Accueil - sefarad.org

La Gresya fayiyto ?

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LA GRESYA FAYIYTO  ?
 
 
Un teksto de K. Duranli
 
Traduizido, "sharopeyado", editado i adaptado del Turko
por  Sharope blanco
 

Kayo en el lodo !  Fayito !  Las personas aya estan
molorozas...  Kijimos ver de muestros ojos la dezgrasya
en lakuala se topa la Gresya... Ademas ivamos a deshar
por sedaka unos kuantos Euros a Chipras..

Pasimos a la Gresya por la frontiera de Ipsala.  Muestras
karruchas empesaron a tomar kamino en una ruta sin
dinguna susyedad ensima... Mueva !  Muestra primera
estasyon era Aleksandropoli ke era muestra vieja Dedeagac. 
Kuryozo !  No vimos ni un solo bokal de plastik o un
sakito de naylon vaziyos en los kaminos..

Aaaaaaaaaa !  Vimos restaurantes i kafes yennos de gente
felis en el Dedeagac de la Gresya ke los sivilizados diziyan
ke aviya fayitado !  Gente elegante paseando en el bodre
de mar... Todos riyendo kon keyf i alegres !  Ke es esto ?

Komimos aya a midi i pagimos la mitad de lo ke ivamos
a pagar por una mizma komida en un restaurante en Turkiya.
Agora entyendo deke izyeron fayito !

Muestra segunda estasyon era Kavala.  Las entradas i las
salidas estavan perfektas.  No un solo lugar mal echo o
tuguerto en el kamino limpyo de polvo mizmo !  Estos
Gregos dieron todo lo ke teniyan a azer kaminos luksuozas
del mijor asfalt ke ay...  Por seguro ke van a fayitar !

Kavala estava yenna de autobuses ke transportavan turistos.
Ma estos no saven komo entrar a las aldikeras de sus
turistos !  Es normal ke fayiten....

La estasyon de alkavo era Salonik.  Mos enstallimos a
muestro hotel en la Plasa Aristoteles, justo enfrente de
la mar i salimos a pasear...  La muzika se oyiva de toda
las partes.  La gente komyendo i bevyendo kon alegriya.
Difisil de topar un lugar para asentarmos.  Ademas todos
muy amables, mizmo en konduizendo ! La gente kon
sorizas i respektuozos i una limpyeza egzemplar...
Salonik es de vedra una kapital internasyonal i la segunda
grande sivdad de la Gresya.

Porke estan tan felises los ke se topan ayi ?

*****
Porke  :

-No egziste personas ke gritan tres vezes al diya para
azer saver sus mekontentamento.
-No ay un Prezidente de la Republika ke sale a la TV
i avla de la demanyana fina la noche !
-No ay ayi un Pr. de la Rep. ke aze la propaganda de
"la Prezidensiya"  i reklama  400 ministros para el
Partido del kual appartenesiya...
- No egziste "los miyos"  i "los vuestros"
- No ay ayi "grandes del puevlo"  ke avlan i gritan i
trayen inyervos kon sus "organizasyon parallela al
Governo" i de attentar a  "un coup d'Etat".
- La polisiya no korre detras de las personas, no
egziste un manko de justisya, no arestan los juzgos
i los otras personas de Ley.
- No egziste los apelidos  "el sospechado razonable"
i "el sospechado corriente"
- No egziste una politika ke fayito
- No egziste el komersyo de la relijyon
- No ay stress, espantos i arrebashar la persona
- No ay defensa de fiestar el Dia del Lavorante el
primo de Mayo kon vente mil polises en las kayes.
*****
Porke  :
- Aya egziste la verdadera demokrasiya i la
superyoritad de la Justisya
- Ay konfiensya en la Justisya.
 
*****
La Gresya fayito, se esta undyendo !
Ke es ?  El ingreso nasyonal per capita abasho
de 25.000 Dolares a 20.000 Dolares...
Ke katastrofa  !!!!
Tornar agora a muestro ermozo payis de la frontiera
de Ipsala i enkuentrar las personas ke biven en Turkiya
kon un ingreso nasyonal per capita de 10.000 Dolares.
A los kaminos ke kayeron a una sola fila de trafiko
pormodo de las reparasyones ke nunka terminan en los
kaminos, a la susyedad, a la urbanizasyon tuguerta i
kontinuando fina la mega-puevlo ke es  Istanbul.
Alora vash a entender ken fayito i ken se undyo....
--------------------------------------
Por seguro ke ay muncha
egzajerasyon en este eskrito !
Istanbul se esta fraguando de muevo
i parese mas a New York oy en diya !
Me traye mareyos de ver tan grandes
edifisyos i estos komyones ke siete
diyas, 24  horas transportan los
materiales de konstruksyon en los
kaminos inchidos de bruido i de un
trafiko muy denso....  Todo komo en
New York ay muy rikos i muy proves
tambien i todo komo en New York no
manka todo modo de krimenes, rovos,
mafia, assasinos, lo elegante i luxuozo
i lo feyo i lo negro....
 
Si solo no egzistiya el antisemitizmo
i esta tendensya a la vida islamika....
                   
Tengo eskarinyo de lo ke era la Turkiya
en mi manseves....
 
Kon karinyo


Sharope blanco

- Copyright © sefarad.org - 1997 - 2017

Retour au site sefarad.org -