Accueil - sefarad.org

Kapalicarsi. El grande Bazaar kuvyerto i las avlas de la demanyana

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

KAPALICARSI - EL GRANDE BAZAAR KUVYERTO
i las avlas de la demanyana

Keridos Amigos i mis Amigitas,

Demanyanada alegre i klara para todos.

Tenemos un sielo bleu intenso i parese ke vamos
a tener un diya de primavera verso el medyo diya.
Diya para kaminar en el bodre de la mar, tomar
un kafe o komer en un restaurant ke tiene una
guerta ermoza kon arvoles altos i flores...
Diya tambien de ir al bazaar i komprar todo modo
de kozikas ke mos dizimos entre mozotros
" ah si teniya..... tengo de menester de un.... ets" !
Por egzemplo no me esta plazyendo mas, i de
muncho tiempo agora, de enshuarme kon un
dimalo/serviette komo todos ! No ! Unos tiempos
se uzavan en Turkiya el peshtemal ke es un modo
de savana de koton puro ke se tisan en las kazas i
tiyenen pishkulikos en los bodres. La kolor kuando
se merka es un poko komo el bej klaro, ma se aze
blanka blanka komo nieve, kuando se lava.
Oy no se vendan mas.... Ke pekado, porke eran
muy sanos i valorozos. Ay solo una botika en el
Kapalicharshi, ke es el bazaar kuvierto en la vieja
sivdad, ke los vende dayinda para los ke los uzan
en la Anatolia. Tienen aya el uzo de darles estas
savanas para el ashuar de las ijikas ke se van a kazar.
Yo, los uzo tambien para enshuarme dospues del
banyo ! Ke maraviya de koza !
Le di regalo i a mi ijo unos kuantos... Se tresalyo !

KAPALICHARSHI - EL BAZAAR KUVYERTO :

Tiene 64 avenidas i kalejas... El primer Mall del mundo !!!!
Se empeso a fraguar en 1461 i en 50 anyos kon el reyno
del Grande Soleiman - Kanuni Sultan Suleyman - yego a
su estado de oy. Tiene 22 puertas de entrada.
45.000 metros kuadrados de lugar kuvyerto para 3600
magazenes de todo ma no de komida, malgrado ke ay
unos restaurantes aryento. 20.000 personas lavoran en
Kapalicharshi i dependiente de la sezon entre 300.000 i
500.000 turistos la vijitan al diya. El kueshko de esta
konstruksyon es el BEDESTEN (Cevahir Bedesteni)
(48 m x 36 m) ke es un edifisyo fraguado en el tiempo del
imperyo Bizantino i ande se venden las mas ermozas
djoyas del mundo, ovras de plata i de kovre, de
marfil / ivoire, objetos antiguos, kozas de grande valor
ke kuaji no se topan en otros lugares.... Un sigundo
BEDESTEN (Sandal Bedesteni) tiene su nombre
pormodo ke se vendiya en este lugar una ropa ke se
yamava "sandal" i era tisada kon "kaminos" uno
de koton/algodon i uno de seda, koton i seda, koton
i seda.... Ansina. Esta ropa no egziste mas i si
mismo se topa es antigua i muy muy kara.

Al tiempo, los muy rikos i mismo gente de la korte
del Sultan guadravan sus oro, sus armas valutozas,
sus vestidos de samara, sus djoyas en las kashas
del Bazaar porke se diziya ke es una forteresa ke
no se puediya atakar. Si el Palasyo de TOPKAPI
era la Administrasyon KAPALICHARSHI era la
ekonomiya del Imperyo kon tonas de oro, de djoyas,
de sedas, de plata, de los mas ermozos tapetes ets ...

Mas tadre la Ekonomiya del payis se transfero a
Galata ande se fraguaron las grandes bankas
(Ande biviyan los judyos i se topa la Kula/la Tour,
Bankalar Caddesi, Shishane) - i la Administrasyon
paso al Palasyo de DOLMABAHCHE. (Sieglo 19)

El Kapalicharshi era tambien una grande eskola
ande se ambezavan los mansevos, des de ke eran
chikitikos, diferentes ofisyos. Es el maestro ke
ambezava al chirak/apprenti todo modo de arte i
artizanato. Estos erean renomados en el mundo
entero.
(Se avla del Grande Bazaar en ALMENDRA
i reflekta enteramente el lugar komo era en el
sieglo 16)

El Bazaar konosyo 20 grandes fuegos i terremotos.
Lo restoraron la dalkavo vez dospues del grande
terremoto de 1894.

El Bazaar fue siempre kontado por los grandes
viajadores del mundo, figurado por los pintores
komo una estreya del oriente, fue el korason de
la sosyetad, del komersyo, de los komplotos, de
la politika, de las revoltas del puevlo, de los
amores klandestinos, de los asasinatos, de las
invensyones .... De los espiones, de las
importasyones i eksportasyones a/de otros
payises.
I.. La savana kon la kuala me enshugo dospues ke ago
mi banyiko se vende solo en un magazeniko de este
Bazaar ! Es diya de ir aya ? Me esto haraganeyando !....
Karinyozzzzzzzzzzzzzz

Sharop duls
 

- Copyright © sefarad.org - 1997 - 2017

Retour au site sefarad.org -