Accueil - sefarad.org

Una noche de enverano kon Frederico Fellini

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

UNA NOCHE DE ENVERANO KON FREDERICO FELLINI


(  "Rekuerdos dayinda bivos"  -Lo ke vide I lo ke bivi-    por  Sharope blanco )


Ay muncho tiempo ke esta Sharopika no tomo su pluma enla mano i vos eskrivyo sus bavajadas !  Esta vez fue mi ijiko, antes kuaji 2 mezes, ke me disho de eskrivir  komo paso una noche de mi vida antes muncho tiempo.... Una noche de enverano en 1973 kuando teniya  29 anyos, ya estava divorsada i mi ijiko teniya 5 anyos..... 29 anyos ?  madre ?  ya divorsada ?   No !  Esto no se viya del todo de mi persona ke reflektava la energia, la luz i la freskor de la primavera.....


Estava ganando mi pan en lavorando komo asistenta del Prezidente de una de las mas grandes kompaniyas de Turkiya.   Uno de sus projektos era de fundar una fabrika ke iva produizir aviones fina  10  - 12  pasajeros  I por esto deviya kollaborar kon el, en akompanyandolo en su viaje a  Italya  ande deviyamos kontaktar personas i kompanyias relatadas a muestro projekto.  

 Italya en Augusto se estava evaporando de kalor !   Estavamos en Roma i lavorando de la demanyana fina kuaji medya noche kon los munchos shoronfonfones (!)  kon ken mos enkontravamos....  Unos simpatikos i otros mursas !   Unos keyf de estar endjuntos i otros kon loskualos el tiempo no pasava, avlando de kozas teknikas, ekonomikas, komersiyales.  En estos momentos pensava a mi yegada a mi kamareta sharanfanfon al hotel,  i al instante ke iva entrar aryento del  banyo perfumado, serrar mis ojikos kon los sonidos de una dulse muzika, al lugar de la boz de mi boss ke arrazgava mis oyidos !....


Mi boss teniya amigos en munchos lugares del mundo...  En Italya, konosiya una mujer, amiga intima de su espoza, a la kuala me prezento tambien, una tadre ke vino a vijitarlo al hotel ande kedavamos.  Akeya noche el la yevo a komer afuera i yo,  profitando  de la okazyon, partisipi a una vijita de la sivdad i de la Villa Borghese ke no konosiya dayinda.  Fui enkantada !




A la demanyana, kuando estavamos dezayunando, mi boss me disho ke su amiga lo aviya envitado a un grande parti en su villa  serka de Amalfi    http://en.wikipedia.org/wiki/Amalfi    i ke pensava ke me iva azer plazer de partisipar a esta nochada....  Mos ivamos ir kon un sierto Sinior (no me akodro del nombre agora)  ke mos iva tomar del aeropuerto kon su avion privado.




Seriya muy falso si diriya ke mis ojos no briyaron de plazer en akel momento... Solo, komo me iva vistir yo por ansina de noche ?   Presto presto le respondi ke lo reingrasyava i ke seriya absolutamente enkantada de irme kon el !




El diya entero teniya la kavesa en el parti !!!!   Me parese ke mi boss se rendyo kuento i le afito de soriyir unas kuantas vezes !!!!


Al otro diya, yo no lavori i mi boss tambien no lavoro a parte de una entrevista ke teniyamos a las 11 de la demanyana i a lakuala yo no partisipi.  Mos fuimos kada  uno de muestro lado, el a gozar de su diya de libertad i yo pensando a aparejarme por la noche, kon el entusiazmo I el espirito de una manseva en el diya de su boda !
En kurto, pasi el diya eksitada delantre del espejo, demandandome mil kestiones sin repuestas, alokada de plazer i de esta  aventura tan inesperada ! 



Desidi de vistirme el fostan preto largo ke aviya merkado en Bodrum ande aviyamos pasado las vakansyas las kreaturas i yo akel anyo.  Este fostan era en realitad un fostan para ir a la plaj, emprimado kon motivos turkos de kolor blanko.  La ropa de koton, tissada espesialamente i solo en Bodrum, era muy barata i muy fina al tokar.  Lo mas interesante eran el kolye, las maniyas i los dos aniyos ke kompletavan este fostan i ke aviya komprado el mizmo diya !  Piesas de plata kon motivos orientales i piedras de agata.  No toki mis kaveyos largos ke kedavan bien naturalamente i pensando ke ya estava mas atraktiva de lo ke kaliya, mi makiyaj era lo mas livyano posivle...


De toda manera, aviya pensado ke nunka de mi vida puediya mezurarme a la elegansa egzajerada de las invitadas ke ivan a egzibir sus kostumes sinyados por los mas grandes kuzenderos del mundo, i no me yerrava ! Dunke, la sola alternativa ke me kedava era mi imajinasyon i la orijinalitad !  Ke intuisyon buena aviya tenido de trayer mis kompras de Bodrum kon mi !


