Accueil - sefarad.org

Pera i el "Cicek Pazari" en Istanbul

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 

 

PERA I El  "CiCEK PAZARI"  EN ISTANBUL

 


PERA

 

Oy tengo ganas de akodrarme de un lugar yenno de
kolores, de golores i de la djente de todo los niveles
ke se topavan en este lugar por diferentes razones.

Este lugar egziste dayinda en Istanbul ma peryo
muncho de su karakter i se troko kon los anyos.
Si me demandaj a mi....Vos dire ke dingun lugar me
dyo el mizmo plazer i oy en dia, kuando salgo para
englenarme i pasar el tiempo komo me plaze, la tomo
a Sharopiko por la mano i me la yevo a "Cicek Pazari".


"CICEK PAZARI"  (chichek pazari - ke kere dizir el
merkado de las flores)  era i es un lugar muy popular
en el korason mizmo de una avenida prensipal de
Istanbul.  Esta avenida - La Istiklal Caddesi - era
la mas grande ke egzistiya en los anyos 40-50 i
era ande biviyan los minoritaryos, judyos, gregos,
ermenis i evropeyos.  De las dos vandas de la avenida
eran los mas grandes magazenes de la sivdad.
La djente no saliyan ayi sin vistirsen lo mijor ke
puediyan.  Era el sentro de la alta kustura, i de
los magazenes de ropas de seda, de ropas importadas
de Paris, de LOndres...  Me akodro del grande magazen
de djugetes de tavla, de kuklas las mas ermozas
del mundo ke diziyan  " ma mm a " kuando las
echavas.... Los balas  de kolores bivas
i de todo los boyes  (sizes-taille)... las bisikletas
i kavayos de tavla ke te kunavan atras i adelantre...
Un gan eden para las kreaturas, i para mi  por seguro,
ke puediyamos ver kada noche en muestros suenyos !

Las perfumerias, los magazenes de kalsados, i los
magazenes alavados de djoyas i oras, los magazenes
ke vendiyan paltos i jaketas de samara eran los
suenyos de las mujeres ! Yo bostezava kuando ivamos
en estos !  El "Bonmarshe" de los djugetes era
por siguro muncho mas atraktivo !  Beyoglu, este
sentro, o Pera, kon su nombre de "al tiempo"  era
naturalmente el lugar ke se komiya el mijor tambien.

" Abdullah ", "Aziz", "Rejans" "Hadjibaba"  eran
unos kuantos de los restorantes alavados i "de punto" 
ande los mas rikos, los mas intelektuales i los mas
konosidos se ivan para komer i "salir" kon amigos. 
Las mujeres eran muy elegantes las noches en estos
lugares.  Fostanes kon dantel i broderias, chapeyos,
guantes, djoyas.....Los ombres siempre kon vistidos
i kravata, galantes kon sus mujeres, komportandosen
perfektamente.  Spesyalmente en "Rejans" ke era un
restorante dirijado por dos mujeres de Rusya,
aedadas, ke aviyan fuyido de aya kuando el payis se
izo komunisto... Lo mizmo en "Abdullah", un
restorante muy shik i ke vos  deshava inolvidavles
savores en la boka....


Mi padre mos yevava a mi madre i a mi a  "Rejans" o
a "Abdullah"  kada ves ke teniyamos aniversaryos o
dias de fiestar un evenimiento.  En estos tiempos
aviya "masha"  para azer buklas en los kaveyos.
Las mashas se kayintavan ensima del gaz i se
apanyavan kon estos un pedaso de kaveyo ke se
aboltava para formar la bukla. Se puediya sintir
la golor del kaveyo kemado !  Ke dezgrasya.
No aviyan las furchas  (brush) i el fen (blower) de oy.
Dunke mos aziyamos las buklas, mi madre me metiya
el grande fyongo de tafta ensima de las buklas,
mos vistiyamos de fiesta, yo kon las kalsikas
kurtas blankas i kalsados pretos de lustrin brilyante,
mi madre luzya komo una artista de sinema, parfumada..
..ayyyyyy ke golor de achileyar el korason.
ivamos a Pera kon taxi.  El tapet korolado i las
alminaras de kristal en estos restorantes mos akodravan
ke teniyamos de azer dikkat  ( attention ) a muestra
lingua, muestra boz - no se avla en gritando es muy
verguenza ! - komo mos asentamos i mos alevantamos etc..

