Accueil - sefarad.org

Letera abierta al Primer ministro turco

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Asher Ashkenazi a ecrit une lettre
ouverte au Primier Ministre Turc.
Absolument sublime...
Je l'ai traduite en Judeo Espagnol
(Sharope blanco.)
 
 
 
 
Oyeron ke el Primer Ministro Turko disho
ke JERUSALEM les apartenese i los ke
vinyeron a okupar sus tierras se iran de
la mizma manera ke vinyeron...Tiene razon.
Lo disho muy justo i muy ermozo.
Es Asher Ashkenazi ke le da la repuesta
siguiente....
 
Esto enteramente de akuerdo kon vozotros,
kon esto Yerushalayim es el sentro nasyonal,
politiko, relijyozo i la kapital de Israel
i me sorprende ke digash ke vos apartenese...
Estash en un muy grande yerro ! De todo
modo admiro vuestra imajinasyon....
DES DE 3000 ANYOS,los judyos nunka peryeron
sus lasos kon la TIERRA MADRE. Fueron
konsientes de ser una nasyon i developaron
sus relijyon en las Tierras de Israel.
Los Judyos fueron la unika nasyon ke fundyo
UN ESTADO INDEPENDIENTE i izo de YERUSHALAYIM
SU KAPITAL.
Echaremos un ojo a los ke vinyeron i pasaron
por aki : LOS JUDYOS - Antes 3000 anyos.
Un estado indepediente kon Yerushalayim por
kapital. Erijan sus primer Templo en la
montanya de Moriah en el lugar el mas santo
para eyos. En 586 antes de Muestra Era
los Babilianos derrokan sus primer payis
independiente i sus Templo. Una parte de
los habitantes estan yevados al exilio.
Dospues de los Babilianos son los Persos ke
invadian el payis i permeten a los Judyos
de retornar a sus payis. Los Judyos fraguan
sus Segundo Templo basho la okupasyon Persa
en el MIZMO LUGAR.
Dospues de los Persos son los Gregos ke
konkistan el payis.(332 Antes de Muestra Era)
Los Judyos se revoltan kontra los Gregos,
ganan sus independensya i establesen el
SEGUNDO PAYIS INDEPENDIENTE JUDYO.
(167 Antes de Muestra Era).
El Segundo Estado Judyo sera konkistado por
los Romanos (63 Antes de Muestra Era) Los
Judyos biven un tiempo basho de los Romanos.
Se revoltan dospues para ganar sus
independensya. Luchan durante 4 anyos.
Los Romanos ganan las batalyas, derrokan el
Segundo Templo i forsan los Judyos al exilio.
Una parte de los Judyos kontinuan a bivir en
estas tierras.
Dospues de los Romanos estas tierras son
konkistadas por los Arabos, las Kruzadas,
los Memlukes, los Ottomanos i los Inglezes.
Los Judyos guadran sus identidat i sus
nasyonalitad i tornan a sus Tierra Madre,
ganan sus independensya i establesen EL
TRESER ESTADO INDEPENDENTE en 1948, el
ESTADO DE ISRAEL oy en diya.
"Los okupantes se iran komo vinyeron..."
Es esto lo ke dishitesh. Afito ansina mizmo !
Es vedra ke todos los okupantos, los
Assirianos, los Babilianos, los Perses, los
Gregos, los Romanos, los Arabos, las Kruzadas,
los Memlukes, los Ottomanos i los Inglezes,
todos, se fueron komo vinyeron...Kon el
retorno de los Judyos a sus Tierras, a las
tierras de Israel, el payis se salvo de la
okupasyon.
Durante la okupasyon de estos imperyos
poderozos, por 2000 anyos, estos lugares
kedaron komo la guerta de detras de estos
payizes. Neglijados, suzyos, sekos. Es
solo kon el retorno de sus verdaderos
duenyos, los Judyos ke enfloreseron i
fueron plantados de muevo. Todo se izo
vedre i ermozo... I se esta dayinda