A la tadre, antes ke el sol se eskonda detras de los tenebros, estavamos prontos para irmos al aeropuerto.  Mi boss me disho ke asemejava a una mujer salida de los kuentos de Las Miliunas Noches ! Sus ojikos yennos de admirasyon me konfirmaron ke aviya reushido i no aviya dinguna razon para sintirme aminguada delantre de la gente ke iva enkontrar akeya noche.




Mos tomaron al salon VIP ande vinyeron Gi i su espoza. (Me akodri del nombre del Sinior)   Yo estava tremblando kuando mos asuvimos a la chika koza ke asemejava mas a un jugetto ke a un avion !  El era el pilot i aviyan otros 5 lugares para los pasajeros.  Durante el viaje ke duro muncho tiempo a mis ojos, se avlo solo de las muevas teknikas i muevos modelos de aviones privados.  Me rendi kuento ke estavamos bolando a la rapides kuaji de un otomobil i no muncho mas rapido !  O, es solo a mi ke me paresyo ansina ?  No esto segura...


Amalfi estava espandida kon toda su splendor a muestros piezes.. Viyamos de las ventanikas del avion los montes vedres i las primeras luzes de la noche.  Viyamos la mar kon spumas chaftando a las rokas, las villas de los muy rikos i las estrechas kalejas.  Un momento,pensi ke iva ser muncho mas mijor para mi si me deshavan libre akeya tadre en la chika sivdad, al lugar de yevarme a este parti de la jet-society de Europa !  No konosiya dingunos i la verdad, no saviya del todo komo estas nochadas se pasavan !




La chika pista ande abashimos se topava en el park mizmo de la somptuoza villa ande se dava el famozo parti !  Las guertas, todas kon guirlandas de flores eran adjasentas las unas  a las otras, kada una kon karakteristikas distintas.  Me demandi si me topava en algun paradizo !  No aviya visto nada dayinda !




Aviya muncha gente i kuando yegimos en frente del edifisyo, vimos un grande espasyo entero de marbro, abasho de las dos eskaleras de marbro tambien ke yevavan de dos lados al interior de la villa de stilo romano kon sus kolonas, su architektura i sus detalyos de la antikitad.




La damma mos aresivyo kon muncha amistad, sorizas i mos abraso a todos.  Deviya tener los  sinkuenta pasados ma era fina, muy muy elegante i muy amable de verdad.  Pishin mos disho de sintirmos en muestra kaza i de pasar una nochada agreavle en profitando a muestro gusto.  Mos amostro la pisina illuminada de kolor turkuaz al bodre de lakuala por la primera vez de mi vida vide mayos de banyo tan luxuozos, mayos de noche (!!!)  brodados de piedras komo diamantes o de kolor, ermozuras !  Ke pekado ke no teniya una kamera ma mizmo si teniya, no kreyo ke iva pueder utilizarla... Akeya noche, no se deke, no se toma dinguna fotografiya i no egzistiyan telefones selulares shoronfonfon !  A penas aviyan yegado televizyones pretos i blankos a la Turkiya....
Avansimos a la derecha del edifisyo ande aviyanaparejado los bufetes avyertos de un pranso inkreyivle !  El bar ofresiya, me parese, lasbevidas ke puediyan toparsen en toda la planeta !  Los servitores estavan vestidos kon sus kostumes proprios a los payizes de los kualos eran orijinaryos.  Vide hindus, aziatikos, pretos i europeos por seguro tambien.  Mi boss me konto ke el anyo entero muestra hostessa es envitada en los partis de la jet-set en variyos payizes i los ke se dan en los yachtes. Eya arresive esta gente una vez al anyo en esta villa ande pasa el enverano.  No demandi sovre su marido i si teniya ijos ni otra koza mas de lo ke oyi i a parte de mi ijo, muy muy pokos son los ke saven ke konosi Amalfi de esta manera !
EL orchestre ke jugava alternativamente muzika klasika i muzika popular en el redondo de marbro enfrente de la villa, aviya empesado a jugar las primeras valses.  Fue la sinyora de la villa Casarella ke empeso a baylar en primero i munchos la siguieron dospues.  El orchestre troko mastadre i empesaron a kantar i a jugar las kantikas a la moda i los de los anyos 60 ke dayinda me namoro por eyas !

