Accueil - sefarad.org

La China es mas serka de mosotros de lo ke pensamos

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LA CHINA ESTA MAS SERKA DE MOZOTROS
DE LO KE PENSAMOS....
 
i no solo kon las distensyas geografikas,
pormodo de los aviones ke bolan mijor
i mas presto.... Ya mos vinyeron a la
punta de la nariz..
Un tiempo dingunos pensavan a azer
turizmo en este payis, de toda manera
era komunista i no era permetido. Oy
todos keren ver los muros, una lavoro
kolossal de vedra, i la sivdad eskondida !
Los grandes merkaderes estan aya
metidos, no ay projekto ke la China no
esta emleskada etc. Komo vinimos a
este estado ?
El mundo entero esta endevdado fina el garon
a este payis tan lashos i tan prezente
en muestras vidas... La CHINA !
No kreyo ke kedo en el mundo, del mas chiko
al mas grande payis ke no eche la kulpa entera
de la kriza ekonomika a los esfuersos de los
de los ojikos estirados, a ser los maestros
de las finansas en el mundo.. Eyos, siguidos
de los hindus !
El pueder fiskal troko de manos i de adreso...
Se puediya previzir ? Por seguro ke si !
Nunka se pueden vensir las Leyes de la Natura.
La kuantitad de personas tienen un rolo direkto
en la ekonomiya de un payiz, ademas si estos
estan dirijidos kon una mano de fierro i si se les
demanda, politikamente, de partisipar al intereso,
a la prosperitad, a la teknolojiya, a la produktivitad
del payis, sin por esto ser un puevlo de
konsumadores !
Los komparo a las ormigitas ke lavoran sin kedar
para kontribuar al bien-estar, a la salud, a la
abundansya en sus nidos. Eyos se espyertan i
avren los ojos a un mundo yenno de oportunitades !

EL Ouest esta kansado... Le plaza gastar mas de
lavorar.. Kere todo pronto i nesesita muncho !
Tiene paras i se les puede vender todo... Kon
buena kalitad, kon negra kualitad... Sorven todo
lo ke se les embiya a sus merkados i entremientes
entran Dolares, Euros, Liras Inglezas... A eyos
se les abolta los ojikos estirados delantre de
la Coca Cola i del Mc Donalds, los perfumes
shoronfonfon ma se detienen ! Al lugar de gastar
komo lokos se kontentan de un bol de aroz i de
un pedaso de pishkado salado i seko, o frutas
maraviyozas ke tienen, i pensan komo rovar las
aldikeras de estos blankos i zurzuvis en
prezentandoles kozikas ke les da ganas de merkar,
muevas teknolojiyas, chapeyos ansina i kalsados
de otro modo, alikas i tumbanikas ke asemejan al
arte antiko de las famozas dinastias kinezas,
miliun objekto ke la gente merka komo moshkas
ke toparon miel, porke es barato, estetiko,
praktiko i muevo en el merkado !
Eyos se kontenten de poko... Poko a poko el
poko se aze muncho ! Se inchen tinajas, se vazyan
a los kuentos en bankas i s'aunflan las aldikeras...
Son muy munchos...

El blanko i el zurzuvi avren fabrikas en sus sivdades,
en sus kampanyas... Lavoran por un bokadiko de pita !
No embarasa ! Tienen echo i se artan. Sus ijos se
ambezan komo ser komo estos blankos shavdos ke
kuryozamente adoran paras ! Son diferentes de eyos !
Keren ganar igastar ! No les importa nada mas...
Si ! Mujeres ! Ke las tomen ! Ay munchas ijas....
Si solo eran limpyos i no traiyan hazinuras !...
Ma tienen Dolares, Euros i kon estos se merkan Yuans !
China komunista kon 1, 3 Milyar de puevlasyon...
kon 9, 6 Milyon kilometros kuadrados de tierras...
Kon 22 provinsyas, 5 rejyones autonomas,
14,500 Km de bodre de mar
Kon el Yang-Tse, el treser mas largo riyo del mundo i
el riyo amariyo ke es el sejen mas largo riyo del mundo
ke nasen en el TIBET para echarsen al Pasifik....
Oy, el "super-power" del mundo...

Sharope blanco

- Copyright © sefarad.org - 1997 - 2017

Retour au site sefarad.org -