Accueil - sefarad.org

Komo no riyir a estos biervos de mi mamita !!!

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

KOMO NO RIYIR A ESTOS BIERVOS
DE MI MAMITA !!!
 
*

Keridos Amigos i mis Amigitas

Esto reelamente muy emosyonada
por los muy muy munchos komentos,
komplimentos i felisitasyones ke
me mandatash por mi poeziya ke eskrivi
oy mizmo dospues de la luvya muy fuerte
 de ayer la noche ! No teniya nada de
ekstraordinaryo ma tuvo el mazal de
plazervos muncho !

Dospues de los biervos de mi muy
kerido i estimado Aron (Dr.Aron Zavaro)
ke me disho ke vido delantre se sus ojos
 " la chikitika Sharope ke le plaziya chafteyar
sus pyes deskalsos en las bolsikas de agua
de luvya i kantar 'singing in the rain' "
me vino al tino de eskrivirle ke no estava
del todo leshos de la realitad. A parte
 ke entrava en las aguas kon mis kalsados
de rugan preto muy shik i muevos briyando !
Kalsas blankas kon dantelika en los bodres.
No kantava singing in the rain ma echavamos
vardas de plazer i riyiamos komo lokos !
 Malgrado ke saviya lo ke me iva asperar
en kaza.... Oy veyyyyy ! Mil guerkos del
gehinnam i todas las karrotas enjuntos !

Vos vo eskrivir lo ke veniya dospues komo
repuesta a la letra privada de Aron :
 
- Ayyyyyyyyyyyy "Ke me muerra yo no !"
"TE vas azer hazina.. En ke hal ke vienes !
Zigana sos ? Ande se tiene visto ansina de koza !
Es a la eskola ke te esto embiyando o azerte
chopchi en las kayes ! Estas entera embatakada
 i aryento de las aguas....Kitate kitate pishin
estos vistidos i estos kalsados eskuryendo !
Los mallogrates muevos muevos ! Presto al banyo !
Halimeeeeeeeeeeeeeee ! Bak bu kiz ne
yapti ! Cabuk cabuk .. Gel bana yardim et !
 Beni deli edecek bu kiz ! Temiz camasir
getir ! Sicak havlu ! Sobaya komur at !
Zaturee olacak !

(Halime era la mosa muestra...Mira lo ke izo
esta ijika ! Presto presto ven ayudame !
Me va kitar loka esta ijika ! Traye vistidos
 limpyos ! Dimalo/tovaja kaynte ! Echa kimur/
karvon a la soba/stove/poele ! Va aferrar puntada !)

"Selika no me mayuyes ! Kualo es esto
no me kero lavar !.... Vas a aferrar piojos
ke mal mos kere kon esta susyedad de las
 kayes.... I kayate agora ! Basta jugar kon
las aguas...No te abasto ? Trankilaaaaaaaaa !
Solo jugar en su kavesa, esta ija miya !
No ... No te va kemar los ojos ! Mete esta
fregadera ensima de tus ojos .. Si ansina !
 Agora dame el pye....El otro agora ! State keda
te vas a arrezvalar.. Te vas a partir la kavesa !
Atyooooooo ! Ke manera de kreatura es esto !

Ya esta.... Ven kuklita de la madre ! Ohhhhhh !
 Limpyika i ermozika.... Te se achileo la kara !
Ven presyada a los brasos de mamita..
Ven jugaremos enjuntos agora... Keres komer ?
Pishkado salado he ? Ke lo bueno de mi ijika
komo los gatikos de la kaye !
 
Keres ke te konte istoryikas ? Bueno presyada !

Il y avait une fois une princesse .....

*

Munchas grasyas por komentar kerido Aron...
Me akodri de mi mamita en Ganeden dospues
de estos jugos maraviyozos en las kayes
 de Sisli, kuando tornava a kaza kon las amigitas
de mi eskola primera Sisli Ondokuzmayis Ilkokulu.

Reingrasyo kon muncha rekonosensya todos mis
keridos ke me mandaron letras maraviyozas ke
tokaron tanto mi korason. Ke no me mankesh...
 
Kon muncha kerensya

Sharope blanco
 
PS  :  A la otra semana vos va embiyar
esta poziya miya ke eskrivi por la luvya
i de la kuala se avla en este eskrito.
 

- Copyright © sefarad.org - 1997 - 2017

Retour au site sefarad.org -