Las luzes de las guertas i de la villa estvan mas luminozas kuando la noche abasho enteramente i se viyan un kuarto de luna kon las estreyas del firmamento.   Estava prezente en un mundo deskonosido de mi fina akel diya.   Konosiya la rikeza ma no me puediya imajinar un nivel asemejante...
Mi boss aviya dezaperesido i yo noteniya la intensyon de apegarme a el deespanto de no saver kualo azer kon mi persona.  La verdad es ke malgrado mi timides a esta epoka (no mas agora !) no teniya kompleksos i keriya ver todo lo ke me paresiya ekstravagante !  Por empesar no me privi de nada i gosti de los platos dekorados por los mijores chefes !   Sukkulente, rikissimo todo lo ke meti en boka.   Ke pekado ke yo no  saviya i no se dayinda komo bever  bevyentas alkolizadas, vinos, whiskies !  La noche entera, me kontenti de sumos de frutas de todas las kolores en kupas  altas, doradas, desinadas, prizmatikas......Tengo una passion por las ermozas kupas !




Me asenti en una siya repozada al ladode la pisina kristalizada kon puentes dekorativos ande aviyan gente ke se benyavan.Los miri komo se komportavan, oyiva lo ke diziyan a boz alta, lo mas en Italiano ma en Inglez, en Espanyol, en Aleman i en Fransez tambien.  Nada de sezudo !  Lo mas de eyos flortando de manera la mas stupida sin dar importansya si eya o el eran kazados i mizmo sus espozos i espozas se topavan  aya..... Vide la feyor eskondida en la elegansa, en las rizas, en la moneda ke eskuriya de sus bokas....No me izo dingun mal, al kontraryo....Lo topi muy divertido  !


 
Kamini en las guertas i me kansi pormodo de los talones altos de mis kalsados. Entri en la villa bushkando toiletas kuando enkontri  tres mansevas tan ermozas ke me se korto el reflo !  Guay si era hombre !
Eran muy simpatikas i se metyeron a avlar kon mi.   Estavan avlando en Inglez ma un Inglez ke no me suonava de Inglaterra.  Me demandaron si era yo tambien  una figurante o una kantadera !  Me se alevantaron las sejas !  Me disheron ke son de Malta i konosyeron unos sineastos ke las invitaron al parti.  Me disheron ke era el mijor lugar de travar la attension de algun direktor de filmos o produktor para los deskonosidos o las deskonosidas del mundo sinematografiko..  Les dishe ke no era mi entisyon de arrankar un rolo en algun filmo... Se riyeron pensando al kontraryo...
Dospues entri en un salon muy konfortavle kon mueblos de kuero blanko i una flaka luz ke no se de ande viniya....  No aviyan dingunos.  Me asenti medya espandida i pensi ke puedriya durmir diyas enteros en este salon !  A penas se oyiya la muzika de afuera.   
Supito entro un hombre aedado, un poko godro, kon raros kaveyos grizonantes ma miradas de braza ke entravan fina el estomago, porke sinti mi estomago ke me pinchava !


Lo hora mostrava las 1 de la demanyana passada.  Empeso a avlarme en Italiano  :


-  Sinderella kansada dospues de las 12 ?


Le respondi en Italiano  

-  Si !  Tengo esuenyo i para todos en este parti la nochada viene solo de empesar !


Se riyo.  


-  No sos Italiana !  De ande sos ?

-  De la Luna por los de aki.


-  Tu saves mi nombre ma yo no konosko el tuyo !


-  Yo no se ken sos !

-  Dime otra koza !  Komo supites ke vo vinir aki ?


-  !!!!

-   Keres un rolo ?


lo disho en Inglez esta vez.

-   Si !  El de Drakula !


-   Yo no ago filmos de Drakula ni filmos para kreaturas !


-   Me vo raramente al sinema.

-   Hahahaha.... Alora no saves ken so... Si ?


-   No !  El rey de Italia o el de la Mafia ?


-   No !  El rey de los filmos.  So Fellini.


-   Ah !  No se ve ke sos un gato !  I no konosko dingun otro Fellino !

-   Ke azes en tu vida mas de gastar lo ke tu padre te da ?


Lo puediya chaketonar !   Me kedi kayada delantre de su arogansya.  Le dishe  :


-  Kontame un poko ken es Fellini !


-  No vites la "Dolce Vita"  ?

-  Si !  En este lugar.  


-  No !  El filmo kon Anita Ekberg 


-  No !  Un buen filmo ?

-  Mi filmo !   Todos lo vieron !


-  I mas ke azes a parte de filmos ?


-  So el espozo de Giulietta Messina.

-  No la konosko tambien.


-  Ande bives ?  Vo kreyer ke vienes de vedra de la luna !


-  So Judiya de Turkiya

-  Ah !  No pareses !


Esta vez fui yo ke riyi.  Vino a mi lado i se asento muy serka de mi.Se rendyo kuento de la stupides de su komento !


