Las "chiles" de lana se aziyan pelotas antes
de empasar a trikotar)
En Istanbul, lo mas son magazenes chikos entre
las kalejas...no son modernos i grandes.
Chikitikos i sempatikos.. Se puede ver polvo
en los rafes porke el vendedor ya'sta viejo
i kansado...la vida....Un sefertasi en un kanton.
Komidika ke le aparejo su spoza viejizika kome el.
Vende "tuhafiye" tambien, (Bonetterie en fransez)
ke es kalsaz, botones, chamashires (vistimyenta
debasho de los vestidos) alfinetes i kopchas
(hooks en ingles) fermuar (zips en ingles)
Nada moderno ! Magazen de " al tiempo" ....
son muy pokos porke kaji dinguno kere mas
"trikotar " (azer triko en kaza) Oy-en-diya
ay lo mijor, lo mas moderno i bastante barato.
Las mujeres merkan "pronto". No kuzen o trikotan
an kaza (ke pekado). Antes las mujeres adovavan
afilu las kalsaz de las kreaturas o del marido
en kaza...

Aziyan "yama"/aremendura...Tomavan para esto
un pedasiko de ropa i lo kuziyon ande la kalsa
estava arrazgada. Ke luzyo esto ! Envezes las
kalsaz no estavan muy arrazgadas. Alora se aziyan
"repriz"... kijo dizir tratavan de kuzir el
lugariko sin ke se veyga muncho, kon ilikos
asemejantes i kon muncha atensyon. Ke mujeres !


" Trikotar " era bueno para los inyervos !
ansina diziyan ! Aziyan esto muy muy presto..
komo makinas ! i avlavan entre eyas mientre el
triko...no miravan lo ke aziyan afilu ! Yo ?
Nunka ! No se tomar las algujas en la mano !
Kuzir ? un poko si :))  Aziyan tambien el ashuar
de las ijas en kaza. kilometros de ilos kon
una algujika chikitika para brodar savanas,
manteles, tapones.....etchos de ermozura inkreyivle !
Tomava anyos i anyos...Kuando yo era chika, i en
Buyukada (isla en Istanbul) en el debarkader,
(ansina se diziya ande viniya i se ivan los vapores)
no aviya mujer o muchacha ke no lavorava...(brodava
o trikotava)   Estas ovras se mostravan a todos
i s'alavavan las mujeres ke aziyan kozas remarkavles.
Mi madre i yo nada, nadika !  A mozotros mos plaziya
gizar ! Ke komidas....Lokura ! Mos plaziya meldar
i muzika. Mi madre era profesora de piano (i yo ize
este "echo" durante 6 anyos de mi manseves !)
Las algujas mos viniyan mas difisil de lo ke aziyamos !

*
 
Tornaremos a lo ke vos keriya kontar  !
 
 
 Buyukada ( PRINKIPO kon su nombre grego) ke,
kon las otras islas mas chikas, kaye djusto
enfrente de la kosta Asiyatika de Istanbul
i da una vista maraviyoza a los ke moran al
bodre de la mar o a los ke se asentan en los
kafes i restorantes en las demanyanas o en
las tadres para gozar de un poko de freskura
en los diyas los mas kayentes del enverano.
 
 

LAS KUZENDERAS


Muestras vakansas empesavan en Avril !!! Komo ?
Kon las kuzenderas... I lo ke se aparejava para el
enverano, no era manko de los ashuares alavados de
las famiyas djudias de Istanbul !

Aviya 2 cheshites (tipos) de kuzenderas. Las unas
veniyan a las kazas i lavoravan de la demanyana
fina la tadre ( en vezes fina la noche para eskapar
akel fostan kon drapes i volanes i aldikeras apegadas
en todos los lugares ! ! ) En vezes se kedavan unos
kuantos diyas o se ivan i tornavan las demanyanas.

Mozotros teniyamos Donna (djudia Tekirdagliya) i
Julyeta (grega muy sempatika) ke eran komo miembras
de muestra famiya.

