Accueil - sefarad.org

Bayla Sharopika kon Alegrya I Amor

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Keridos Amigos i mis Amigitas,
 
Lo ke este diya mos traye...... O mos trusho  !!!!

Me akodro de mis  tiempos en las kayes kon mi Nelbi
(Renaud 5 era) mitad charpeyada (tresera mano i viejizika)
ke dospues se izo la reyna de los kaminos porke le vazyi
trezoros de Ali Baba ensima de eya !!!

Kavesa de Sharope !  Puediya merkar una oto mueva ma,
mira tu ke yo keriya bien a esta atavanada de oto ! -
Deviya ser yo mas atavanada de eya por seguro !-
Kuryozo !  Kuando no aviya mas de gastar sovre eya i
asemejava a una halis (verdadera)  prinsesa, la vendi i
dospues  (me vino mi meoyo en si !)   merki una mueva,
briyando i ke se iva de suyo kuando keriya ke se vayga....
Inkreible ! Era tan perfekta mi Subaru ke no tomava el
plazer ke me dava Nelbi !

Me aviya auzada a sus kaprichios, sus hazinuras, doktor
i hospital siempre, chirurgia plastika, kazas de Alta Moda,
kozmetika i massages a su puerpo, sauna para la hanuma...
Sin fin !  Ma... Ahhhhhhhh era ermoza ! Djilveliya....
Me kitava la almika !

I los versos ke kijyeron ser una poeziya !
Todo lo ke vino a me kavesa i a mi pluma !
Para riyir si es  ?  No lo se ! 
Asigun mi humor
Mi ravya i mi amor...
Ma de muevo ?   Ke seya.........
 

BAYLA SHAROPIKA KON ALEGRIYA....

 
Esto es la lokura del amor....
Sin sensyo, es alegriya i dolor,
En mizmo tiempo yelor i kayntor !
Kuando unos dizen ke saven lo ke es
Se yerran.. No lo saveran ni en la vejes !
Porke l'amor troka i se aserka a la roves !
 
I dospues de estos versos,
Frutas i yervas komen los aznos
Se peleyan i se pelan los primos
Porke moshkas bolan en los techos
En el lugar mizmo de los pasharos
Ke se los komen gatos ambiyertos !
 
Ken mos disho ke la aguela bola ?
No es eya ma la ija de la bulisa !
Ken era ? la ermana de Roza la tinyoza ?
La ke moz vendiya biskochos i boreka ?
Bayla Sharopika kon las flores koloradas !
Salta a las aguas de los rios kon espumas !
 
Las ardillas se eskonden a mi vinida
Los zoros gritan kuando jugan en la guerta
La gente fuyen deskalsos si Moshe s'aserka
Ay este Moshe ! Ke tu kavesa se rompa Moshe !
Yegaron las keshas fina la loka de tu madre !
El bekchi te embiyara al burako para siempre !
 
El gayo riye i riye el borracho de la mahale
Ken los pilishko ? El uno abasha el otro asuve
El uno mira al vaziyo, atontesdido se kaya i oye
El otro aspera, s'araska, s'asenta i gole el ayre,
Bayla Sharopika kon las florizikas amariyas..
Inche del pozo los kuvos kon las aguas freskas !
 
Van ande se topan las yervas los kodrerikos
El vedre los yama, el sol arekaynte sus chikos
Madre, kuando va vinir el ke lavora los kampos ?
Mi fistan lo enkolgi i eskapi de brodar la rida.
Bayla Sharopika kon las kucharas de tavla
El pandero no esta. Bolta Sharopika bola.. bola !
 

Sharope blanco

- Copyright © sefarad.org - 1997 - 2017

Retour au site sefarad.org -