Accueil - sefarad.org

Fiestas del Fin de Anyo

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

FIESTAS DEL FIN DE ANYO...


Adjile no ay !   Dayinda tenemos muncho tiempo para auzarmos a la ideya ke Pesah en Australia se fiesta serka del invyerno i no en Primavera ! Porke ? 
Porke las temporadas son a la roves en la hemisfera del sud de muestra chika planetika !

A mi me viene muy tuhaf la ideya de papa Noel  en las plajes !   Yani fin de anyo, al lugar de nieve i friyo, banyos de mar, sol, surf  ets...  Lo mizmo para la
Amerika Latina i todos los payizes debasho del Ekuator.. Esta riga imajinarya ke egziste solo en las kartas geografikas ke mos ambezavan en la eskola...
Kuryozo la intelijensya del hombre.. No ?

Un mundiziko yenno de surprezas, de ermozuras, de kolores bivas, de luz i de estreyas, de animalitos maraviyozos ma i guzanos i serpientes i tiralanyas i
eskorpiones dezgrasyados tambien tenemos.... I krokodiles..Manko los vere ! Las pirhanas i los voltures, el rekino (tiburon ! - shark)  no los kero bien del
todo... Brrrrrrr Me entezan la sangre !

Kon esto, Australia es un paradizo de todo bueno ademas kon las koallas muchi muchi kuchi kuchi  i los kangurus zip zip zip.  Ayyyyyyy los adoro !  Ke
Di-o gloryozo tenemos... Les dyo a engrandeser a sus chikos en una aldikera en la tripika de sus mamita.... Protejidos, kayintiko, dulse, blando.... Fasil para
los bebikos, fasil para las madres !

Dizen ke el puerto de Sydney i Hong Kong  saven fiestar el fin de anyo a las mil maraviyas i ke el sielo entero se illumina de la kuantitad de los fuegos
d'artifice.  Milyones de gente se van a fiestar, emborachandosen, baylando i gritando komo los lokos.   Parese ke esto les da un immenso plazer... Yo no
tengo un gusto asemejante !  No se deke... Porke ya me enviejesi ?   Porke me da espanto el bruido i tantas i tantas personas komo sardinas en kutis i todos
lokitos de alegriya o porke ansina deve de ser ?

Ke mas ermozo de espandirse ensima de peluches en frente del ogar de una chimeneya ande los lenyos keman de una ermoza kolor kolorada, kon alegriya i
lansando senteyas ke kitan un chikitiko bruido kayinte, dulse, amistozo ?  Un ermozo livro entre las manos... Una kupika de kristal a medyo inchido de vino
de frutas, parfumado i dulse...   Tener la kavesa un poko en las nuvlas, akompanyado de un perriko o de gatitos durmyendo allado de los pies kon un ronron
de bienestar i ke vos miran a vezes kon un amor imposivle de dudar.... En la mezika bashetika chokolates, frutas, pistachios, biskuitikos i todo lo ke no es
saludozo ma tan tan savrozo..... Manteka freska kon pan, kezos sharonfonfon.... Lo ke no devemos komer !  Ma todo es permetido la noche del anyo muevo
!  Muzika !   Me olvidi de la muzika....  Hmmmm !   A mi personalmente me gustariya oyir las valsas de Chopin,  Jay-Z, Rihanna ... I Charles Aznavour i
Guns n'Roses....  Vistidos no se kere....  Una seda livyana delantre de la lumbre bastara..... Munchos kavesalikos grandes, chikos, de kolor, unos de lana otros
brodados kon ilos de oro para enrodeyarse de sus blandor repozado...

Si... Todo esto i reingrasyar mi Amigo en los Sielos por lo bueno ke mos da... Por no sintirmos solos i aleshados de los keridos...... DemandarLe de kudyar
las personas i los animalitos, todos los ke tienen friyo i estan ambyertos... Sin dingunos, a vezes hazinos en los kantones de hospitales, kon dolor i
dezesperasyon... Para ke tenga rahmanut de los ke sufren i amahe sus penas... El Todo Poderozo ke  save lo ke mos manka.... Konose muestros korasones i
se apiyada de mozotros,  El ke es muestra esperansa i tiene  muestra konfiensa mas ke todos en este mundo...
Ke tengash en 2015  salud kumplida i alegriya de bivir.

Sharope blanco

- Copyright © sefarad.org - 1997 - 2018

Retour au site sefarad.org -