Accueil - sefarad.org

La luzya de New York i de Lod

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LA LUZYA DE NEW YORK I DE LOD
 
Vos kontare !....Un dia estava kaminando en las kayes
de New York ke asemejan a la persona tan estrechas
porke los edifisios son giganteskos de dos partes !
Aayyyyyy ! Estava pensando ke me ivan a kayer ensima
de mi kavesika luzya ma no tan yenna !
(en akeyos diyas por seguro ! Porke ya no esto mas luzya,
ma un poko mas inchida afilu kon bavajadas !)

Esto es New York ! Nunka se puede saver !
Supito tirguelos i alamparas...s'avren los sielos...Ayyyyyy
mi madre bendicha ! 1000 guerkos del gehinnam ! Ke vo
azer yo ? La djente korryendo de todas las partes !
Arrondjandome de uno a l'otro komo un topiziko (balle) de
papel ! Topi diya de vistirme el pardessus blanko i muevo
ke merki en el merkado de Lod (en Israel) - ke merkado
maraviyozo !

me namoriya irme los martes ayi i gastar todo lo ke puediya
en alikas i tumbanikas ! (todo tipo de kozas ke ni se tyene de
menester)
Iva kontar New York, la luvya o el merkado de Lod ? Todo
se karishtireyo (se emmlesko) ! (biyervo en Espanyol de
orijina Turka : karistirmak = meler - melanger)
Empesar de muevo ? Si !!!
No ay remedio ! se karishtireyo de negra manera ! Si si ke luvya !
Esto es ! El pardessus... Ke pekado ! Eskuriyendo i manchado de
lodo ... Ke bushko yo aki ? Israel...tu sol.. Ande estas mi amor ?
Aspera mujerrr !!! Ke m'estas arrondjando ansina ? No lo puedo
kreyer ! En la mas sivilizada de las sivdades te arrondjan, te
manchan de lodo, aze luvya !!! Ya estaaaaaa New York entero !
Ke me mankava en Lod ? Es vedra ke mos serraron el uniko
sinema ke teniyamos "ORLY"...Mos esta mankando ! K'ermozo ke yoravamos en los filmos turkos, indianos i izraelianos a vezes...
Yoram gaon..ke lo bueno miyo ! Ke hombre, eh ? Un suenyo !
Esto es ser una estreya de sinema ! Komo la abraso a la akeya,
ehhhhh ? De selarse la persona por mi vida ! I akel punyo ?
Ke maraviya ! yo le dariya otr'un punyo a este p....... ! No es
ke estava ermoza la namorada...No, del todo ! Kero dizir, yo no
la topi ermoza ! Ma va demandale a el ! Brigıtte Bardot ! I se la
keriya komer el otro ! Ya meresyo el punyo i komo !
La luvyaaaaaaaaaa si si ! Lo mas difisil esta ke estas kalejas no
tienen nombres ! Solo numeros ! I yo no era de las mas fuertes
en matematika kuando me iva a la skola ! Numeros i yo, ni mos
saludavamos ! Agora kaleja 4 kaleja 5 kaleja 22 ! perdon...
Avenidas ! Ma yo les di nombres ke entiyendo ! La 5 es avenida
Yerushalayim...la 4 es Avenida Gordon.. La 3 es Avenida Shaul
Hameleh - la 6 es Avenida Ben Gurion - la 36 es Rehoviko Ben
Eliezer ! Ansina no se karishtereyan mas i son mas simpatikas,
mas konosidas ! Kon el de la lingua no esta muy muy negro
komo me imajinava ! Topas uno o una ke esta vistido komo en
Mea Shearim (un quartier de Judyos relijyozos en Yerushalayim)
i si esta de buena humor, te va arresponder en Hebreo ....Ma !
Sus Hebreo va entiendelo ! Angleado, aguado, sin savor,
charpeyado i ademas de los akeyos...Los Yiddish !

Ya me rompiya la kavesa kon muestra profesora de Tanah
en la eskola, i fina ke me ambezi, por fin, ke keriya de mi,
ya me desharon 3 anyos en la mizma klasa! ...Mijor de nada
kuando te responde el Rabbi o la Rubisa...A lo manko saves
ande ir, komo ir, ken topar i ke dizir !... Te ayudan komo
pueden negros d'eyos ! Bendicho el Di-o ke estan ayi i no
todos en Lod ! Imajinate si los teniyamos todos en muestras
kalejas .. ehhhhhh ? Unos tapados komo las tapadas
(un tipo de boreka) , otras aviertas fina la ..., flores en el
balkon ! De pishar de la riza ! No ! Ya estan buenikos ande
estan i el Di-o ke les de todo lo bueno. Eyoz mos estan aparejando
el Ganeden ! Te eskondes debasho del fostaniko i tienes el mijor
"passe partout" ke puede egzistir para aya ! Ya no te demandaran
nada a la entrada porke estas buen akompanyado ! Aze dikkat
(Fais attention) solo de no riyirte ! Esto no kale !
Ayyyyyyy ke luvya ke estava ! El pardessus...
Karinyooooooooos a todos
sharope zurzuvi en Istanbul

- Copyright © sefarad.org - 1997 - 2017

Retour au site sefarad.org -