Accueil - sefarad.org

Filosofiya sovre bavajadas ma.....

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Los milagros de los kualos los Livros Santos
avlan se pueden diskutir por ken tiene una
miente kritika ke no aksepta de konvenserse
kon una repuesta ke asemeja a "Ansina es i punto !"
o "La relijyon es un paketo i no se avre...
Es a tomar o a deshar !" ...

Si la personase forma des de su primera chikes
de manera a efasar toda manera de kestion ke ni le
viene al tino de esta manera, no ay dingun problem.
Tiene la kreensya de esto debasho de su piel, en su
sangre, le viene naturel todo lo ke se paso, mismo si
se kontava ke aviyan personas ke kaminavan en el
aver o vakas ke bolavan... Lo ke no puede i no deve
de ser natural por los otros ke keren tratar de entender
i ir al mas profundo de las kozas.

A este punto, mos asemejamos a las kreaturas ke
empesan a ir solo a la eskolo i keren saver en estos
anyos mismo lo ke tienen de ambezarsen en la
Universitad !

Mozotros no tenemos un background bastante
godro para pueder entender siertas kozas...
Esto es una vedra ! I es por esto ke las personas
se van a las akademiyas de judaismo, a las
yeshivas i no se mas ande para ambezarsen
muncho mas ondo ke lo ke savemos mozotros.
Ma i eyos tambien no tienen repuesta a todo !

No pueden tener dingunos repuesta al kueshko
del problem. La vida, la muerte, la neshama !
Antes ? Dospues ? Esto es el Kadosh baruh
Hu ke no kijo ke lo sapiemos... Teoriyas,
entuisyones i toda manera de siensya puede
dar una ideya o puede developar una konviksyon
personala ma la vedra no es posivle de saverla
i esto es la unika vedra. Ademas si no era
por muestro bueno esto no seriya ansina.

Me vino al tino el debato ke trata de
"Es mijor saver la vedra o no ?" . Avlo de
una hazinura terminal. Todos keren saver i
no saver en mismos tiempo ! Es mijor para
eyos de no saver ma esto no les viene justo
porke komo siempre kieren tener las kuedras
del destino en sus manos ! Una persona ke
"no save" es mas felis. No tiene espanto
ma siempre la esperansa de kurarse, lo ke
es mijor para su moral i sus fuersas de
kombatir la hazinura. Psikolojikamente
tambien su vida tiene muncho mas kolor i
goza mas... No todos tienen la fuersa de
akseptar la muerte kon sorizas bayles i
kantes ! Yo no ! A mi ke me mientan !
Ke me avlen mintiras i ke me digan ke tengo
dolor de estomago porke komi una susyedad !
No kero saver ke me vo murir i en kualas
kondisyones ! Antes lo eskondiyan agora
no. Me parese ke era mijor lo de antes !
Esto es egzaktamente la razon ke nunka
saveremos la verdad. La vamos a koneser
si EL lo topa justo i bueno para mozotros !
Alora ? Devemos, no se komo, ma por 1001
remedyo de tratar de no pensar en esto i
tener konfiensya en El ! Soriyir a los
anjelitos i yamarlos para ke mos ayuden
si tenemos menester.

EL nunka nunka mas se emlesko de los
echos de este mundo..... Nunka, aparte de
la salida de Egypto.... El izo este mundo i todo
ma NO esta enteresado a la vida en este
mundo i lo ke ay mas aya no savemos...

.... I si pensamos ke muestra galaxia
entera no es mas ke un grano de arena
en el firmamiento, i ke muestro sol
es ni una ormiga allado de Antares,
un otro sol en un lugar milyones de
anyos de luz leshos de muestro sol...
Imajinavos ken somos....Ni ayre, ni siniza ...

No kreyo ke ayga de pensar tan al profundo
las kozas....Mas ke ser en akuerdo kon
muestra konsiensya i kon lo ke azemos !
Porke, en todo kavzo, mos da mas plazer
i satisfaksyon de saver ke izimos muestro
posivle para ser una BUENA persona, amada i
no odyada por los otros, ke mos kreyimos en
el Di-o de muestros padres asigun EL lo kijo
i en muestra vida fuimos un elemento "pozitivo"
i no "negativo". Kreyo ke a lo manko esto
tiyene su pezo si no para algunos o kualsiker koza
para mozotros mizmos !

Siempre pensi ke puedo irme kontra el mundo entero
ma nunka kontra mi !

kon karinyo

Sharope blanco

- Copyright © sefarad.org - 1997 - 2017

Retour au site sefarad.org -