Los servientes vistiyan el smoking i mos travavan la
siya en asentandomos i alevantandomos.  Aviya 3 cheshites
( types) de kupas para kada uno i mizmo a mi me davan el
"menu"  mas grande de mi, afilu ke no saviya meldar o
entender los nombres de las komidas en fransez o en
zurzuvi ! Mis paryentes por seguro ke saviyan todo i
yo me namorava por koftes i patatas fritas !  Mi padre
siempre teniya ke dizirme ke esto lo puediya komer i
en kaza i aki  era bueno de gostar komidas muevas. 
Teniya razon !  Otros lugares eran las patiseriyas......
Lebon, Markiz, Gloria, Inci.... En dingun payis no
topi la savor de los gatos i dulsuryas de Istanbul...
Oy en diya no paso por Pera sin komer el "profitrol"
de Inci ke esta dirijado por la inyeta del patron
del Inci, un maestro grego de la dulsurya, ke era
aedado kuando era chika yo !

El mijor lugar de pasar el tiempo kuando aziya luvya
o por asperar la ora del filmo o tomar un dulse de
leche o una supa kayente de gayna kon aroz era el
"Muhallebidji Saray " por seguro, allado del sinema
SARAY. Muy karakteristiko kon sus mezas de marmol i
los mueblos de tavla muy oskuro, las kanatikas de
metal para la agua de roza ke se vazyava ensima
del malebi, el dulse de leche.  Kuantos amores
empesaron ayi i kuantos se eskaparon kon los
korasones mas duros de las mezas de marmol.....Los
mijores filmos se djugavan en los sinemas Saray, Melek,
Atlas, Lale, dospues el Yeni Melek i muy munchos otros,
todos en este sentro.  Los Shabates i Alhades era muy
difisil de topar bilyetos i eran los "karaborsadji"
- loS ombres ke vendiyan los bilyetos dopyo del
presyo -  ke ganavan de las espaldas de los mansevikos
ke keriyan  ver "absolutamente " el filmo kon la
semanada ke tomavan de los padres o de las madres,
ke kontavan el grosh !  Munchas vezes saliyamos de un
sinema para entrar presto presto en el otro....I deke
no a vezes al treser !  No kale olvidar ke no aviya
televizyon en akeyos tiempos i el sinema era la mijor
manera de englenarse...


 
ATLANTIK - LALE ISKEMBECISI - TOKATLIYAN

El lugar ande komiyamos los sandviches "grandes komo
kalsados"  i ande inchiyan todo lo ke se puede imajinar
de komida era ATLANTIK....No se si egziste en el mundo
otra   "sandvicheriya"  asemejante.  Mos fuyiamos de
la skola a midi para ir a komer sandvich a ATLANTIK.
El pan era siempre kayinte salido del orno kon un perfume
de kitar loko al ambierto !  Yo me tresaliya del sandvich
de garato ke es la lakerda  i todo modo de pishkado salado.
El chiroz ke es el uskumbri salado i sekado, el likorino etc.
A vezes tomava el del "arnavut cigeri" ke es ilgado frito
kon sevoya i prishil o el de dolmas (feuilles de vigne
 oubien les poivrons farcis) o, kuando teniya munchas
paras, el sandvich kon kaviar korolado o preto.. 
Mi mamita se namorava de esto !

" LALE ISKEMBECISI "  era un restorante  spesyal ke se
iva tadre las noches dospues del sinema o teatro o a
la salida de "night clubs". Es kostumbre de ir al
"ishkembedji"  en Istanbul dospues de medya noche. 
No vo dizir ke es la koza la mas saludoza en el mundo....
Por siguro ke no ! Al kontraryo...Esto es kitar envitasyon
al berahayim ! En el Ishkembedji se vende las partes del
kodrero ke son muy savrozos.  Supa de tripas o de pacha
(los piezes) kavesaz, meoyo, ilgado ....  Nada de lo ke
kale komer... Tosigo por el korason i muestra salud.


