Accueil - sefarad.org

El feng shui

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
 
 
EL FENG SHUI



Guay guay guay  !

No demandesh lo ke me afito a mi ! Unos 5 - 6 anyos
atras una amiga me rekomendyo su eksperto en Feng
Shui pishkul esto !

Me disho ke tengo munchas kozas, demazyadas, en mi
kaza i ke esto me esta kavzando dolores de kavesa
(ke no teniya !) i la sensasyon del estomago yenno
(ke no teniya !) i mizmo malestar psikolojiko !....
No uvo hayre ! 100 limones 100 paras ensistyo fina
ke una demanyana sonaron a mi puerta.

Atyo santo ! Mr Feng Shui Pishkul Zurzuvi enfrente
de mi.. Ojikos estirados, antojikos klasikos, entero
amariyo limon, kon soriza de aki fina aya :

- Miss, me embiya su amiga .... Vine a dar vos
mis konsejos de pishkul feng sharomp !

Kualo ke le diga al musyu ? Va-te ? No kero yo de
esto ?.... Muy janti la persona...

- Buyrun !

Ya se kito los kalsadikos i kedo kon las kalsas
blankas blankas...Kamiza blanka blanka, kravata
griza i vedre i kostum grizo. Un metro i medyo
el entero siempre soriyendo. Fina ke torni la
kavesa lo topi en mi kamareta d'echar !
Adonay rahamim !

El tipo estava eskandalizado ! No no no ! Todo
esto kale ke troke ! La kama no esta mirando a
esta direksyon, no el espejo ansina, no este fotolyo
no ansina, esta kolor... esta forma, este tapet...
Es alora ke me vino la DOLOR DE KAVESA !

Ya lo vide en mis kantones, mizurando, travando
esto, kitando akeyo, guay ke me se echaron los
perrikos de porselen de mi nonika en basho,
dos plantas me se bolaron al balkon i otr'un
poko me estava echando yo del balkon abasho !

Fina pueder kalmar el pishkul este tuve ke
demandar la ayuda de mi Amigo i rogarle ke me
mostre el kamino derecho ! Nunka me desha la
mano....I me disho Bendicho El ke azer !

Le soriyi de mi soriza la mas dulse kon mis
ojikos ke se boltan a almendras pishin, me
aboki komo eyos (le plazyo muncho !!!) i le
dishe ke esto muy kontenta i ke kero ke mi
vizina pueda gozar de sus servisyos tambien...
Fue majiko.... Se olvido de korrer en todas
las vandas, mezurar, travar ya se vistyo los
kalsadikos i estava afuera asperandome....
Ya saviya ke mi vizina en el 4 en etaj estava
ande su ija ! Le di un poko de paras
(el gesto le plazye muy muncho i se aboko unas
kuantas vezes, i yo dospues de el !!!!) le
mostri arriva i el 4 kon los dedos i serrrrrrriii
la puerta, iiiiiii kon yave ! Dospues...
Ya no se ! Ni kero saver !

Me tomo fina la noche de meter todo a su lugar !
Me sinti yo Shui Feng d'arriva abasho !

Karinyozzzzzzzz

Sharope blanco


Avlando de Shui Feng esto i del dezordro.....
tststststststst!

Barminan ke barminan ke barminan kaza d'ariva
abasho ! Kon lo ke me kontaron ya tengo
mareyos i todo modo de hazinura ensima de mi !!!
Suzyedad i dezordro son los dos viruses ke
me pueden matar en nada de tiempo ! Yo te los
echariya de la eskaleras abasho guay guay de
eyos, mujer i kreatura i pulga i zurzuvi pishkul !
De vedra ! Los azeriya kon gueyvo i limon i no
tendriyan otra vez el koraje de no alevantar
koza ke tomaron de su lugar !

Esto no es violensya ! Es LIMUDIM ! AMBEZO !
Echar todo por la ventana i ke lo arekojgan
de abasho si lo keren tanto ! 
Se les ambeza de la manera ke lo entyenden.
En Inglez, en fransez, en ruso o en kinezo !
Esla kulpa de personas  de sukar kon
shantiyi ! Buendad eksesiva es la mas grande
kulpa ke egziste ! Se lo digo tambien a mi ijo !
Ke lo bueno miyo, limpyiko i todo en su lugar !
Dayinda tenemos el problem de los papeles
bolando por aki por aya ma ya se ambezo de
meterlos todos en un lugar i kontrolarlos kuando
tiene tiempo ! Inglaterra te inche la kaza de
papeles i de papeleras i de envelopas i de
magazinas sin kavo i el echo es ke viene kozas
importantes tambien en este kuti del mail dezgrasyado !
Agora se ambezo a no kazarse ! Lollll !
Mijor de bivir en un ahir/ecurie ke ni kaveyos ivan a
pueder durmir en paz ! Kualo es esta hazinura de las
ijikas de oy no se !
Un "je m'en fiche" izmo sin limitos.... No
tienen orden ni en sus kavesas, ni en sus aldikeras,
ni en sus korason i ni en sus kazas ! Ermozo
dezordro ke va ser el mundo entero ! No se eskapa
kon la teknolojiya i saver echar a la kaye todo
lo ke se gana i no se gana barminan !
Aksepto ke lo miyo es eksesivo ma "quand meme" !
Ay kozas INAKSEPTAVLES !

Karinyos a  todos mis amigos i amgitas

Sharope blanco

 

- Copyright © sefarad.org - 1997 - 2017

Retour au site sefarad.org -