Accueil - sefarad.org

Este enverano esta pasando

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Keridos amigos i mis amigitas,

 
 
Este enverano esta pasando kon interminables
vakansyas por aki i por aya al punto ke tengo
de neglijar SEFARADIMUESTRO, koza ke no
me gusta del todo de vedra....

Empesimos muestra vida nomada al empesijo
de Junio kuando la eskola de Bilge se serro,
tomimos un reflo en Istanbul unos kuantos
diyas i kontinuimos a selebrar el enverano en
Avsha (Avsa)  una isla en medyo de la Marmara.
Estas d'alkavos vakansyas fina el 24 de este mez
se realizaron kon la insistensya de mi angelo de
ijo ke pensa ke nadar es la mijor aktivitad para mi.
 

La vedra es ke tiene razon i me siento muncho
mijor kuando salgo de la mar, kansada, eskuryendo,
kon el reflo a mitad kortado porke nadamos
Bilge i yo de un lado fina la otra de la izla....
No komemos pan i kozas ke kontienen arina i
asukar, patatas, aroz etc...  Bivimos de pishkado,
salatas, karne, frutas, gueyvos, kezo i muncho
 

vedrura kozida o kruda. El rezultado me sorprende.
Me kero ekskuzar de mis amigos i en partikular de
mi kerido Shimon Geron por no pueder pasar
todos los messages ke resivo por muestro forum.
Me manka el tiempo para adjustarlos al format
de muestro forum, editarlos ets.  Por lo ke puedo
no kito los messages kopyados de diversas
publikasyones, messages kon munchas fotografias
(Yahoo no lo permete)  historias de la Biblia ke
todos konosemos, historias de la Shoa ke firye
muestras almas i ke son dezgrasyas ke todos mos
puedemos imajinar....Politika en Israel i la
situasyon kon los Arabos etc.
 
 
Esta izla tan ermoza i kon el soliziko ke mos desha
enkantadas kada tadre kuando se va a durmir
aryento de la mar tiene malorozamente problemes
de koneksion kon el internet.   Mos se va kortando
a kada punto i a mi me viene inyervos... Serro mi
Carolina kon ravya delantre de una Bilge muryendose
de riyir.... Adora verme furyoza kon todas las kozas
sin vida i inkapaches de arresponderme !  Tiene
razon un poko porke me peleyo komo si me oyivan
i puediyan entender lo ke les digo....  El otro diya
me peleyi kon el dezmazalado de pishkado ke estava
alimpyando, entero muerto ma ke me firyo el dedo
kon su espina venenoza !  Vos juro ke endjida muy
muncho.  Fue Bilge ke me izo un  "hadji fishfish"
(el bandage blanco g odro godro)  a mi dediko
dolorido.  En esta izla barminnam no egziste ni
un lugar de ir si afita koza a la persona, ni un
mediko...Nada.... Nada mas ke una farmasiya ke
vende perfumes i mata-moshkitos sin mizmo
un chemisto en la botika.... Mos disheron ke viene
las tadres solo...No save nada de toda manera.....
Ke azen las personas ?   Mueren !   El Di-o dyo,
el Di-o los tomo....  El otro diya se muryo delantre
de muestros ojos una mansevika... Iva bivir si
estavamos en Istanbul....Ma las plajes una lokura...
La mar almendra..  Los merkados inchidos kon
todo bueno... Miliuna koza sin valor, feyo para
los ke keren yevarsen "souvenirs" de Avsa....
Clubs en kada kanton kon sus muzika fina los
sielos las noches....Leshos de muestro hotel ma
oyemos las dezgrasyas fina aki.... Muzika de
sinkena kualitad kon mansevos sin kola i sin
kavesa tratando de olvidarsen de la mizerya de
sus vidas....  Otra vez aki ?   NUNKA.....
 

Portanto era un ganeden antes munchos anyos....
Oy me esto azyendo hazina de ver los perros i
los gatos de la kaye ambyertos, sin agua, hazinos
i sufriyendo de la kalor insuportavle.... Me demando
si esto en un infierno o un ganeden.... Mozotras
estamos en el mijor lugar i leshos del puevlo
ke inchen las kayes de sus gritos i de sus vistimienta
sin dingun gusto, ekstranyo a muestros ojos i a
muestras kostumbras....
 
 
Vos saludo i vos embiyo mi karinyo a kada uno
kon la esperansa ke estos diyas van a pasar muy
presto para mozotras i tornaremos a muestros
kantonikos inchidos de muestros gatikos, al
repozo de muestra kazika i muestras kamikas......
Al balkaniko de maraviyas i a muestros keridos....
 
Kon karinyo
 
Sharope blanco
 

- Copyright © sefarad.org - 1997 - 2017

Retour au site sefarad.org -