developando... El mas grande projekto
de plantasyon de arvoles en los d'alkavo
100 anyos se realizo en Israel. En todos
los lugares del mundo i tambien en vuestro
payis se trata de peryer boskes enteros
o abashada en la kuantitad de arvoles.
Israel planto mas de 240 Milliones arvoles
en el siglo d'alkavo. Se le dyo el nombre
de BOSKE DE ATATURK en memorya del grande
Leader ke veneramos.
Kon vuestra permission lo kero repetir : LOS
JUDYOS FUERON LA UNIKA NASYON KE ESTABLESYERON
UN PAIS INDEPENDENTE EN ESTAS TIERRAS I IZYERON
LA KAPITAL DE ESTE PAYIS INDEPENDENTE
YERUSHALAYIM.... 3 VEZES !
Espero ke puide konverservos ke estas
tierras apartenesen a la nasyon judiya i
ke Yerushalayim es su kapital nasyonal,
relijyozo i politiko des de 3000 anyos
fina agora, ke deve kontinuar a kedar
ansina i ke esto es el derrito historiko
de los Judyos.
Avlaremos agora un poko de los derritos
historikos de los Palestinos. Komo lo dishe
antes, se mensyona 41 vez los Ijos de Israel
en el Koran. Ni una sola vez se trata de
los Palestinos en el Kuran. No vos viene
estranyo ?
En 1947 los Payis Unidos divizaron el payis
i desidyeron de estableser un payis Arabo i
un payis Judyo. Si. No vos yerratesh. No
se avlo de un payis Palestino ma Arabo...
Porke en este tiempo no egzistiya un puevlo
Palestino. Los Arabos ke biviyan en las
Tierras de Israel durante la okupasyon
Ingleza empesaron a yamarsen Palestinos
dospues de 1967. En otros biervos LOS
"PALESTINOS" SON UN PUEVLO "FABRIKADO"
EN LOS D'ALKAVO 50 ANYOS.
Vos akodrash por seguro ke una parte de
Samaria i el Este de Yerushalayim estavan
debasho de la okupasyon Jordaniana durante
19 anyos(1948-1967). Porke los Jordanianos
no ayudaron "sus ermanos Palestinos" a
estableser un payis suyos ? Vos demandatesh
esta kestion ? La repuesta es la mizma.
No egzistiya un puevlo Palestino en este
tiempo. Los Jordanianos no viyeron dinguna
diferensya entre eyos i los Arabos de Samaria.
Los tomaron basho sus nasyonalitad i
aneksaron sus tierras.
NO UVO NUNKA EN LA HISTORIA UN PAYIS
PALESTINO NI UN PUEVLO PALESTINO.
Sinyor el Primer Ministro, me viene
imposivle de kreyer ke dizitesh
"JERUSALEM MOS APARTENESE".
En kada Livro Santo de las tres grandes
relijyones monoteistas, en el Viejo
Testamento, en el Muevo Testamento i en
el Kuran se trata de las tierras de Israel
komo LAS TIERRAS PROMETIDAS A LOS IJOS DE
ISRAEL. No me kuadra ke vozotros, una
persona Muzulmana i observante, digash
"Muestras tierras" a las tierras prometidas
por Di-o a los Ijos de Israel. "VASH A
ENTRAR A LAS TIERRAS SANTAS KE DI-O VOS
REZERVO" (Mi tribu, entrash al lugar santo
-ke vos komendyo de entrar- ke Di-o eskrivyo
por vozotros)
KURAN Sura 5.21
Di-o mensyona ke los Judyos son los
eredores de Israel (Es ansina, izimos a
estos, los Ijos de Israel, eredores)
KURAN Sura 26.59
Di-o komendyo ke Los Ijos de Israel MOREN FINA
EL D'ALKAVO DIYA DE LOS DIYAS EN ESTAS TIERRAS.
(I dospues dishimos a los Ijos de Israel
"Bivish en esta tierra (payis) i kuando va vinir
el diya de la promesa de arrebivirvos, vos
vamos a arrekojer i organizarvos")
KURAN Sura 17.104
Yo me kreyo ke Di-o observa su promesa i no
troka de ideya. I la vedra es ke Di-o