En el sentro de Pera se topava el otel i los salones de
te TOKATLIYAN.  Yo abasti a ir una ves solo a este lugar
eksklusivo. Era por el bar mitva de Dogan, el ijo de amigos
de mis paryentes. Oyi muncho de mis paryentes el nombre
de este otel.  Era muy elegante. A la ora del te,
Celal Ince ke era un kantador famozo de tangos kantava
aya i la djente baylavan i pasavan tiempo agreavle kon
sus keridos i kon sus amigos.  Fiestas alavadas se davan
en este Otel frekuentado por evropeyos, artistas,
djente rika i kultivada.  Lo derrokaron antes de los anyos
60.  Yo deviya tener unos 10 anyos...No mas.

 


EL CICEK PAZARI 

Kuando se avla de los lugares enteresantes de Istanbul
i dizen a los turistos ande ir i ke ver, por seguro ke
el CICEK PAZARI  viene en los primeros rangos. No ay
duda ke los palasyos i los lugares historikos vienen
en primero ma immeditamente dospues es mi kerido
lugariko kon sus mil i un plazeres....Todas las kolores,
todas las savores, las golores, el egzotizmo del
oryente i el gusto i modo de bivir del oksidente.
Es un kartye entero ke se puede divizar en tres partidas.

- El cicek pasaji,
- el cicek pazari i
- el aynali pasaj.

EL CICEK PASAJI  se topa arriyento de un edifisyo ke
deve datar del siglo 19. Tiene una arshitektura muy
ermoza i muy ellaborada.  Echo kon muncho gusto i ke
asemeja tambien a los edifisyos de Paris fraguados en
la mizma epoka. El pasaj tiene un tejado muy alto i
serrado. De las dos vandas se topan restorantes de
dos etajes lo mas.  Son "meyhanes" (tavernas)  ande
se beve i se kome  mezes muy muy savrozos, pishkados,
burekas, midyas, patatas, berendjenas fritas.  Las
noches orkestras i bayladoras zinganas kantan i baylan
en kada meza i los klientes les echan paras.  Antes
solo los ombres ivan a estos meyhanes ma dospues se
izo un lugar ande todos se van i turistos por sierto. 
Oy es frekuentado por los estudientes, artistas,
merkaderes, jurnalistos i  personas, komo mi, ke les
plaze los lugares nostaljikos, estetikos  kon savores,
luzes i kolores ke dan plazer.


EL AYNALI PASAJ  tiene mas o menos la mizma arshitektura.
Djusto en frente del cicek pasaji se restoro muevamente.
El tejado es tambien serrado kon ventanas ke deshan pasar
la luz.  En las vandas ay espejos i es por esto ke lo
yaman aynali (espejo) pasaj.  Toda manera de objetos
antikos, vestimyenta i aksesuares etnikos, livros viejos,
pinturas, seramikas muy muy ermozas i mil i una koza ke
miramos kon maraviya i amor se topan en los magazenes
de este pasaj.


EL CICEK PAZARI es una kaleja larga kon otra una kaleja
a la siedra mas kurta.  Es un merkado de mil maraviyas.
El nombre lo tiene de las vendedoras zinganas del tiempo
ke vendiyan flores (chichek en turko) al empesijo de la
kaleja ke da a la grande avenida de Pera. Es el merkado
de magazenes de karne, vedrura i frutas, gaynas i patos,
pishkados....Los mijores pishkados de los merkados de
Istanbul se topan en este merkado.  Magazenes de todo lo
ke empleyamos en muestros mupakes para gizar muestras
komidas alavadas en el mundo entero se pueden merkar en
este merkado. En los anyos dalkavo munchos retorantes
de pishkado se avriyeron en las kalejas ke salen al
merkado.  Ay entre eyos muy elegantes i kon muzika
turka i zingana de noche.  Pera es un lugar kozmopolit
ande se avlava todas la linguas antes.  Las variyas
kulturas se kruazavan todas en esta djoya de la Turkiya. 
Ay anyos ke estan tratando de arrekojer i publikar
dokumentos, livros i enformasyones sovre este sentro. 
Oy tambien es el sentro de la moda, de l'arte, de la
muzika, de los kafes, de los livros i de la vida sosyal,
kultural i entelektual en Istanbul.

 

Sharope blanko

- Copyright © sefarad.org - 1997 - 2018

Retour au site sefarad.org -