Accueil - sefarad.org

Un futuro aleskuro sin la klaritad de la lojika i de la buena volontad

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

UN FUTURO ALESKURO SIN LA KLARITAD
DE LA LOJIKA I DE LA BUENA VOLUNTAD

Reformas... Mas toleransya, ser mas avyertos a
los dezeos del puevlo ke tiene de akomodarse
a los menesteres i a la vida del siglo 21...
Avrir los brasos a los cripto Judyos, a todos los
ke keren azer parte de muestra nasyon !

Parese muy ermozo i muncho mas realistiko de
punto de vista vida etika ma ya lo savemos todos
ke esto no es posivle porke ansina no se puede
lograr una unanimitad ! Kada uno va azer a su kavesa !
No se va pueder ambezar la Ley porke kada uno sera
libre de interpretarla komo bien le parese.
 
Muestros rituales i las tradisyones tyenen raises de
siempre ! Lojikamente no se pueden rechesar. Es por
esto ke ay munchos muevos movimientos en el Judaismo !
Para el judyo mas moderno, para el ke kere paz entre las
relijyones, para el ke no esta "ni aki ni aya"....
 
Lo mijor seriya ke los Rabbinos lejislativos tomen desizyones
i apliken leyes para ke tengamos mas populasyon i no el
kontraryo ! La historya mostra ke puede aver munchos
trokamyentos kon el tiempo. Oy no puedemos saver lo ke sera....
Puedemos pensar i imajinarmos munchas alternativas ma Di-o
i el Destino mos van a amostrar el futuro.
 
No penso ke seriya por el bien del Puevlo Judyo de ser
demasyado strikto, rechesar el "goy" para enserrarse en
un mundo mas spiritual ke aktual. I esto es valable para
todas las relijyones. El mundo deve aunirse i no espartirse !
No es kon vistidos pretos ke se yevan komo bandyera i se
deklara ser diferente de todos los otros ke se yegara a la paz,
a la abolisyon del antisemitizmo !
 
La animozitad no trayera nada de bueno para dingunos.
Los ekilibros se estan frajilizando de mas en mas. No es
un mundo en el kual se puede azer konfiensya ke estamos
deshando a las muevas jenerasyones !
 
Deveriyan de topar remedyos antes ke seya demasyado tadre..
Si ya no esta ! Si no, avra grandes derrokamyentos i una
tresera guerra no puede ser ke una katastrofa. Lo ke es seguro
es ke avra grandes trokamyentos en muestra planeta...
Grasyas al Di-o ke muestros ojos no lo veran...
 
Rogo por el bien de toda la humanitad i el Di-o ke no mos de
a bivir las dezgrasyas ke kedaron en la historya, seya miles de
anyos atras i seya en el siglo presedente, al kual dayinda
apartenemos !

Sharope blanco

- Copyright © sefarad.org - 1997 - 2017

Retour au site sefarad.org -