Accueil - sefarad.org

Memorias de mi chikes en Galata

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
MEMORIAS DE MI CHIKES EN GALATA
 
 
Keridos amigos i mis amigitas
 
 
Kije kompartir kon vozotros los rekuerdos de mi
chikes, a los anyos  1950, i komo se biviya en
estos anyos tan leshanos para los mansevos de oy
i tan serkas para mi kuando serro mis ojos...
 

Me akodro por egzemplo del sutchi (letero) ke viniya
kada diya kon kalderikas estrechas, largas i  silindrikas
(de un kuarto de litro o medyo o un litro kada una)
i vendiya una leche muncho mas pura ke la de oy.
Me akodro ke el "kaymak", la krema,  dospues ke
la buyivan era godro godro i me lo komiya yo kon
asukar o miel. (ah mi madre la  mas dulse del mundo !
Nunka penso ke estos son kozas ke matan o a lo
manko enfeyesen kon gudrura las mas ermozas !)
 

El fregado ! Me namorava yo estar al lado de la
persona ke fregava. El shavon vedre del fregado
teniya una golor de limpiyeza i dava  muncha spuma
kon la kuala aziya balones bastante grandes !
Otra koza era la arena i el algodon de  metal kon la
kuala se fregava los tendjeres (las kalderas) i kaliya
ke esten briyando komo el sol ! Los tendjeres de
kovre se davan al "kalaydji" (etameur)  ke kada kuanto
tiempo sonava  a la puerta para tomarlos i briyarlos.
Sino  mos puediyamos entosegar del kovre.  Mo los
yevava dospues de  2 o 3 diyas, o el mizmo diya si
no eran munchos.
 

No va pueder no eskrivir sovre los mantelikos ke se
metiyan ensima de los "rafes" (etageres), las prostelas
(tabliers)  unas mas ermozas de las otras i los tenedores
para kitar de la lumbre los tendjeres muy kayentes...
Ke broderias fantastikas !...Las kolores eran bivas !
El vedre, el amariyo, el korolado i la kolor de la
berendjena para brodar las berendjenas eran las mas
uzadas... Para el mupak  (kozina) se brodavan dantelas,
figuras de frutas i zarzavat (legumes) i las kozas ke se
topavan en el mupak; komo bokales, tendjeres, un
gizandero kon su chapeyo blanko, kucharas i piron ets....
La novya se trayiya en su ashugar  afilu kanyamazos
(torchons) brodados  (yo tenia !) para enshugar el fregado. 
Era verguensa  (los vizinos oy oy oy !)  de deshar el
fregado sin alevantarlo a su lugar !
 

Me akodro ke mi madre aziya tezpishti en Pesah....
Un dulse kon muez i arina de matsa...No se komo
egzaktamente solo se ke el dulse (asukar agua i limon
buyido) se le echava dospues ke saliya del orno de la
kuzina ke se asyendiya kon lenyos !
 
 
Eskrivere mas i mas kada vez ke me akodro de estos
tiempos.....
 

Ke las memorias nunka vos manken, keridos.... 
 (ni las borekas de berendjena !)
 

 Sharope blanco

- Copyright © sefarad.org - 1997 - 2017

Retour au site sefarad.org -