Accueil - sefarad.org

La Mujer

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LA MUJER


Ijikas nasen a los brasos de sus parientes
Se engrandesen kon  bezos, karinyo I pinyones
Ijikas hanumikas, trezoro de sus madres
No tienen penseryos ni duvdas sovre los hombres.


Ijikas enfloresen, sus miradas son brazas ke keman
Sus ermozura, sus freskura I las sorizas vos yaman
Ijikas son innosentes, no saven el mal, no pensan
Sus instinktos arrastan, abrazan I se namoran.


Ijikas kon velo blanko parten de sus kazas
Entran a sus muevo nido kon maletas I djoyas
Son las presyadas de sus maridos I son horozas
Ijikas ke se izyeron mujeres, reynas regaladas.


Oy es madre, engrandese kreaturas a su torno
Se akodra de sus chikez I de los diyas de oro
Oy la vida no es tan fasil, su marido peryo su echo
Lo ve inyervozo, no es el mizmo, peryo su entuzyazmo.


Una noche de luvya lo aspera ma el no viene
Sus kovdos endjidados a la ventana, no durme
Tiene el korason apretado komo si una mano la firye
El hombre borracho a la demanyana aparese....


Dospues de akeya noche todo troka, el siempre grita
Un diya su mano se alevanta I en yoros se ekskuza
Eya lo pardona, tiene kreaturas, pensa muncho I keda...
Pormodo de las kreaturas sufre mas I mas su humor mala.


Los ojos vaziyos kamina,  torna I torna en el merkado
No merka nada, son unos groshez solo lo ke le kedo
Pensa a las kreaturas, ke les va dar a komer sin dinero ?
El no lavora, su padre ayuda ma mas por kuanto tiempo ?


Si solo puediya topar un echo, lavorar, ganar
No le importariya mirar hazinos o I ir a alimpyar
Es manseva I tiyene fuersas... Nada para yorar !
Kon esto en tino i korason livyano se va a echar....


Diyas i diyas chafta a las puertas, kada vez perye esperansa
Las puertas se kayan, unos la envitan, otros no dan repuesta
Eya sin enfasyarse aze su echo i sale afuera a la demanyana
El, no demanda ande se va, keda en la kama i bolta la espalda.


Mas diyas pasan, uno la ayudo i topo lavoro el otro diya,
Su madre se okupa de las kreaturas, al marido no le importa.
Rova de sus aldikeras para merkar el bokal ke lo emborracha
Eya, kansada, no esta mas tan ermoza i peryo su freskura.


Se demanda kualo es la vida, para kualo kazarse i entregarse ?
Ke lokura es la boda, las flores, las fotos para akodrarse ?
A kualo sierve de ser prinsessa, reyna dospues i enfin serviente ?
Del fostan i del velo blanko keda solo la amargura del prezente.

 


Sharope blanco
10 de Marzo 2015

 

- Copyright © sefarad.org - 1997 - 2017

Retour au site sefarad.org -