[ La istorya de Julyeta kale ke
la konte un diya ! es un
"peri masali" konte de fada-fairy tale "
ke si no lo aviya visto kon mis proprios
ojos i bivido semanas i mezes i
mezes enteros nunka lo iva kreyer !
Vos vo kontar esto kuando va venir el
tiempo. ]

Estas kuzenderas ke ivan " a la jurne "(al diya)
teniyan un defteriko kalendaryo chikitiko en sus chantas
( an agenda in the handbag ) .
Las dammas - lo mas
eran paryentes, amigas i vizinas - metiyan sus
nombres a las datas ke kerian ke la kuzendera venga.
Estas kuziyan fostanikos de plaj,i de kada diya i
la vestimiyenta de las ijikas i de
las "madmuazeles"(muchachikas).
- Las kuzenderas de las kreaturas por vistimienta
ekskluziva era aparte -

Yo siyempre meti mi nombre a munchas ojas de los
defterikos para ke vengen a azer fostanikos para mis
kuklas ma no se deke nunka vinyeron !
"Tuhaf koza !"(estranyo)
No me kontavan por benadam kuando era chika
parese ! Kada ves le diziya a Donna i a Julyeta :

- Dilek - mi kukla ! - no tiyene nada de vestir i
te esto asperando absolutamente !

- Por seguro ke va viniri le vamos a kuzir munchos
fostanes i tualetas,

me respondiyan. Mintiras ! Mintirozas ! No vinyeron !
Fui ovligada de kuzir yo .....i no saviya azer nada !

No me va olvidar ke triste koza era de no tener munchos
fostanes de trokar para mis kuklas...Ke saviya yo ke
mizerya estavan konosyendo las chikas de mi edad en la
gerra i dospuez.....Las ke se salvaron de una manera o
d'otra de la muerte...de la ambre...de las dolores..

OY MI KORASON YORA KUANDO PENSO A ESTAS IJIKAS KE
MURYERON....KE SUS ALMAS REPOZEN EN PAZ - AMEN


EL BAZAAR AMERIKANO I EL BALO MASKADO DEL CLUB


Komo se puediya pensar de ir a Buyukada i
pasar diyas enteros al "Club" sin las tualetas,
los fostanes de koktel, la vistimyenta
elegante de las envitasyones " de punto " ,
los dopyezes(2 pedasos) de seda o de
tual (keten) kon el
kol brodado a la mano ?
Kon los shales de mohair
- livyanos i kayintikos para las tadres freskas -,
los jupones de dantela de naylon kates kates,
tules, blankas i de kolor
enkomendadas de Evropa
o de Amerika o merkadas en los "Amerikan
Pazari " ke son butikas ande
se topava la mijor
ropa importada de todos los payises...Lo mas de
los Estados Unidos...
Era el tiempo de Tuslog .
[ El grande magazen Amerikano en el basis (kisla-
caserne) mizmo de los soldados amerikanos ke
vendiya toda manera de produktos amerikanos sin
ganansya a sus miembros i lavorantes] Todos
keriyan merkar ayi ma era defendido. Los
soldados davan regalos o a vezes vendiyan estas
kozas tan dezeyadas kontra kozas lokales.
(Una vizinika ermeniya muestra tieniya un amigo
-dospues se kazo kon el- en la armada amerikana
ke le trayiya kozas ke mos kedava el tino !!!-

El merkado de los "Amerikan Pazari" en Salipazar
en Istanbul konosyo una epoka gloryoza i para
mozotros era una " kaverna de Ali Baba ". Anyos
dospues disparesyeron kon una ley kontra estas
butikas.

El evenimiento tradisyonal el mas grande de
Buyukada era el balo alkual todos se ivan
maskados. Grupos grandes o chikos se aparejan
para estos balos de muncho antes, muy elegantes
i en loskuales solo los miembros o amigos de
miembros puediyan entrar. El primer premio era
para el grupo ke se aparejo lo mijor i la
persona la mas buena degizada. Aviyan tambien
premios para los sigundos i los treseres.
I yo avlo de premio komo se deve !!!


EL MINI GOLF


Asperavamos el enverano del invierno i
avlavamos kon los amigos ke ivamos azer
este anyo i kualo aviyamos echo el anyo pasado !
Era un sujeto ke nunka eskapava tan mos
kaptivava i tan enteresante era para mozotros !
Agora lo topo esto tanto "stupido" Dio mio !
Ma alora esto era de moda de avlar i si
keriyas ser parte de un grupo de amigos
deviyas de azer komo los otros, avlar
komo los otros, vistirte komo los otros i
mizmo oyer la mizma muzika, ir a las mizmas
eskolas etc... Kreyo ke oy en diya los
mansevikos biven mas o menos de la mizma
manera.....Solo ke para mi todo esto es
tan leshos...tan insignifikante.....

