Accueil - sefarad.org

Guerras - paz - sosyedad - evolusyon - siniza- aire - nada

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
GUERRAS  -  PAZ  -  SOSYEDAD  - 
 
EVOLUSYON  -  SINIZA  -  AIRE  -   NADA
 
*
 
*
 
En supito tuve muchas ganas de avlar sovre kozas ke
preokupen  muy muncho  ...
Por empesar, deshadme dizir ke nada en muestras vidas
tiene demasyado importansya !   No se kuantos anyos
tienemos mas de bivir ma puedesh kreyer me si vos digo
ke dospues de  los 50 o 60 o avezes 70 i mas, la persona
empesa a pensar de manera absolutamente diferente de
lo ke avia pensado todo su vida ! Muy enteresante esto !
Es komo si una demaniyana mos alevantamos, i komo si
avimos komido o bevido alguna koza majika,
(un poko komo egziste en los kuentos para kreaturas
chikas)   empesamos a ver la kreasyon, el mundo,
la sinyifikasyon de la vida, muestras kreensiyas, muestros
butos i muestras opsiyones, todo lo ke kijieramos,
dezeavamos i davamos importansya trokados
majikamente !
Yo i mis amigos, en los anyos 60, kuando teniamos 16
anyos + eramos fanatikos detras muestros amigos/
ermanos de 20 + ke keriyan trokar el mundo, todo el
sistem sosyolojiko i humanitario ! Vozotros diresh
komunizmo...dira un otro el movimiento "hippy" el
d'aya dira sosyalizmo, unos gritaran "los derechos del
ombre " etc....no es importante ! Lo ke kero dizir
es ke en el fuego de muestra manseves,  todo lo ke
tenia relasyon kon la sosyetad, la vida, la evolusyon,
la teknolojiya, la paz en el mundo i munchos otros
sujetos   (kale bibliotekas enteras para kada uno
d'estos sujetos)   teniya una enormeeeeeeee impakto
en muestra vida de kada dia.....Unos de los muestros
dieron sus vidas  (no es shakas) otros por anyos i anyos
estuvieron en prizion etc...triste !
I ke akontesyo ? Munchos d'entre mozotros
aserkandosen de los 30 o otros, los mas fanatikos,
a los 40, empesaron a ser mas materialistos afilu de sus
padres a ken miravan d'un ojo negro i mas depresyavan !
Un kazamiento..kreaturas..amigos en sierklos diferentes..
La penseria del futuro (immediato), las ovligasyones i las
responsabilitades kucheyaron (!) el idealizmo....me akodro
d' estos tiempos ke vi el trokamiyento de mis amigos/
ermanos....era de no kreer lo ke se estava pasando !
I  anyos...mas anyos pasaron.... i ke akontesyo ?
Entre mis amigos unos se izyeron rikos...muy rikos....
otros se izyeron siantifikos, profesores, jornalistas,
artistas,  ombres/mujeres de alta kondisyon o mas otros,
orozos kon lo ke les dio el Dio  (por ahora) :)....
Todo esta djente teniyan butos  diferentes...la fama,
mas rikezas, mas kreaturas, assegurar el futuro de sus
famiyas, una mas ermoza kaza, djoyas i mas viajes o
adelantar sus karyeras etc...
Ke les afito ? Oy tienen mi edad (66) el mas mansevo !
unos se muryeron..a unos le parese ke tienen 20 anyos !
Una siente ke tiene 12 anyos (yo! ma se ke so unika
en el mundo, por esto, olvidavos de mi kavzo !!!) ma lo
mas lo mas...savesh ? mmmmmmmmmm no les importa
nada nada ! Eyos son de los ke s'alevantaron una
demanyana i komyeron o bevyeron una koza ke no
savemos lo ke es....  Esta koza los izo muy muy muy
intelijentes ! Vieron el mundo entero kon otros ojos...
Son komo profetos o savios ke miran a traverso los
objetos o los seres... komo si avian gostado de una
fruta defendida ! Ven ke todo es aire i siniza....gerraz
i paz no tienen sinyifikasyon porke la evalusyon
endjendra la muerte...i solo la muerte es la verdad
divina de muestras vidas ! Andad i mirad ke sera la
reaksyon d'una mujer ke tiene kanser kuando le
ofresemos un aniyo de briliante, regalo para eya
sola, kon la kondisyon ke no lo va pueder regalar
a otro en su vida !   Makabro ! deskulpad !
(avladle de paz o de gerraz ! lo mizmo)
dospues de la demanyana, akeya, savesh lo ke es
importante ? Bivir i solo bivir.....Bivir bueno i gozar
de kada minuto ! Akodrarse de su chikez, de sus
paryentes ke n'ostan mas...apanyarse a los amigos
ke sembolizan la vida i la sekuridad de no kedersen
solos.  La importansa ke la kaza seya allado de un
hospital ! Tener vizindado en ken se puede tener
konfiensya (si afita una kriza kardiaka, una
paraliziya etc...) i tener una bolsika mas o menos
yenna  "para la vejes" !
No se kuanto vo lo oskurri ! Puedeser ke no es lo
ke kijitesh oyir..O puedeser ke si ! Si meldash
entre las linyas por siguro ke si !
Keridos...siempre va aver gerraz en este mundo..
Mas i mas afilu ! Porke gerraz ay kuando las
kondisyones de los puevlos estas negros ! İ mas i
mas negros van a  estar !
La paz bive en muestros korasones....Es aya ke
lo vamos a topar !  La vida es un peleyo de un
segundo! El resto es siniza i aire...Nada mas !
La yave de la felisidad la tenesh en vuestras
manos,   no la guadresh en un lugar i no la
metash en vuestra aldikera ! Ke seya siempre
en vuestras manos ! Mas amor dash i mas amor
topash ! El amor es la unika felisidad en el mundo!
La egzistensya del kristyanizmo dependyo
unikamente d'estos biervos !   " Dio es amor !
Ama a todos i perdona a  todos !"   es la unika
filizofia ke tiene sentido por la felisidad ! 
esto kambyo/troko la historia i la humanitad !
i por seguro k'es la unika verdad !
Lavorar ? hehehehe va no lavores si puedes !
(riendome!)
yo lavori mas de 70 horas en la semana....
el payis tiene una parte por seguro ma
lo mas es para mozotros ! Todo esto depende
de lo ke tienesh, keresh tener, keresh azer o
alkansar  En VUESTRA vida...a la fin no ay muncho
diferensya entre pan i kezo o ser reyna/rey
de un payis...no se kual es mijor a vezes !
una vida buena sinyifika tener una buena salud...no
tener ambre o dezeyos ke no se pueden alkansar...
paz en la miente, en el korason i en la aldikera !
AMOR en kaza - miembros de famiya - kon los
amigos i kon todos los ke komunikamos - no tener
selos, odio, ravia ke akkortan i entosigan la vida.....
Una soriza i siempre una buena palavra para
arekayintar la djente ke te arekayintaran.
Paz ke tengash i muncha felisidad en esta vida
i mozotros todos tambien - amen
 
 
sharope en istanbul

- Copyright © sefarad.org - 1997 - 2017

Retour au site sefarad.org -