|
B I V I R
Bivir komo si "ayer" no aviya egzistido
I komo si no avra "manyana"....
Bivir komo si el sol nunka se eskonderiya
I komo si la luna no mos appareseriya..
Bivir komo siempre amariyamos
I nunka mos espartiriyamos
Komo siempre seriyamos feliz i rieriamos
Nunka konoseriyamos la tristessa I los yoros
Portanto.....Viene el diya, akel krual I sin piadad
Empesan los tormentos i bola la serenitad
Ke mos kedan mas ke los rekuerdos ?
Ke mos konsola sino los biervos ke sintimos ?
Ke bivimos si no vimos el mundo I siegos fuimos ?
Los ojos aviertos ma los oyidos tapados ?
Ken fuimos sino esklavos de muestros dezeyos ?
Ke dimos I ke tomimos mas del oro ke teniyamos ?
Ke mos disheron unos, ke no komprendimos,
Ke salyo i ke mos ambezimos de todo lo ke vimos ?
Akel diya viene sin ke mos apersiviemos
I mos demandamos "Kuando pasaron los anyos ?"
Mos parese tener vente anyos en los setenta....
Bivir, poko o muncho, nunka mos abasta.
Kuryozo, mos olvidamos ke somos simples mortales
I ke devemos irmos leshos kuando yega la vejes
A vezes, mizmo, muncho mas antes, sin kerer..
Komo si el Angelo de la Muerte no teniya otra koza de azer!
Sharope blanco
|
