Accueil - sefarad.org

Julyeta

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

J U L Y E T A

 

De mi eskrito sovre BUYUKADA vos aviya
prometido d'eskrivir la istorya inkreivle
de Julyeta, muestra kuzenderika grega ke
viniya ande mi mama  " a la journee ..."

Julyeta teniya 23 anyos kuando empeso a
kuzirmos. Mos aviya kontado ke se ambezo
a kuzir en un atelye muy alavado durante
anyos i anyos. Teniya un talento espesyal
i reushiva todo le ke le pasava por las
manos. El patron, no se lo keriya pujar
la mezada i eya kon todos las klientas
ke konosiya, i ke se namoravan por lo
bueno ke kuziya, demisyono de su lavoro
i empeso a ir en las kazas para kuzir.
Me akodro ke tomava el dopyo de lo ke
tomava Donna - la kuzendera djudia " a la
journee " de mi mamita - porke era muncho
mas "kalifyada".

Julyeta era blanka ma teniya kaveyos
pretos kurtos kon ojos grandes grandes
vedres. Una boka chikitika chikitika ma
karnuda i una naris de tresalir.
Sue puerpo era fino i no era muy alta.
Agora ke me esto akodrando de eya
puedo dizir ke teniya un ermozo puerpo
i una karika muy sempatika.
En akeyos tiempos no saviya ke es la
ermozura de una mujer...Aviya buenas
i malas ma no ermozas o feyas para mi
ke teniya unos 10 o 11 anyos !
Es dospues de los 14 anyos ke empesi
a dar me kuenta de lo ke es ermozura,
amor, la diferensya entre los chikos
i las chikas, las miradas i todo la
parsandata ! Agora se meten enfrente de
l'espejo a 9 anyos...

Un diya Julyeta mos konto ke eya merkava
kada semana una revista grega i ke le
plaziya meldar sovre nada i todo, las
konsejikas, la moda, el mupak, los regalos
i la kaza, kurto todo lo ke se topa en una
revista para mujeres.

   
Julyeta biviya kon su madre i una tiya ayedada.
Era a eya ke kayiya de mantenerlas, yevarlas
ande los mijores doktores i abastar por las
kuras karas, todo lo ke kaliya por la kaza etc.
Lo aziya todo kon plazer i metyendo todo su
alma porke las keriya muncho bien. Ma todo
esto no le deshava tiempo i paras para salir
i entrar, tener amigos i la vida de una mansevika.
Julyeta estava sola i enfasyada por no estar kon
mansevos de su edad.

Viniya ande mi mamita para esbafar kon eya porke
mi mamita saviya ser komo mi, de 12 anyos si
kaliya....Diziya ke era su sigunda madre i por
siguro yo era su ermanita ! No es ke me plaziya
muy muncho todo esto ma no lo tomava muy negro
tambien. Mi mamita mos tomava una de kada parte
i saliyamos a kaminar., a los sirkos, al sinema,
a los magazenes, a komer afuera ...
Mos engleneyavamos muncho kuando lo aziyamos.

Esto de madre sigunda i ermanika no halis me dyo
una idea mala mas tadre en mi vida....Vos
va kontar ke ize agora i dospues va tornar a la
istoria de Julyeta .....Komo lo ize, porke lo ize ?
No se ! Lo muy bueno i derecho me toka parese !

*

Mi tiyo en un primer kazamiento teniya una mujer
ermeniya. Una kuzendera alavada ke kuziya solamente
a los grandes artistos i a las dammas rikinyonas
de la sosyete turka. Kada nada se iva ande su
ermana en Paris para yevar ropas i modeles muevos.

Un diya el guerko no teniya nada de azer ! Me
fitledeyo bueno bueno (me incho la kavesa kon
las kozas suyas) i pensi ke va ser interesante
de ver la kara de mi novyo tan kerido si le
diziya ke yo no so la ija de mi madre i de mi padre
ma la de mi tiyo kon la ermeniya...

Estavamos asentados amorozamente en una patiseriya
de Gumushsuyu en frente del Park Otel, en una
guartizika chikitika chikitika ma muy sempatika.

Lo miri derecho en sus ojikos blu i kon la mas
dulse de mi sonrizas le dishe avagarito si su
amor por mi iva trokar de kolor si le diziya una
vedra (!) ensima de mi ......Se le emblankesyo la
kara i me kedo mirando...Estava muy kontente de
mis talentos de aktrisa...Ize mi kara ansina
muy seryoza i kon un soplo le dishe ke yo so la
ija de mi tiyo i ke me dieron a mis paryentes
porke eyos no puediyan tener kreaturas i ke mi
tiyo estava akel tiyempo para kitarse de su mujer !

