Accueil - sefarad.org

El Mazal .Catch it. !Titofos oto ! Yakalo Onu ! Attrappe-le - Aferralo !

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

EL MAZAL ?

CATCH IT ! TITFOS OTO ! YAKALA ONU ! ATTRAPPE-LE ! AFERRALO  !


BUENOS DIAS

Keridos Amigos i mis Amigitas


Oy es Diya de Alhad...  Shavua tov !
Empesi el diya kon un mail en Hebreo de Daniel Benbanaste.

Soriyi i pensi ke el mazal de kada uno i uno puede briyar
en un tiempo o en unos momentos solo de su vida i es a la
persona ke kaye de aferrar lo/los por las orejas, los
kaveyos, la mano o ..... la kola ! A vezes mos azemos
pishman  (lo regretamos)  dospues ke es demasyado tadre
i mos se bolo de las manos el pashariko del mazal, de la
felisitad o de la  rikeza...  No sierve a nada de pensar
sin kavos a esto !  Noooooo ! Ma tomar una lisyon i avrir
los ojos i las orejas en ventikuatro para una otra okazyon.
En estas muy raras okazyones, lo mas del tiempo, no tenemos
la alternativa de pensar doz vezes i kale azer pasos o desidar
muy presto.  La intuisyon, los sentimentos, la eksperyensya,
i por seguro, la intelijensya mos yevaran al mazal o no !
NO EGZISTE PERSONA SIN MAZAL i Di-o avre las puertas bastante
vezes para ke pasemos de la solombra a la luz.

La anegdota en hebreyo kontava ke :
 
(trokada, sharopeada, ponponada, kuzido i traduisido  por Sharope ! )  :

"  Aviya una vez un hombre muy triste porke pensava ke
no teniya del todo mazal... Un diya desidyo de irse
al Di-o i kesharse de esta vida sin sal i sin pimienta,
sin un diya horozo i sin una ganansiya ke le permeteriya
de salir de la monotoniya de su vida en bivyendo komo un
hombre muy prove !

En kamino renkontro un arvole, seko a los tres kuartos i
yorando....  Le demando ke teniya i el arvole le disho ke
ay agua al derredor ma no le esta parvinendo i se esta
muryendo de sed !  El chelebon  ( fellow, tipo, herif, le mec)
le konto ke se esta indo al Elohim i Le va avlar i por el.

Mas aya vido una mujer manseva i ermoza, asentada a los
eskalones de su chosa  (cabane, kulube)  la kavesa entre
sus manos i los ojos pedridos en los leshos....  Se
aserko de eya i le demando kualo le mankava en la vida.
Eya supiro i le disho ke nunka aviya konosido el amor i
ke no teniya un hombre para kompartir su vida, dar i
aresivir afeksyon, tener kreaturas i gozar de su propria
famiya...  Muestro amigo penso ke teniya razon la ijika
i le disho ke iva avlar i por eya kuando Le iva dizir
sus dertes ( kozas ke lo preokuvan a el) al Santo Bendicho.

Unas kuantas horas dospues le salio en medio del kamino
un leon bastante viejo i medyo siego... Ambierto i kansado.
Lo saludo, le demando el hatir  (komo se sintiya)  i oyo
sus keshas kuando le disho ke estava ambiyerto por ser
viejo i sin bastante fuersas para apanyar gazelas i ke
mijor valiya murir por el ke de travar ansina ...
El buenacho (el de la buena parte, sin muncha intelijensya)
le ekspliko ke i el teniya keshas i se estava indo al
Elohim para avlarLe i por seguro Le avlariya i del sinyor
leon.  


ELOHIM, lo sintyo i pezo todo lo ke este humano Le konto.
A la fin le disho ke teniya letras para kada uno ke
renkontro en kamino i ke le estava avriendo su mazal
i ke kaliya ke korrera para apanyarlo !

El chelebon Lo reingrasyo mil vezes i se metyo en kamino
koryendo para ir a su kaza i aferrar el MAZAL aprometido !

Vido el arvole, le dyo su letra.  El arvole le disho ke
un sako de diamantes blokava sus raises para yegar a la
agua.  Le demando su ayudo ma el le disho ke teniya de
korrer para aferrar su mazal i no puediya piedrer tiempo !

Vido la mansevika, ermoza de las ermozas.  Le dyo su letra.
Eya le konta lo ke aviya en la letra.  Di-o le estava
dizyendo  " Al hombre ke te va salir delantre de los ojos
kuando vas a meldar esta letra dize le ke lo keres i ke
se kaze kon ti. Vos va bendizir i serash muy horozos i
vash a bivir en la abundensya !"  El no teniya tiempo !
Le disho ke teniya de azer presto (apurarse)  si keriya
aferrar su Mazal ke lo estava asperando !

Vido el sinyor leon i le dyo su letra tambien.  Di-o
le aviya eskrivido a leon  "Si este idiota yega fina ti
kometelo kon keif porke ni vale la pena ke biva !" 


Ke pasesh un diya muy alegre, yenno de sol i de ermozas
sorprezas.....

Vuestra sharope blanco
 

- Copyright © sefarad.org - 1997 - 2017

Retour au site sefarad.org -