Accueil - sefarad.org

Letra a Dudi

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LETRA A DUDI  
 
" TORTURAR POR BLASFEMAR "  !

Ayyyyyyyyy Dudi kerido ! Yo se otras kozas
ke azer komidas tambien ! Se travar kaveyos,
areskunyar, azer chiki chiki por eskrivir
en esta ventana i mizmo eskrivir poeziyas i
ALMENDRA ! Estas meldando ? Komo la topas
a Roksana ?

A la manyana me vo alevantar kon kavesika
repozada i te prometo ke te vo eskrivir un
ermozo kifur (mentar) i una parsandata
ansina kon muncha pimienta, koza ke te keme
bueno bueno la lingua para ke no blasfemes
mas ! Aspera ! Te vo tostar bivo i tu vas
a gritaaaaaaaaaaaaaar fina los Sielos para
ke te venga a ayudar mi Amigo.. Aspera aspera
vasa a ver lo ke te vo azer ! La inkizisyon ?
Nada ! Mil vezes mas negro ! Las unyizikas
una una te las vo travar kon pensas kemando !
Koshkiyas a tus pies ? Kon ormigas espesiyales
ke te komeran la karne avagar avagar. Tu
por seguro ke seras atado ! Los Vikingos adoravan
mirar esto i no serravan la boka del ke teniyan
de kastigar ! Gritar hofshi ! Ayyyyyyyyyyy
tenemos fiesta aminyana manyana ! En primero
vo durmir bueno bueno kon la muzika de tu
armonika ..... Kuando me vo alevantar vo
azer mi dush/shower en primero, vo dezayunar
kon chay/te fuerte i buyendo ! Dospues vo bever
una grande kupa de sumo de agranadas, vo tomar
mis kurikas, me disheron ke no kale ke m'olvide
de tomarlas en su tiempo (!), me vo meter mi
bluza ke merki muevamente (Preta i kolorada) !
perfume mmmmmmmmm para no sintir la golor de
la karne tostada ! .... Sere pronta para la fiesta !

Agora suhetame repozo bueno i suenyizikos de
seda !

Te abraso de korason i kon muncho karinyo

Sharop duls

 


Sharope.blanco@gmail.com

Kerido Dudi,

Diya entero fui pensando lo ke te iva responder oy.
Lo friyi, lo buyi, lo tosti, lo meti a yelar, lo
kayenti de muevo, ajusti sal, pimyenta i oregano
i a la fin desidi de "azerte" kon gueyvo i limon !
Ya saves lo ke es azer una persona kon gueyvo i
limon no ?  Muy negro !

Ven aki i no te fuygas ! Ni ke me mires ansina porke
no va tener piedad de ti !  Yo no so dinguna mujer
de shalom i de nani nana minimana ! Komo lo apanyo
el kavesal i direkto kon fuerso lo echo abasho !
Si !  I si esto no abasta tomo mi charuka o lo
ke me viene a la mano, una kofte o una pacha de gayna
si ? I....kon fuersa de la ventana abasho !  Los
gatos i los perros de la guerta se tresalen kuando
yo me kizdireyo/apanyo inyervizikos !

Agora...  Los fransezes, kademsizes, no mis keridos
Moshe Gormez, Sephiha, mi adoravle Edmond de Napoleon,
Mireille (Ke le bon de moi ! Ande estas Mireille ???)
(ni la mujer de Sarkozy ke es tan ermoza por seguro ! )
Rosy Hemo, Erol Eliezer etc., izyeron un echo komo sus
karas !  Les avriyeron tapet kolorado a los ugursuzes/
bishmazal de terroristos i estos, viendo el kampo
vaziyo se asuvyeron ensima de sus kavesas... Dainda
ande estan !!! El pipino va aharvar el guartalan !
Vas a ver.  Naaaaaaaa aki te lo esto eskrivyendo !

I los inglezes sin sangre ni venas ? La mizma koza !
Mas negro ! Tu no oygas a Kim.... La Espanya se va
defender todo akeyo ! La Belchika i los hollandezos
ya komyeron el bimbriyo ! Almanya i los del Norte
no se kere dicho ! Lonsos, ke mal te kere !!!! Se
los enkasharon en la naris en las orejas i...