Buyukada era nombrada por sus aktivitades
de enverano....Los mansevos se ivan kada
diya dospues de la sej de la tadre fina las
ocho a un lugar muy sempatiko : el mini
golf. Djugavamos golf (miniaturo) abasho
en la guerta aranjada para esto i dospues
mos asentavamos en el kafe yenno de djente
de muestra edad entre 15 i 20 anyos para
oyir muzika, avlar i, deko no, flortar
un poko. Yo era la mas chika del grupo.
Teniya 14 anyos kuando me fui por la
primera vez. Las ijikas teniyan 16 i
por ariva i todas teniyan un amigito !

Muestras madres eran amigas i es ansina
ke una amiga me yevo ayi. No me tomaron
por benadam ! Unos me estavan mirando
ma yo pishin trokava de siya i me estava
muryendo de verguensa....Nunka lo vo
olvidar...Dospues de 3 o 4 vezes ke me
fui ayi, ya konosiya a todos i saviya
ke dizir, kon ken avlar kon ken No avlar,
kuando baylar i kuando No baylar....
I.....por segura ke era un lugar ande
me tresaliya de ir....Fina ke un diya
mi tiyo me travo del mini golf kon
ravya, nunka lo entendi por kualo,
mi madre me deshava ir...No aviya
nada de negro ayi i yo saviya
perfektamente komo komportarme !
No se lo pardoni ! Dospues, no kije
irme mas...Pensiya ke todos se ivan
a burlar de mi por modo ke mi tiyo
me travo de ayi komo una kreaturika
chika, me suvyo a su bisikleta i
me yevo a kaza.....Ke oror !
Mirava mis amigitas ke se estavan indo
todas vistidas kon los jupones i los
fostanes stripless, los kaveyos largos
alevantados en una "queue de cheval "
- kola de kavayo - fardadas muy poko
i kalsados komo las de las balerinas.
Yo me fuyiya aryento i yorava porke
mi tiyo me aviya dicho ke si me viya
otra ves ayi me iva chaketonar delantre
de todos ! Ke aviya ayi de tan negro ?
Nunka lo supe ma me akodro ke no
keriya bien mas a mi tiyo ke amava
tanto.. Al otro anyo ya estava todo
olvidado.... Era mas grande me iva al
golf i mi tiyo estava en Suadiye por
la enveranada....Buyukada estava
enkantadora.......


EL SINEMA AVIERTO I EL KAMINO DE LOS NAMORADOS

No ay safek ke el mini-golf era el mijor lugar
para atarse amigos, konoser todos los mansevos
i mansevikas i aranjar ande se teniya ke ir para
baylar la noche de shabat, ande ken aviya un
"parti" ken iva vinir la noche al sinema etc...

Las noches mos ivamos a estos sinemas de
guerta ke lo mas trayivan filmos turkos...
Mos merkavamos pipitikas i a vezes mos
yevavamos un kavesaliko para ke no mos tuyga
las pachas ensima de la siyas de tavla de al
tiempo..ma lo mas para englenarmos en echando
estos komo topes (balls) dospues del sinema
en las kayes kuando no ay mas dingunos...
Bovedad...lokura.!!!!!!!!
Los ke moravan mas leshos
veniyan kon las bisikletas.
En la ada (izla)
era i es dayinda defendido de tener otomobiles
o motosikletas. Ay arabas (koches) kon 2 kavayos
o aznikos para ir de un lugar al otro i
bisikletas por seguro.

Es dospues del sinema i de los djugos en la kaye,
kuando tornavamos a kaze ke los ijikos avriyan
sus korasones a las ijikas. El amor apanyava
los mansevikos i se formavan munchas vezes
los kuples ke se ivan a kazar dospues....
Kaliya asperar los estudyos....El askerlik
(l'armada/soldados) i ke el ijiko tenga una situasyon
ke lo mas se formava kon la dota ke resiviya de
los paryentes de la novya. Tuve munchos amigos
ke se kazaron dospues de flortar munchos anyos.
Lo mas, en estos tiempos, eran kazamientos
duravles mizmo si ay unos ke se kitaron doespues
de munchos anyos.

Salir kon grupos, mizmo si se flortava kon un
ijiko o una ijika era de moda. Se aziyan
piknikes en los lugares assolados i mos
englenavamos komo lokitos en nadando i djugando.