-  Pareses mas mansevo i mas atraktivo de leshos !


-  Es tu manera de dizir "va asentate leshos de mi"  ?


-  Es komo lo entiendes....  

Se asento mas aya ma no estava mas soriyendo.


-  Mostrame por shakas (para riyir)  si saves tomar un rolo.


-  Ke grande koza !  Todos lo pueden... Nada de sientifiko para el Nobel.

-  No te lo demando kon toda mi seryozitad.


-  I.... ke keres ke aga ?


-  Toma este telefon  (mostrando el telefon blanko)  en el chiko mueble en frente de ande     estavamos asentados)  i avlale a tu madre sin ke eya te oyga.   Dizele ke no vas a entrar a kaza.... Avlale kon  dulsor, peleyate, kontale  ets.....


-   A vos ordres Monsieur !  Solo yo avlo kon mi madre en Fransez...


-   A la buena hora !  Avlale en Ruso si keres !   A parte de esto yo avlo Fransez !


-   OK.

Me alevanti de mi lugar, tresalida de este divertimiento.  Koza grande ke kijo !  Le iva mostrar ke manera de Brigitte Bardot yo era !  Tomi el telefon.  El sonido stupido de la linya me dezrepozava. Lo torni a la roves i empesi a avlar komo si le avlava a mi madre de vedra.  Yo-mizma estava enkantada de lo ke topava de avlar en modos diferentes...  Dospues ize komo si le estava kontando mi enkontro kon un hombre (i me meti  a kontarle Fellini !) delkual me sentiya namorada, ansina i ansina, triste en momentos, riyendo komo una loka a vezes, asentandome en basho, muy inyervada mas dospues... Una lokura !  Le embiyi bezikos por telefon a mi madre ke no estava mas en este mundo povretika.....


Fellini estava sudando i alimpyando su frente kon la rida immakulada ke tiro de su aldikera...


-  Fantastiko !  No es posivle ke no izites  kursos de aktuar, de sena, de sinema.....  No te kreyo si lo niyegas !  Jugates muncho  mijor de una artista eksperyensada.  No me  digas no !  Ven al studyo i travaremos unas  kuantas senas de filmo !  Kero ke los otros te veyan tambien.  Dospues te avro todos  los kaminos...


-  Grasyas Sinyor Fellini ma torno a la luna en dos diyas i estare muy okupada fina ke me  vo ir a el aeropuerto !  Ademas so una  chika empleyada i konto kontinuar a lavorar en mi echo.  Dolce vita, sinemas, fortunas,  fama i la grande vida no es lo ke bushko en mi vida.  Ma me divertyo muncho aktuar para vozotros.  Era una honor !


-  Ven afuera... Tomaremos un poko de aver i veremos si va pueder konvenserte esta noche.


Me dyo su mano i mos alevantimos endjuntos.  Salimos i todos mos vieron abashando de las eskaleras mano kon mano !   Dospues me travo a baylar.   Baylimos sin kedar !  Los ojos de todos los invitados estavan ensima de mozotros, seguros ke yo era la mueva konkista i la siguienta "star"  de Fellini !   Mi boss estava aya kon su kupa en la mano i avlando kon la sinyora Paola, la duenya de la Villa Casarella, i otros invitados a sus lado.  Me ize entera kolorada, kije enterarme biva !   Kualo iva pensar !  Me fui a su lado ma Fellini vino detras de mi !  Le konti a mi boss lo ke Fellini me propozo.  Empeso a riyir.  Le disho  :


-  Sinyor Fellini, konosko mi asistente de munchos anyos.  No kreyo ke es el tipo de persona ke vos puede konvenir !  Es una madre muy dedikada a sus ijos i le gusta muncho lo ke azemos endjuntos.Tyene una ermoza karyera ande mozotros  i no kreyo ke le manka koza para dirijirse  a un kamino tan difisil, tan kompetitivo i  tan inseguro, en un otro payis... I la vedra  no esto pronto a desharla irse !


-  La chika empleyada !  Vos do razon !  Es un perla de persona kon munchos talentos.  Fui enkantado de konoservos i de konoserla... Cinderella !  Azeme un  signo, mizmo de la luna, si trokas de ideya...


-  A vos ordres Monsieur !  Vos auguro lo mijor en vuestros filmos i en vuestra vida  kon la Sinyora Messina.  Abrasala de mi  parte.  


Esto fue todo....  A la torna me sintiya livyana komo una pluma, felis, kon un grande dezeyo de lavorar i mostrarle a mi Boss ke era perfekta en mi echo, komo en aktuando delantre de  Fellini kon un telefon tornado a lo roves !


Sharope blanco 

- Copyright © sefarad.org - 1997 - 2018

Retour au site sefarad.org -