Mil guerkos del ginnam ! Madre miya bendicha !
Todos los lonsos del Alaska i del Kazakistan !
Fue una katastrofa de kolor zurzuvi ! Dezgrasya
de las dezgrasyas....Mis talentos de aktrisa
stuvieron mas de perfekto !!! Tuvimos una dospues
de midi komo los filmos d'espanto para mi !
Disho ke era muy importante para el i ke teniya
de pensar....Espartirse !!!Dio miO ! Ke ize yo !
Troki pishin ma imposivle era de konvenserlo !
No sierviyo a nada de dizir ke lo enventi para
djugar ( Ize otruna ves ansina de bovedad
para una koza muy similar...Para ke seya
interesante...Fue de mazyado interesante !!!!)
Kurto, vinimos a mi kaza i solo dospues ke mi
mamita lo konvensio ke se kreyo ke era un
djugo etc.....Loka loka de atar era yo !
Ke kadar ke mi madre s'inyervo kon mi dospues de
esta istorya....No es mi kulpa... Si todo esta
bien a mi m'empesa a vinir ideyas tuguertas !
Kale ke se aga todo siniza para meter pimienta i
sal en mis relasyones ...Yo lo ago por shakas
kon innosensya i sale ....El Dio ke guadre !   

*

Tornaremos a Julyeta.....

Dunke dishimos ke Julyeta estava abonada
a una revista de mujeres en grego i kada semana
era su bueno de meldar enteramente
su jurnal preferido. A mi me plaziya mirar
a las figuras komo kada kreatura.

Una kolona de esta revista era konsakrada
a los lektores ke keriyan eskrivirsen kon amigos
en grego por siguro....Muestra " ermana no halis "
respondyo a una demanda ansina.

La persona metyo ke keriya koresponder kon chikos
i chikas al doredor de 25 anyos en grego i en inglez.
Mas nada.... NADA. i Julyeta disho ke s'estava
ambezando inglez i todo ensima de eya mizma.
Le vino una repuesta de un sierto Nikos de Gresya
sin dar dinguna enformasyon sovre el... De aki i de
aya.....tiempo i borekas ! Esto del tiempo i de las
borekas sin kola ni kavesa sureyo/duro  1 anyo.

No ke edad tiene el benadam ni ke echo aze, su
famiya...eskola...nada... Un nombre Nikos.
La muestra empesa a salir loka...Ken es este ombre ?

Mi madre le disho ke venga a Turkiya ! I Vino !
Vino ande ? Ande mozotros por siguro ! Ke kadar
ke me plazyo a mi ! Yo teniya 12 anyos
i avlava un poko de ingles...Le dishe a Julyeta...
Kazate kon el ! Tan simple !.....Me namoro yo por
las ijikas !

Mi madre avlava perfektamente en grego. Mi padre
ni una palavra ! Ma todo esto se estava azyendo
de diya....La noche el musyu estava en un hotel.
Ni saviyamos ke otel ! Julyeta se namoro de el
i parese ke el tambien salyo loko por eya.
Kontinuaron a eskrivirsen unos kuantos otros mezes
fina ke el le demando si se kazariya kon el.
Le disho si  (era mi madre ke la inchiya !)
kon kondisyon de kazarse en primero en Turkiya.
Este lo acheto i empesimos a preparar la boda.
El disho ke tiene un echiko chiko ke les va
abastar ma no tiene paras para la boda.

Ay amor !...S'estan entendyendo...Yo se ?
Mi mamita disho ke van a ser horozos !
Vino Nikos...Le trusho un aniyiko i una kruz
de oro, Se izo la boda..Kon las klientas de
Julyeta i las 2 mujeres ayedadas i mozotros.
I se fueron a Gresya.

Las dos ayedadas kuando tornaron a kaza vieron
ke aviya ensima de la meza una chantika/sac
inchida  de Dolares kon una nota..
."Vos vo embiyar muncho mas - Nikos"  !

En Gresya la estava asperando a Julyeta un
avion - Jet privado ke los yevo primero a
Paris, para ke Julyeta se eskoja su garderop
i sus djoyas i dospues a Singapor !

El ombre era un armator muy konosido, ma kijo
estar siguro ke iva ser un kazamiento de amor i
no de intereso.

Mi madre topo en kaza a la torna de la boda
una brosh de brilyantes kon su nombre por debasho
 i "thank you".

Para mi una kukla kon todos los vistidos
su kamareta d'echar i el salon kon el mupak.
(Julyeta le konto ke nunka vino kuando la
yami para azer vestidos a mis kuklas)

Julyeta mos embiyo letras kada semana fina ke
mi mamita se bole al Ganaden. Arresivyo
un shok tanto grande ke tuvo de menester
d'un psikologo privado para eya !

Tuvyeron 3 ijos i 2 ijas komo en los kuentos !
Nunka Nikos bolto la kavesa por otra mujer...
Teniya 32 kuando se kazo i estava arto de
mujeres i de vida loka !
Digo yo......Mijorado de todas las ijikas
muestras !

Es una istoria verdad i se eskapa aki
kon mis mijores oguros para una vida allegre
kon paz en los korasones los mas duros i el
Di-o ke no mos de hazinuras i oras malas, ke mos
aga ver el bueno i la sanedad de muestros ijos
i los animalitos ke no sufren ....AMEN I AMEN


sharope blanko
en su balkoniko
bevyendo de una parte el likor de vijna ke izo !
 

- Copyright © sefarad.org - 1997 - 2017

Retour au site sefarad.org -