Accueil - sefarad.org

Ayyyyyyyyyy ke koza regalada ke so yo, a parte ke so muy ermoza !

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

NUNKA ENTENDI PORKE ESTOS SERES TAN GRANDES KE KAMINAN KON SUS DOS PATAS SOLO SIENTEN EL DEZEYO
DE TANTO KARESARMOS......
 

Ayyyyyyyyyy ke koza regalada ke so yo, a parte ke so muy ermoza !
 
Me ize autora agora en eskrivyendo para LA MAS GRANDE REVISTA VIRTUAL DE EUROPA !  La revista de Moise Rahmani por lakuala mi Sharope blanco, la sharanfonfon de  SEFARADIMUESTRO  eskrive tambien...  Lo ago kon grande plazer porke esto segura ke va ser por la primera vez ke vash a meldar  una OVRA  de gatita !

Me yamo  "PAMUK"   ke kere dizir  "algodon"  en Turko porke pensaron ke los pelos blankos de mi adorable puerpo asemejan a esta yerva sin savor !  Tengo 2 anyos....
 
Vo empesar en kontandovos mi egzistensya.....
 
Siempre no fui la prinssesa de mi kaza...  (La ija de Sharope ke no me oyga porke le parese  ke es eya la prinssesa en kaza!)  Nasi en las kayes.....  Mi madre era una de las miles i miles de dezmazaladas ke luchava para kedar en vida, ademas kuando nasimos mis ermanos i yo i ke deviya alimentarmos kon lo ke no topava de komer...  Muy triste su historya...
 
Yo era ermoza i parese ke es esto ke me salvo de murir de ambre o de hazinuras en las kayes.... Los sesh primeros mezes fueron katastrofikos... Ni me kero akodrar de akeyos tiempos ! No saviya komo abrigarme del friyo en invierno i ni komo pueder suportar la ser mas tadre... No topava agua i esto era mizmo mas duro ke de durmir ambyerta, espantandome de los perros ke keriyan komermos puedeser porke eyos-mizmos estavan muy ambyertos...  A vezes unas personas mos echavan unos restos de sus komidas ma eramos tantos gatikos ke nunka me arti...
 
 
Lo mas krual en mi vida fue kuando me violaron, no me akodro kuantos gatos los mas negros ke puedan egzistir, i me desharon prinyada kuando tenia solo 6 mezes de vida.  Ni entendi la razon por lakuala me sintiya tan dezrepozada, tan diferente, tan kansada !  Mi tripika estava redonda i no topava repozo en deskansando....
 
 
Es en esta epoka, en Juin 2013, antes un anyo i medyo ke Sharope vido en ke estado me topava i su dulse korason no permetyo ke sufra mas...  Me tomo esn sus brasos i me yevo a MI PALASYO  !   Es de este diya adelantre ke so prinssesa.....
 
 
Dospues de lavarme ,  - el dio FELIN ke nunka me aga konoser de muevo ansina de dezgrasya-  de enshuarme i penyar mis pelos, fuimos a una klinika.  Me TORTURARON  kon algujas !   Vaksinos aki vaksinos aya de la parte de uno ke no paresiya del todo a Sharope blanco, sus vistidos la kolor de mi rika samara !
 
 
Dospues todo lo mal, las sufriensyas, los espantos, la ambre, las negriguras pasaron...Empeso mi vida de gatita regalada, arrepozandome, durmyendo lo mas, komyendo todo lo ke dezeyava i kuando solo lo keriya...  Lo ke no me gustava del todo era ke me tomen en brasos !  Nunka entendi porke estos seres tan grandes ke kaminan kon sus dos patas solo sienten el dezeyo de karesarmos tanto !  Ma.... A vezes lo nesesitamos i si no mos karesan, mos vamos a sus lado i azemos todo lo posivle para ke mos karesen.   Ahhhh  ke dulsor es esto kuando me espierto o kuando esto kansada dospues de jugar kon mis jugettes !
 
 
No lo esperavan ke iva pueder parir mis bonbonikos normalmente porke era muy chika.   Ma, grasyas a FELIN, todo paso bien i Sharope i Bilge no me desharon solika  ni un instante.  Fregaron mi tripika kon dulses bozes i no me espanti.  Pari 2 ijikos i 3 ijikas luzyas....  Ke pekado ke  TIKIR,  una de mis ijikas,  mi ermozura, prefero entrar al Eden de FELIN kuando teniya 3 mezes solo.  Sharope dayinda la yora.... Vos embiyo una foto suya i una foto miya tambien, ademas una foto dospues ke paryi mis bonbonikos. 
 
PamukMy new born jewelsTikir
Tengo dayinda de kontarvos muy munchas kozas.....  Eso era solo para konosermos un poko !  
 
Mrrrnauuuuuuuuuu
 
PAMUK

- Copyright © sefarad.org - 1997 - 2017

Retour au site sefarad.org -