Ke va ser dizes en esta situasyon ?  No solo vana
vinir mas arapikos al mundo... Esto no es el mal.
Kon bueno ke vengan todos...Ya ay lugar ! Maaaaaaa
una puntika de piye a los balabaytes.  Deke no ??!
Dizen "si" a todo.  I a esto vana dizir "si" i
vana tomar sus chapeyikos i se van a arrematar ande
keren !  No ay mas menester de eyos.  No azen kreaturas !
Miran a los perros i a los gatos.  MAraviya ! Ke los
miren en el Kanada o en el Uganda...  Ande les gusta
ma no en EUropa !  Ves ?  Todo redondo todo dulse !

Israel paz ?  Kualoooooooo ? Limonada ? trushi ????
Havva Naguila havva naguila havva naguila ve rennena !

Di-o ?  Ke tiene de ver kon esto todo el Kadosh
baruh Hu, baruh Shemo ????  Tu pareses a mi ijo
kuando era el boy de una kalavasa ! Rompiya el
jugete i dospues se metiya a yorar peleyandose
kon si-mizmo  "porke lo rompi ?!" Se kometyeron
gravas errores...Agora se paga el presyo !
Te akodras de Jericho ?  Kualo puede azer mi Amigo
en los Sielos si su puevlo no se ambeza de las
palavras de su Padre ?  No ay " Si me das un chaketon
te do i mi otra kara !" Esta palavra es buena para
los ke no gostaron las flamas de la Enkizisyon i
lo divertido ke era en las kamaretas de gaz !!!!
Entre 15 payis al doredor no aviya unos kuantos
ke puediyan aresivir sus ermanos tan presyozos ?
Kuando la persona merka una kaza no guadra lo ke
pertenesiya a otros.  Alimpya bueno todo antes
de enstalarse.  No te olvides.  No kaza ensima
de kaza !  Nunka salyo bien !  Nunka salera bien !
Ahhhhhhh !  Es otra koza si saves kontrolar todo
bueno, tomar las mezuras ke toman en otros payizes
por los minoritaryos i no deshar una sivdad aboltarse
a un "prestij" >>>>  la kaldera hermetikamente
serrada i ke save chuflarrrrrrrr ! Akuzo Israel de
una negra politika en sus territoryos.
No tengo piedad por los paryentes ke dieron muncha
kuedra a sus kreaturas i dospues se keshan de
sus komportamiyentos !

Dudi presyado.... Di-o es todo... Nada ke El en todo !
Muestra esperansa, el Amor el mas puro ke egziste
de El a mozotros i de mozotros a EL....Es la Rais de
muestra alma ke Le apartenese. La egzistensya mizma
i no solo en este mundo... Es la Justisya i la LUZ....
Sin El no biviriyamos.... El mundo, toda esta ovra de
magnifisensya i de ermozuras sin limito no seriya !
No konoseriyamos la dolor, las penas ke mos azen
apresiyar la felisitad, la alegriya, i el keyf de
bivir.  Su Justisya i Su komunikasyon kon mozotros
es diferente de lo ke mozotros puedemos entender.


LO AKSEPTAMOS EN MUESTRO KORASON I EN MUESTRA VIDA.


Lo aze, mizmo si no lo entendemos, TODO, por muestro
bien i NO PERDONA  a el ke aze el mal deliberamente
(savyendolo) Sus rekompensas son sus bendisyones,
la livyanes de muestro korason i la soriza en muestra
kara, las ganas ke tenemos supito de kantar i de
baylar, de korrer entre los arvoles i el bodre de mar,
todos estos sus ovras de splendor !...Ganamos todo esto
kon el pozitivizmo, la buendad por los humanos i todo
lo ke egziste debasho del sielo (no a los malos ke
sembran el espanto i la muerte barminnam !),  muestras
orasyones ke mos alivyanan i mos dan esperansa, kon
la modestiya i el estudyo de la vida i de sus palavras.

No egziste persona felis sin El... Es kondanado
i avyerto a toda manera de negriguras, de maldad, de
dezespero, d'espanto, de amargura, de soledad i de
vida sin Amor.... Una vida sin dinguna alegriya reela,
del fondo del korason !  Rogo por ansina de jente
porke son los mas malorozos, mizmo si no lo saven !

Dame la mano David.....I nunka otra vez no digas
kozas asemejantes....Mereses muncho mijor, tu ke
tienes una almika de pasharo....

Rogo por tu bien estar i tu felisitad mi kerido Dudi.

 

Sharope blanco

 

- Copyright © sefarad.org - 1997 - 2018

Retour au site sefarad.org -