observo su promesa i okuryo lo ke aprometyo.
Los Judyos tornaron a sus Tierras apprometidas
por Di-o komo los eredores de Israel i
biviran en estas Tierras fina el d'alkavo diya
de los diyas.
EN EL VIEJO TESTAMENTE "YERUSHALAYIM"
(KUDUS) ESTA MENSYONAD0 669 VEZES !
ESTO SEGURO KE SAVESH KE EL BIERVO "KUDUS"
NO ESTA MENSYONADO NI UNA VEZ.
41 vez se mensyona LOS IJOS DE ISRAEL en
el KURAN ma ni una vez el biervo PALESTINA.
El uniko puevlo en el mundo ke se refera a
YERUSHALAYIM en sus orasyones diaryas son
los Judyos. Durante los 2000 anyos d'alkavos
son el uniko puevlo ke se tornaron i se
tornan a la direksyon de Yerushalayim para
rogar ke el Templo se frague de muevo.
Durante los 2000 anyos d'alkavos en sus
fiesta kada anyo repetan sus kerensya por
Yerushalayim, kuanto les manka i sus dezeo i
sus esperansa para tornar a sus Tierra Madre
"LE'SHANA HABAA BE'YERUSHALAIM" (Al anyo
ke viene en Yerushalayim...)
El novyo dize en kada seremoniya de kazamiento
"Ke mi braso derecho no sierve a nada si me
olvido de Yerushalayim.
Todo esto son unas kuantas pruevas de kuanto
Yerushalayim toma lugar i la importansya ke
tiyene en sus vidas.
Kijyera agora referarme kon vuestra permisyon
a los biervos "Judyo" i "Sionizmo" siempre
pronunsiados kon odyo i a loskualos les
emprestash sinyifikasyones negativas...
Malorozamente no kayen de vuestras bokas...
No esto del todo seguro si konosesh lo ke
keren dizir....
"JUDYO" - YAHUDI - (YEHUDI en Ebreo)
sinyifika "De Yehuda.." Yehuda era uno de
los ijos de Yaakov (Israel) i es el nombre
historiko de la rejyon - el sud de las Tierras
de Israel - ande Yehuda yego kon su tribu, se
installo, i establesyo su reynado. Komo
biervo kere dizir "ke apartenese a Yehuda"
"ke viyene de Yehuda" i su payis son las
Tierras de Israel.
El SIYONIZMO es un movimiento nasyonalisto
ke tiene el motivo de protejar, de sostener
los Judyos i la kultura Judiya, azer ke los
JUDYOS TORNEN A SUS PAYIS I ESTABLESEN
EN SUS TIERRAS UN PAYIS INDEPENDENTE.
Es el derecho primordial de los puevlos de bivir
liberos independientes en sus payis. Kerer la
independensya i luchar por esto fue siempre
la honor de los puevlos. Todos respektaron
i sostenyeron ansina de movimientos. Porke
razon inyegarlo a los Judyos ?
Estash avlando de SALVAR el "KUBBET EL SAHRA"
i la mezkita "AKSA". Estos son el treser
lugar santo para los Muzulmanos i el primer
lugar santo (El monte de Moriah)para los
Judyos. En este mizmo lugar se elevavan el
PRIMER i el SEGUNDO TEMPLO de los Judyos.
Esto kere dizer ke el Kubbet el Sahra i la
Mezkita Aksa fueron konstruidos sovre las
ruinas de los Templos Judyos.
No tenesh de SALVAR la Mezkita Aksa porke
esta en las manos de una Enstitusyon Araba
del primer diya mizmo ke Israel se fundyo.
La mezkita fue de los Jordanyanos durante
19 anyos. Kuando el kontrol paso a los
Israelyanos, Israel entrego el lugar a la
ENSTITUSYON MUZULMANA ARABA ! Si, Sinyor
Erdogan, lo oyitesh justo ! Israel dyo las
yaves de su lugar el mas santo a los Arabos !
(I kon una desizyon tomada en el anyo 2000
la entrada al Kubbet el Sahra i a la Mezkita
Aksa fue defendida a todos los ke no son
Muzulmanos. Kreyo ke ya lo savesh...)
Seriya de los Arabos ke keresh salvar el
lugar ?
