Accueil - sefarad.org

YOM HAATZMAUT...Buen Aniversaryo Israel ! ​14 de Mayo 1948 - 14 de Mayo 2014

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Israel is Born

YOM  HAATZMAUT.....
BUEN ANIVERSARYO ISRAEL !

​14  de  MAYO  1948   -    14  de  MAYO  2014

SELEBRAMOS EL  SESENTA I SINKEN  (65)  ANYOS DE VIDA DE MEDINAT YISRAEL....
 
PARA SIEMPRE.... MAS PODEROZO, MAS FUERTE, MAS PROSPERO I MAS VAYENTE KADA ANYO !   KON ALEGRIYAS I  BAYLES I KANTOS I SUS BANDIERAS SIEMPRE ALTAS...AMEN !
 
HAG SAMEAH !

Sharope blanco
 
 
 
MI ERMOZO PAYIS
 

SIENTO TUS VENAS VIBRAR EN MI,
TENGO TU SANGRE DEL DIYA KE NASI.
KONOSIYA DE SIEMPRE LO KE VI EN TI. 
ES KON SORIZAS I JOYA KE POR TI KANTI.  
 

ISRAEL, MI TIERRA, MI PAYIS, MI ALMA..
KEN SO SIN TU FUERSA, SIN TU FAMA ?
SIN  TODO LO KE LOGRATES DE NADA ?
LA SEKURIDAT KE MOS DAS KON TU EGZISTENSYA.
 

TUS VIZINOS SE SELAN DE TUS BIENES,
DE NADA I DE TODO LO KE TIENES.
ENVIDYAN  LO VEDRE I LAS FLORES
EN MEDYO DE LA SUSYEDAD DE SUS SIVDADES
 

NO LES MANKA MEDYOS  PARA PROSPERAR
ARRESIVEN TODO I NUNKA MANKAN DE YORAR
KEREN YERUSHALAYIM  I  SIEMPRE MATAR
NO SE ENFASYAN DE KESHARSEN I DE MENTAR !
 
 
NO AYEGARAN A VER TU DESTRUKSYON
MIZMO SI LO DEZEAN DE TODO KORASON !
SE OLVIDAN KE ES DI-O KE TE SALVO DEL PHARAON.
DE EGYPTO,  ANDE SERVYO FUITES SIN RAZON...
 

TU PUEVLO SELEBRARA TUS ANIVERSARYOS,
TUS FIESTAS, TUS FESTIVALES I TUS DIYAS SANTOS
POR OTROS MILES I MILES DE ANYOS GLORYOZOS
TUS BANDYERAS SERAN LA JURA DE TUS SOLDADOS
 

KEN ME MIRA KON OJOS INCHIDOS DE ODYO ?
DEMANDA MI IDENTIDAT POR VER SI SO JUDYO ?
TRESPIZAREMOS VAYAMENTE  EL ANTISEMITIZMO !
ADELANTE !  ARRESPONDELES KON ORGULYO !
 

ISRAEL, TIERRA DE ABRAHAM, YITSHAK I YAAKOV
OY,  SUS AVIONES ESTAN PRONTOS EN SDEY DOV !
SUS IJOS MIRAN KON MIRADAS KOMO  SENTEYAS
LESHOS AL HORIZONTE I A SUS INVENSIBLES FRONTIERAS.
 

KEREMOS PAZ,   NO PUEDEMOS DURMIR KON BOMBAS !
NO KEREMOS KE AYGA MUERTOS, BASTA LAS VIOLENSYAS.
BASTA KON LOS JIHADISTOS, HEBOLLAH I HAMAS
NO TENEMOS VIDAS BARATAS PARA AKSYONES TERRORISTAS !
 

GRITA TU ALEGRIYA EN ESTE ANIVERSARYO !
VEN AUNATE A MUESTRO HORA I A ESTE KANTO
KE EL KUMDITZ ILLUMINE TU KARA I EL SIELO
ES MUESTRA FIESTA. YOM HAATSMAUT SIN KAVO !
 

