Accueil - sefarad.org

Este Mundo Loko

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

ESTE MUNDO LOKO

 

Unos kon timbales otros kon panderos
Unos savoran las fragulas de sus helados
A los otros les kaye luchas i duros destinos !

Esto es  !  Arranka !  Bayla kon los kantos
No vale la pena.. No kero ver yoros !
Ke no ayga  diskordes...Basta kon los pletos.

Vate a una kafeterya, ke vengan los chayes
Juga kartikas i de tu vizino no te olvides..
Ganar... Piedrer... Kale ke bien lo pases !

"La" ke esta en kaza parese ke te importuna
No te desha repozado i siempre se kesha
No durme las noches i kon inyervos te aspera !

No lo tomes al korason... Deshala en su kanton !
Kalmate... Afuera la nieve parese al algodon !
Trava la kuvyerta a tu kavesa..  Pensa al perdon...

Enkolga el tiempo a este momento de dulsor
Goza de tu kamika, de la blandor i de la kayntor
Toma un livro divertido de aventuras i de amor

Avli de amor !  No puedo olvidar tus kantos
Teniya kaveyos de seda, se viya la mar en sus ojos
Vos espartitesh... Pasaron semanas i  anyos.

Yo so tu padre i tu madre, tu ermana i tu namorada
Kontame ! Puedemos bever si te trava la gana...
I mi alma estava espezasada ! ..Konosko bien la kantika !

Dizen ke las rizas alargan la vida, muestros diyas.
Los yoros la akurtan.  Las gotas se mesklan a las aguas.
Los riyos  los yevan a los leshos. Las fuentes kedan sekas.  

No metas tino a todo lo ke te konto !
Me afita de meter lo vaziyo a lo yenno !
Los amigos vazyan lo dulse a lo amargo !

Es la noche.  Las ombras se eskonden en los oskuros
No oygo mis pasos, los bruidos kedan silensyozos
Respiro mi soledad,  en mi entorno no kedo dingunos..

Devo partir, desharte,  mi kamino es largo i ya esta tadre
Me sorprende de no estar kansada, de sintirme alegre.
Kale ke me vayga... Oygo agora los murmuros del ayre.


Sharope blanco
El 18 de Oktubre 2015

- Copyright © sefarad.org - 1997 - 2017

Retour au site sefarad.org -