Kreyo ke esto es un prueva sufisiente para
demostrar kuanto Israel mostra respekto i
defende los derechos de los pertenesyentes
a las tres relijyones monoteistas....
Senyor el Primer Ministro, deklaratesh ke
Israel es vuestro enemigo malgrado ke es
el uniko payis verdaderamente demokratiko,
i onorando los derechos humanos de la rejyon.
La Turkiya se izo un payis ande Israel i
los Judyos se odyan, las bandyeras Israelyanas
se keman pormodo ke keresh mostrar Israel
komo un payis illegal i ke no tiene razon de
egzistir, ademas negro... Esto kon vuestras
PROPAGANDAS I KALUMNIAS MINTIROZAS,
KE INCHEN  LAS KAVESAS KON INFORMASYON
FALSA I ODYO.
Vozotros, Senyor el Primer Ministro,
preferatesh avrir los brasos al HAMAS
malgrado ke lo mas de los payises ARABOS
mizmo akseptan ke estos son terroristos...
Vozotros ke ay anyos ke guerreyash kontra
el terrorizmo i konosesh lo ke son las
vistas sangrientes del terror.
HAMAS lava los meoyos de sus kreaturas des
de sus mas chika edad i les ambeza a odyar
Israel... Asigun el program skolaryo, les
ambezan en sus eskolas a suisidarsen komo
bombas bivas...organizan aktos de terror
kontra el puevlo sivil de Israel, les embiyan
roketas i kon todo esto se sierven de las
mujeres i de las kreaturas komo eskudas bivas,
embiyan sus kreaturas a la muerte i akuzan
Israel de matar sus kreaturas i demandan de
kastigar Israel por esto....
Los ke no tienen dinguna kultura, no pueden
ni kestyonar la vedra, los analfabetos de
loskualos la miente fue inchida de odyo
kontra los Judyos, se kreyen a vustras
propagandas mintiroza i a vuestras kalumniyas
i kontinuan a kemar bandyeras i gritar todo
lo ke pueden "Muerte a Israel !"
Fina oy en diya no fui nunka testigo del
echo de kemar bandyeras de nasyones
etranjeras en Israel. I esto nunka afitara.
Tenemos respekto por las bandieras, mizmo
si estos son de los puevlos ke juraron de
derrokarmos !..
No kale olvidarse ke los puevlos ke no
respektan los otros puevlos puedriyan un
diya no respektar sus proprio puevlo.
Los ke keman bandyeras de otros puevlos
pueden kemar un diya los suyos tambien...
Si kontinuash dayinda sonyar ke Jerusalem
es vuestro dospues de todas mis aklarasyones,
la sola koza ke me keda de azer es suhetar
ke nunka ansina de suenyos se realizen.
Pensash ke seriya fasil de konkistar i tomar
de las manos de los Judyos sus patria ?
De akeyos ke bivyeron leshos de sus payis,
ke SAVEN MUY BIEN LO KE ES BIVIR SIN UNA
PATRIA, ke saven kuanto karo kosta este estado
dospues ke los nazis assasinaron el tersyo de
sus populasyon por la unika razon ke eran
Judyos, ke reusheron a tornar a sus payis
dospues de un exilio de 2000 anyos, KE
NASYERON I SE ENFUERTESYERON DE MUEVO DE
DEBASHO DE LAS SINIZAS DEL HOLOCAUSTO ?
De vedra ke lo dishitesh muy bien :
"SE IRAN KOMO VINYERON " Komo vinyeron i
se fueron los Assirianos, los Babilonianos,
los Persos, los Gregos,los Romanos, los Arabos,
los Kruzeros, los Memlukes, los Ottomanos
i los Inglezes, kero dizir komo todos los
okupadores. I...Si vozotros vinish, VOS IRASH
KOMO VINITESH ! Al momento mizmo... Kero
dizir al momento ke yegarash !
 
Kon respekto,
Asher Ashkenazi
 
 
        

- Copyright © sefarad.org - 1997 - 2017

Retour au site sefarad.org -