Sharope blanco
El  4  de Mayo  2014
 
 
 
 
SO JUDIYA !

Muestra kondisyon, en  ISRAEL, nunka fue mijor de oy !!!
Son los medios solo ke azen kreyer a la gente ke se aserka la fin del Mundo !
 

A penas 70 anyos pasaron de kuando los Judíos fueron exterminados komo kodreros en el abatoryo...    En akel tiempo ISRAEL  no egzistiya, no saviyamos komo defendermos  i por seguro ke no teniyamos una armada. 
 

Immediatamente  dospues de la Deklarasyon de la Independensya siete payizes arabos mos deklararon la guerra.
 

Eramos  650.000 Judíos kontra el resto del mundo arabo.  No teniyamos aviones ma teniyamos un chiko grupo de vayentes mansevos ke no teniyan dingun otro remedyo ke de guerreyar porke no teniyan ande irsen !  Tuvyeron ke kombatir las fuersas armadas del Liban, de la Siriya, del Irak, del Jordan, del Egypto, de la Libya i de la Saudia.
 

Las Nasyones Unidas mos aviyan  "regalado"  un payis, los territoryos del kual eran  65 porsien  dezyerto !
I.....Empesimos reelamente de  ZERO.
 

Antes de unos 40  anyos solamente tuvimos ke guerreyar de muevo kon los 3 payizes los mas fuertes del Medyo Oriente.  I..GANIMOS  !
 

Durante los anyos ke pasaron tuvimos ke enfrentar las koalisyones de 20  payizes arabos kon armadas modernas i armas i munisyones Rusas.   I....GANIMOS !
 

Oy, tenemos un ermozo payis,  una armada poderoza, los mijores aviones, fuersas marinas egzemplarias, una industria ke enflorese mas i mas kon alta teknolojiya.  IBM, INTEL, MICROSOFT, todos se topan en ISRAEL de ande operan sus negosyos i fabrikan sus produktos...
 
 

Muestros doktores son nombrados en el Mundo.  Ganaron premios importantes en investigasyones scientifikas i medikal.  Muestros hospitales estan yennos de ajenos ke vienen a ISRAEL  para rekuperar sus salud.
 

Transformimos el dezyerto en tierras agrikulturales.   Somos konosidos  por muestras naranjas, las flores i las verduras ke son produktos ke eksportamos al mundo entero.  Muestra agrikultura es la konsekuensya del ingenio de spesialistos ke lavoran kon alta teknolojiya.

I..... El dezyerto prospero !
 

Embiyimos muestra propria satelita... Tenemos TRES satelitas 
en el Espasyo.   I.....estamos bien akompanyados al lado de los Estados Unidos   (280 Million de habitantes)   Rusia (220 milliones), China (1.300 millones) i Europa (Fransia, Inglaterra i Alemania,  mas de 200 millones enjuntas)    Somos los solos payizes en el Mundo ke plasaron  satelitas en orbito en el Espasyo !
 

No lo deklararemos ofisyalmente ma..... el mundo entero save ke mos topamos entre los muy pokos payizes ke detienen la teknolojiya i la kapasitad nuklear.
 

Todo esto pensando ke solo antes unos 70  anyos estavamos rechesados, persiguidos, arrekojidos por ser assasinados....
No teniyamos dinguna esperansa... Biviyamos ambyertos, en espanto  de la tortura Nazi en Europa, en el Norte de Afrika i en el Medyo Oriente....  Mos arrastimos afuera de los krematoryos, kuero i gueso, salvandomos unos kuantos de las flamas....  Ganimos guerras i kon un pokito de nada fraguimos lo ke tenemos,  piedra dospues de piedra.....
 

I... Agora ken mos terroriza ?  Un lider del mallogrado HAMAS?  Nasrallah jurando por el Hezbollah ?  Unos terroristos drogados ?  Los ke solo sonyan de derrokar ISRAEL?   Los enemigos  ke de siempre fueron antisemitos?
 
