Accueil - sefarad.org

Es fasil ser un hombre... Ma mujer ?IIIII

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

ES FASIL SER UN HOMBRE...  MA MUJER ?!!!!!
 
 
Yo penso ke la moda " al la garson"  nasyo del dezeo de
las mujeres de ser hombres !

Komo no !  Grande injustisya por  mi vida !

Esto avlando de la injustisya ke egziste entre
la mujer i el hombre !

Ser hombre es la mas fasil koza del mundo...
Ser mujer ?  Ayyyyyyy !

El hombre se mete una kamiza blanka utuledada
(repasee)  - viene de uti (utu en turko) - kon
una ermoza kravata  un pantalon kon una jaketa
ke uydeyan (sied) - uydeyar ("uymak" turko)
ke yakisheya (suits) ("yakismak" turko) ke uno
allado del otro va bien, kaye djusto i hermozo -
kalsaz de kolor oskuro i kalsados boyadados
- "boyamak" turko,  meter kolor pintar -  i ya esta
pronto el musyu para ir a su echo, a pasear o ir al
balo !  No ay de pensar i partir la kavesa para kualo
se vana vistir...kualo ay de azer.  Se arapo i
metyo un poko de kolonya ensima...Ya esta preparado
por la mujer kon ken va salir o sus amigos kon ken
va avlar solo de mujeres...los matches de futbol...
de la borsa o de sus hazinuras kuando esta mas
aedado ! Lo mas se va al kuafor para ke le korten sus
tres pelos ! Agora ay manikur i mirado por la kara
masajes, kremas cheshit cheshit  (munchos tipos)
kontra las rigas kontra el akne etc....Deke no ?
Les vieyene konfiyensya en eyos i se sienten
pomponados i yakishiklis  (handsom ermozo).
Los estan yamando metroseksuel.  Este nombre me esta
viniendo un poko komo homoseksuel ma no tiene nada
de ver....A los akeyos yo yamo gaynikas !  Madre
mia bendicha !  Kolorada entera ya me esto muryendo
de riir !

El hombre ni tiene ke de pensar 3 vezes antes de
avrir la boka !  Para kualo ?!   Agora me vash a kerer
aharvar ma yo eskrivo lo ke penso !  Esto en mi kantoniko
i dingunos pueden entrar aki   :)  Seguro lugar !
Al kontraryo de la mujer, ke tiene ke saver kualo
es politika - i no la de Washington ! - dizir a vezes
kozas ke no pensa, riir kuando tiyene ganas de yorar,
azer todo lo posivle para mostrarse ermoza i manseva,
mizmo si esto toma horas, kosta los ojos de la kara,
es enfasyozo i a vezes endjida !  Estos pelos manko
los vere !  Dizen  " El hombre i el lonso mas peludo
mas ermozo ! "  Dezmazaladas de mozotros !

La mujer tiyene ke ser fina !  Kontrolar sus djestos
i su avla....entravarse komo la bamya ! Mirar
ansinaaaaaaa  i una soriza ansinaaaaaaa i asentarse
ansinaaaaa i kaminar ansinaaaaaa i por sedaka no
ANSINA   i ANSINA    i ANSINA !!!!! Ya me entendesh
bueno lo ke kero dizir !  Barminnam !
El hombre kualo ? Le dize al lenyo "Vate mas aya ! "
No no....No esto avlando de los janti hombres de
ke konosemos.  Por seguro ke no !  Los muestros son
todos korasonikos buenos, kultivados, finos, sharopes !
Naaa.. los otros !  Si si  eyos ke no konosemos ma ke
son ansina !  Mis palavras van a eyos !
Ke de menester tengo yo de avrir mi boka no se !!!!
No ay fin al los dertes (peines)  de la mujer !
I sin avlar de esta koza luzya ke es parir i
engrandeser ijos !  Esto es el bonbon de muestra vida !
Todo es ensima de eya ....Lo bueno es naturel....
El kusuriko (une erreurr)  se aze una montanya i va dar
kuentos komo pekates i en ke gehennam vaza ser
djuzgada !

Para eyos todo es permetido..para mozotros ???
Oy veeeeee....Sus palavras son ley de Moshe !
Sus repozos en kaza es sakrado...Aman ke no se
kansen i no agan nada...se les rompe la unya !
 

Yo kijyera vinir a este mundo hombre !  Ma los
hombres no saven la valor de ser hombres.  Me parese
ke ay en una tefila, una koza ke los hombres
ringrasyan el Dio de no ser vinidos al mundo komo mujer !
Tenemos una relijyon realista !

Kale ezbafar en vezes en kuando !  Ya lo dishe !

Ma para kualo lo dishe ni lo se !!!!  Soy reyna
de mi palasyo i no ay dingunos ke me deranjen, ni
una moshka ! (Pardon un moshko !!!)
Ay kozas ke se enklavan de negra manera en la kavesa
parese ....al ver al mundo...no mas !

Ya es puedeser sempatik koza de tener un buen amigo
para la vejes i englenarse endjuntos....Ma los
pletos i los inyervos...el manko de pasensya, la
responsabilitad i el yugo, las ovligasyones i el
korrer i enfasyar.....Vale la pena ? No esto
segura del todo !  Me parese ke mas i mas la mujeres
independientes, kon karyera i intelijensya vana
mirar kon friyo a la koza ke se yama kazamiyento !
Esto ya esta okuryendo de anyos, ma mas i mas va
kedar en la historya !

Bueno ke ay la koza ke se yama  " I...Ya me auzi ! "

...I ke van azer los hombres ?   Ohhhhh  siempre
va aver tontizikas ke vos vana servir ....
 
No kale ke vos aravyesh kon mi :(   Dishe lo ke
penso solo !  I esto segura ke ay muy munchas
"ijikas" ke pensan komo yo !

Una soriza kayinte kayinte para todos aki

sharope blanco


PS.  Los biervos turkos ke di la eksplikasyon
son biervos ke azen partida de muestra lingua
de tiempos i tiempos i oy  tambien. 
Para mozotros son ladinos i no  turkos mizmo si
son tomados de esta lingua.
 
 
 
Dar uti           :      repasser

uydeyar -
yakisheyar   :       lorsque quelque chose "va" avec une autre

cheshit cheshit :  plusieurs sortes   
 
dert                   :   peine

kusur                 :  erreur

yakishikli           :  bel homme

boyadar             :  teindre, colorier

- Copyright © sefarad.org - 1997 - 2017

Retour au site sefarad.org -