Accueil - sefarad.org

El tablier O la prostela

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

EL TABLIER  O  LA PROSTELA

 
 
Dedikado a todas las granmamis en vida o
las ke ya estan en Ganeden kon los angelitos.

Grasyas a Eliseo i a HaimVidal Sephiha por
embiyarme este eskrito en Fransez ke me
plazyo muncho, yenno de nostaljiya porke
me akodro akeyos tiempos bendichos de mi
chikes....  Lo traduizi al Espanyol i lo
"Sharopeyi"  para prezentarlovos a mi manera.

Se trata de la "prostela"  de las granmamas !
Los mansevos de oy por seguro ke no uzan
estas grandes prostelas al rededor de la talya
ke se metiyan ensima del fostan para ke este
no se ensuzye !  La razon era de pueder lavar
muncho mas fasil una prostela ke un fostan
sharanfonfon komo era la moda antes ! Las
dammas no vistiyan un tishort kon un jeans !
Ademas no teniyan tantas kozas de vistir i
mijor valiya kudyar lo ke se teniya sin avlar
ke lo mas de las ropas de los fostanes no se
puediyan lavar !
 
Dunke la razon del uzo de la prostela era de
protejar el vestido ma muncho mas de esto
teniya otros uzos ke ni se puediya pensar ke
la nikochera, ken ke seya, no vista una prostela
en kaza !......  Yo mizma, no puediya salir a la
guerta para jugar kon mis amigas del vizindado
sin ke mi madre me ate pishin una ermoza
prostela kon volanes i broderiyas en vezes !
Ansina era en akel tiempo i todas mis amigitas
viniyan a jugar kon sus prostelikas i un ermozo
chapeyo si aviya muncho sol ! 
 
Los gatikos muncho mas trankilos de los de
oy (!)  se deshavan ser muestras kreaturas...
Los vistiyamos i los echavamos kon kuvyertas
i kavesal en las kamikas o las "pousettes" de
las kuklas.  Les davamos a komer lo ke
"gizavamos"  kon yervas, lo ke topavamos
en los almaryos ande se guadravan las komidas,
la leche del diya, kezo, yogurt......Las mosas
trikotavan kalsas para sus piyes chikitikos i
prostelas a vezes !  Les tapavamos las kavesas
kon un "fichue"...
 
Las prostelas serviyan tambien a  :

-  Enshugar lar manos
 
-  Para alimpyar la sudor.
 
-  Asoplar
 
-  Alimpyar las karikas de las kreaturas ke yoravan !
 
-  Guadrar las kozas debasho ! -mizmo kreaturas ! -
 
-  Embolver los brasos si el tiempo estava yelado
 
-  Guadrar la rida, paras, yaves, antojos en sus
   aldikeras....
 
-  Yevar los gueyvos, panes, patatas, sevoyas, lenyo,
    frutas i verduras de la guerta enteramente komo
    un sesto.
 
-  Kitar del orno un resipiante muy kayinte i
   meterlo al lado de la ventana para ke se yele.
   Oy metemos los alimentos al bodre de la
   ventana para dekonjelarlos !
 
-  En tiempo de soflama antes ke uno venga supito
   a vijitar, ser el kanyamazo para tomar polvos !

No mos akodramos de los mikrobes de las prostelas
ma la kayintor i muestro amor para las ke las vistiyan.... 
 
Abrasos karinyozos a todos
 
Sharope blanco

- Copyright © sefarad.org - 1997 - 2017

Retour au site sefarad.org -