Mos engleneyan i riyimos !
 
 
Kuando selebramos muestra Independensya, primero el Di-o, no mos olvidaremos ke este diya sakrado reprezenta ke sobrebivimos a TODO  !

A los Gregos
A los Romanos.
A la Inkizisyon Espanyola
A los pogromes Rusos.
A Hitler, a  la Alemania i al Holocausto.
A las armadas de siete payizes i mas i mas......

Seyash  trankilos ermanos, ermanas..... 
Sovrebiveremos tambien a los ke mos importunan oy !
Nunka muestro puevlo estuvo en un mijor estado.
Akodravos ke  kualker payis ke tiene la intensyon de
eliminarmos de la Tierra nunka lo lograra.  Egzisteremos perseverando i prosperaremos kon el ayudo de Di-o !

Ke le afito al Egypto ?  Ande disparesyo este imperyo, el mas fuerte de akeya epoka kon los pharaones a su kavesa i ande eramos siervos  ?
 

I el Imperio  Grego kon  Aleksandro de Makedonya a su kavesa ke konkisto payizes fina las Indias..... ?
 

El Imperyo Romano kon su enorma fuersa  ? Ken avla en su kaza Latino oy ?  Aviyan krusifiado o echado a las flamas o a las bestias ambyertas i salvajes miles i miles de personas ke rechesavan la idolatriya i kreiyan en Di-o !
 

El Treser Reich ?  (Yemah shmo u zihro) Kon su imajinasyon del mas grande Imperio Aryan en el mundo !!!!  El ke embiyo a  matar sus soldados en las tierras de los Sovyetikos ?   El ke kemo i tosto la Europa ?  Se dyo la muerte kon una bala a su kavesa en los bunkers suterrenos komo un raton !

I mirad ande mos topamos mozotros, la nasyon de la Biblia !
 – des del esklavaje en Egypto... -  Avlamos dayinda el Hebreo,  la mizma lingua de miles i miles de anyos !  Agora, en las mizmas Tierras Santas Apprometidas....

Puedeser ke los Arabos no lo saven dayinda ma  somos una nasyon eterna i todo el tiempo ke konservaremos muestra identitad kedaremos eternos kon la Mano de Di-o.
 

De modo ke, perdon  por no preokuparmos, kesharmos, mauyar o espantarmos !  Estamos buenikos en muestra kazika i los echos van florisando !  Siempre pueden ser mijor, klaramente.... Ma diremos "Grasyas al Di-o".
 
 
No agash kavzo a lo ke gritan i inchen las televizyones, las gazetas !  Estos nunka mensyonaran muestros festivales en Israel i la alegriya de los Israelianos salyendo de sus kazas para selebrar kon amigos... Gozando de la libertad i de los derechos humanos, de la justisya i del modernizmo de muestros diyas, de todo lo ke los payizes los mas rikos tienen i mas  !
 
 
Es vedra ke de vez en kuando estamos muy tristes i en dolyo porke muestros enemigos, en akel momento, estan en fiesta pormodo de la sangre ke mos rovaron kovardamente, kruelmente, en vano, solo por vazyar sangre judiya...... Kon envidya i selo... Por el plazer !
 
 
I ESTO sera la razon por lakuala seramos prontos SIEMPRE para luchar  i venser !  Prezervaremos muestros keridos i muestra egzistensya para glorifikarLO,  reingrasyarLO,  alavarLO,  DI-O TODO PODEROZO EN ESTE MUNDO I EL OTRO.
 
 
MOS SENTIREMOS KON LA KAVESA ALTA , ORGUYOZOS  I  NO MOS AVERGUENSAREMOS  MAS DE DIZIR KE SOMOS JUDYOS !
 

Traduizido, arranjado, editado i eskrito por
Sharope blanco
inspirada de un eskrito anonimo diffuzado en el Internet.

- Copyright © sefarad.org - 1997 - 2017

Retour au site sefarad.org -