Accueil - sefarad.org

El Livro de Malca Levy i la vijita de Gagamel....

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
El Livro de Malca Levy i la vijita de Gagamel....
 
-----------------------------------
 
 
Keridos amigos i mis amigitas,
 
Mis diyas fueron yennos sin repozo tanto estava
okupada del Viernes de la semana pasada fina
el diya de Alhad de esta semana. (7 de Juni, 2015).
 
Komo lo savesh tuve a mi ijo i su amigita en kaza
i es agora solo ke me relakso un poko, gozando
de mi esuenyo kuando me da gana, komer a mi
ambre i no asemejar a una damma sharanfonfon
lollllllllll  kada diya 24 horas !   No oyir ke es una
katastrofa de tener sinko gatos en kaza, ke mos
vamos a murir pormodo de eyos i ke vino el tiempo
de pensar a una solusyon a este "problem"  !
Teniya el tino de no deshar la purta de sus
kamareta avyerta para ke no afite la desgrasya
ke gatos entren aya.... - Son tan auzados a
entrar en todos los lugares ! -
Madre miya bendicha !  No le puide responder
ke era "el", el problem !  Lo kero mas de todo
en el mundo... La sola koza ke puide dizir fue
ke el era un  "Gargamel"   en riendo por seguro !
I le kedo el nombre Gargamel ! 
 
 
Mi ijo presyado, kon su auto alkilada, no kijo
kedar un solo diya sin salir, azer saltos en el
aver, ver todo lo ke se puede ver en Istanbul
en alto i embasho !  Era por su amigita por sierto ! 
Ma es yo ke me topi arastandomos kon Bilge i
kon eyos porke de dinguna manera estava
akseptando de salir sin mozotras !  Ni tiempo
de respirar sano ke este !
 
 
Atyotyotyotyo  !  Yo no konosiya la sivdad !
Es komo si fuera en un payis etranjero !
Kualo no izyeron en esta sivdad !!!!!  Puedo
dizir ke se fragua en eya 5 otros Istanbules !
Lo todo muevo, muy luksuozo, muy diverso
i muy grande !   A mi me plaziya mas la sivdad
de mi manseves...  Penso ke era mas ermozo,
mas elegante, mas karinyozo... Agora es
New York barminnam !  La mega metropol
ofrese todo lo ke se puede imajinar la persona.
I... En kuantitades ke dan mareyos !  Solo de
imajinarme ke mos paresiya grande koza lo
ke traiyan de Amerika i de Europa !   Oy es
Turkiya ke eksporta todo lo sharonfonfon a
estos payizes.  Los venden kon etiketas suyas !
Una lokura los muevos kaminos, puentos,
autopistas, barrios, sentros de kompras,
i estas cikas kalejas kon todas las kolores
kon los kafes, los retaurantes, los bares i
los night-clubs, los mansevos unos ansina
otros de otro modo, ijikas ke no se engrandesyeron
o se engrandesyeron de maziya presto !  Un
trafiko tan denso ke era de jurar de no salir mas
de kaza !   No se porke todos estan en las
kayes inchendo las kalejas de noche i de diya...
Ke les manka en sus kantones ?  Deke no
estan kontentos kon lo ke tienen ?   Deke todos
tienen la naris apegada a las vitrinas i los ojos
grande avyertos kuando ven vistidos, kalsados
o todo modo de kozas ke no se tienen de menester !
 
 
Todo lo ke vengo de eskrivir no era mi motivo
inisyal !  Teniya en tino de alavarvos fina el
Sielo la ovra de Malca Levy, su livro  YAKAR MIDAY
ke resivi justamente kuando mi ijo estava aki.  Ke
mazal ke yego en un momento ke estavamos dayinda
en kaza, a la hora de dezayunar en el balkoniko
kon todos enjuntos, sanos i rezyos ke me esten !
Estavan muy okupados en sus konversasyones i

komyendo todo lo savrozo  (!)   

........................................... ke les aviya preparado

kon el chay perfumado   Spice Imperial del famozo
Whittard Inglez ke Nebil tuvo la amabilitad de trayermos.
 
Estava dizyendo ke yego el livro de Malca Levy !
Empesi a boltar las ojas en meldando i no se komo
afito, termini de meldar el livro - en la siedra eskrito
en Fransez i en la derecha eskrito en Judeo-Espanyol-
sin pueder kedarme.... Ke grasya !  Ke ermozo
kuentiziko i ke ermozo i savrozo el relato.... Me namori !
 
Me namori de  YAKAR MIDAY  Malka kerida !
Esto segura ke todos ke lo van a meldar estaran del
mizmo avizo.   Te suheto una buena vendida del livro
i ke te yegen los aplozos ke mereses tanto...
 
Kon karinyo a todos i a todas.
 
Sharope blanco

- Copyright © sefarad.org - 1997 - 2017

Retour au site sefarad.org -