Un otro paseyo era de azer el tur de la ada en
pasando por el "asiklar yolu " - el kamino de
los enamorados - ke era entre los chames
(arvoles de pinya). Aya tambien los mansevikos
deklaravan el amor ke sintiyen por la ijika de
sus penseryos...A vezes saliyan pletos en estos
paseyos, viyamos ke aviya ijikas ke yoravan o
mansevos ke supito empesavan a fumar de tristesa....
Agora todo esto me viene komo una piesa de teatro !

 

YEKTA - LUNAPARK I PIKNIKES



http://www.virtualtourist.com/travel/Middle_East/Turkey/Istanbul_Ili/Buyukada-1849861/Things_To_Do-Buyukada-BR-1.html#2

Los anyos 60 i 70 son markados por los bayles
en los klubes. El rock'n roll i Elvis Presley,
Cliff Richard,Rolling Stones,Francoise Hardy
los Beatles, Pepino de Capri, Dominico Modugno,
Charles Aznavour, Johnny Halliday i Sylvie Vartan,
Enrico Macias, Adamo i muy munchos otros ke mos
kitavan lokos kon sus muzika ke plaze oy mizmo.
(La moda en el mundo torno a los 1960 s )
Mozotros eramos fanatikos de muzika i de bayles.
Mos ivamos a los klubes los Shabates dospues de
midi i los Alhades lo mizmo en inviyerno.

En enverano el lugar el mas populer de la ada
era " Yekta " por seguro. Se baylava fina la
demanyana i siendo un klub muy grande kon dos
pistas puediyan entrar sienes de mansevos ayi.
Dunke, no se puediya ni pensar no ir a "Yekta"
los Shabates de noche. Me akodro, el anyo
d'alkavo aver baylado sin kedar fina la
demanyana kuando estava prenyada de 7 i 8 mezes
porke lo tuve en mis brasos a mi ijiko el
22 de Septembre 1968. Adorava baylar i
no puediya no baylar porke sino mi marido
iva baylar kon otras...i yo me selava....
Eramos el uniko kuple ke era kazado en muestro
grup akeya vez....I no es solo baylar...
Asuviya a los montes de rokas i abashava
d'eyos fina la mar...Ke lokura....Komo no
me kayi i Hasveshalom no me rompi la kavesa
o peryi a mi ijo....Parese ke en akeyos
tiempos era mas loka de oy !

Luna Park era un restorante/kafiko al
empesijo del kamino de los namorados i es
en medio del chiko tur de la ada.
Mos agradava ir komer baylar i djugar ayi.


Baylavamos tambien en los partis d'amigos
ke se preparavan en pensando a todo.
Muzika, komida, luzes, envitasyones....

Mas dospues se avriyo el Degirmen (molino).
No el Degirmen era antes de Yekta porke mos
ivamos aya antes de ser kazados...De diya
era una plaj ande mos ivamos muy raramente
porke lo mas saliyamos kon muestro motor para
ir detras de la izla ande aziyamos piknikes,
kon los sandviches ke merkavamos en el
debarkader, 4 deyos por benadam !!!!
i una kasha de gazoz !
Pasavamos el diya entero a nadar, a meldar i
espandirmos en el sol. Teniyamos muestra plaj
privada porke dingunos no viniyan ayi.
Era un lugariko ke nunka me olvidi...
Ni de las piedras blankas, ni del sielo
blu, ni de los chames arriva del monte, ni
de los rokes ke konosiya a ojos serrados
ni del "fok" ke vi un diya en la mar!
Ke espanto ke tuve ! No saviya ! Me
paresyo komo un monstre ! Ken puediya
penser ke aviya "fokes" en la mar Marmara !
Me enkantava de ver los Dolfinos djugando
a tres i a vezes a sej !...Ke ermozos diyas...
Grasyas al Dio ke las bivi kon allegria
i amor. Esto keda i nunka se puede efasar.

Kon esto i aki s'eskapan mis linyas sovre
Buyukada, una de las mas ermozas izlas ke puede
ser en el mundo...Oy...no kero saver de las
izlas porke no puedo suportar la krualitad
de los "arabadjis " el ombre ke aharva los
kavayos para ke kaminen kuando estan kansados
muertos, sin agua i sin komida a vezes....
debasho del sol kemando i los piezes ensima
del asfalt tostando...El Dio ke los aga a eyos
kavayos a la otra vinida !!!!



sharope blanko 
 
Sonyandose de akeyos diyas....

 

- Copyright © sefarad.org - 1997 - 2017

Retour au site sefarad.org -