Accueil - sefarad.org

Mona Liza es ramaut (fraude) ?

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

MONA LIZA ES RAMAUT (FRAUDE) ?
 
 
Disheron ke la rovaron i no se mas en la kaza de
ke ramay se topa !
 
Asperaaaaaaaaaaaaaaaa ! Agora me se izo el
meoyo agua. No los topo en su lugar ni los 5 gramos
ke se ke egzistiyan en mi kavesa !

Ke es ke afito a lo justo ? Yani, kuando yo estava en
Paris i me fui a este Muzeo de Lovo i dospues ke
kaminimos salones de esto i salones de akeyo,
kapak ke les kayga, miliuna bavajada ke ni meteriya
en mi kaza si me los regalavan barminnam, i dospues
ke mis piezizikos se izyeron burekitas i gueyvos
haminados de tanto kaminar i mis ojikos empesaron
a boltar de tanto ver (sin eskapasyon !) yo,
muryendome para asentarme en un lugariko
para bever te, kafe, agua salada....No importa (!)
i la estreya kayida, vate i vate i vate no esta, no lo
topas ansina de lugariko ; keres dizirme tu, agora,
ke todo el jazz i la tantana del muzeo de sharonfonfon
al kual me fui para dizir ke vide la Madame Lisa
en su lugar, barminnam ke feya ija d'otra, eskaravajo !
- mizmo yo me vide dunya guzeli al lado de eya
-bueno... era en 1995 la d'alkavo vez !-
(ande se esta fuyendo este tiempo no entyendo!
Mil guerkos del Gehinnom ke se esta aserkando
muncho el diya de la Buena Hora...Kon livyanes
ke seya Sinyor de Todo el Mundo ! Para todos
Amen) Estava dizyendo yo....Esta Madame Liza
ke por fin vide aya, ya entendites ande, i
te juro ke la vide enkuadrada entera aryento
de sus vidros komo koza grande (!!!) - No
dariya ni sinko paras para ver su kara de
karatula en mis luzyos kantonikos.... -
es yani RAMAUT ? No es eya ? Yani.. Si es eya
mo no es la verdadera Madame Lisa ? Yani
por segura la misma Madame Lisa ma no la ke
pinto Leopold de Visina ? Me se izo todo
agristada kon gueyvo i limon i kedi sin savor
de boka ! Todo todo chop ! Muze de sharonfonfon
de mintiras ke te mete la foto de Madame Lisa
ke no es eya ! Si ke es ma no es... Esto es !
Ya entendites tu lo ke kije dizir !

Atyo ! Ya saviya ke estos fransezes se ambezaron
muncho de sus amigos los Arabos ma meter gato por
pato fina este punto ??? Pes yani pes !!!!
Me demando agora si la kula a la kualo asuvi era
de vedra la Ayfel .... Ken save ? Kon estos
Avropeyos nunka se save el Carsamba i el Persembe !

Mamita, en Gan Eden agora, diziya ke los Inglezes
eskriven Liverpool i lo meldan Manchester !
Koza saviya ! Era mujer muy intelijente i todos
los ke la konosyeron son testigos ! No es por
alavarme ma yo es de eya ke tengo mi kavesika
blanda... Ni puedo kontarlos tantas komidas ke
se azer, de kavesa, sin mirar a las reseftas !
Por mi vida ! No mos yakishea de mentir a esta
edad. Ma esto avlando de komidas... No de dulses !
Esto no se tanto. Ken disho, d'ailleurs, ke kale
saver todo en la vida ?

Alora ? Ke dizes ?

Sharop duls
 

- Copyright © sefarad.org - 1997 - 2017

Retour au site sefarad.org -