Accueil - sefarad.org

Ayyyyyyyy ke kuentiziko !

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Ayyyyyyyy ke kuentiziko !
Reingrasyamos Marc Rozanes de Australia
ke me la embiyo el 27 Novembre 2013....
en Inglez por seguro...
 
Ehhhhh.... Es ansina ke me se fuyen del ojo
o no tengo tiempo de avrir mis mails !
A esta edad es lo ke me viene de la mano....
Yo me puedo sintir de 12 anyos dayinda !!!!
Los anyos tienen siempre razon ! Ma una koza
es sierto. Tengo konfiensya en mis 5 gramos
de meoyo.... Lolllllllllll... Si ? Puedeser no !
No... No... Alora... Deke en vezes me yerro ?
Ma todos se pueden yerrar, no ? Ouffffffffffff
Ke seya ! Tener razon o yerrarse no es
importante... Una vida de pasar es... I a mi edad
(estos i munchos !) no azere danyo a dingunos.
Me vo asentar en mis kantonikos para mi chikichiki,
vos vo kontar bavajadas fina enfasyarvos i mos
vana meldar solo los ke mos aman i esto basta !
No se kere toda manera de zurzuvi, poko i bueno
diziya mi mamita ! No se lo ke vozotros pensash
ma yo, por mi parte, kije fundar un kantoniko de
kerensya antes de todo porke komo los ke dan
sangre a los hospitales porke tienen muncho en sus
venas, yo devo ezbafar mi amistad, mi amor, todo
lo ke me aoga si no lo mostro !!! No es mi kulpa
si Di-o me regalo un korasoniko de plumas de
todas las kolores enamorado de EL, de los
humanos, de las bestias, de las plantas, de los
jugettes i de todo en lo ke veyo ermozura, buendad,
kompassion, sorizas. I sin olvidar ke kada linya
de karakter tiene mas aksento en edad avansada....
Ma... NO es de mi ke kije avlar esta demanyana del
18 Desembre 2015 dizyendovos BUENOS DIYAS,
BONJOUR, GOOD MORNING, GUNAYDIN,
BOKER TOV mis keridos...... Ya estan las 8 de la
demanyana en un diya yelado kon un sielo grizo,
ma bleu tambien kon un poko de nuvlas blankas por
aki, ande esta mi ventana..... Todos mis gatikos
estan durmyendo en sus kamikas i Bilge se fue antes
una hora a la eskola ! Oy mos vamos a ir a la tadre
para empleyar, a la banka, por aki i por aya i
merkarle un regalo para la fin del anyo... Kere ke
mos vayamos a TOYS ARE US ! Jugete a los
17 anyos ! Kuanto me asemeja mi ijika ! I....
dospues vamos a ir a komer en un lugariko al bodre
de mar ke las dos amamos muncho. Esto bolando
de alegriya !
Kon esta okazyon kero dizir
HAPPY CHRISTMAS
FELIZ NAVIDADES
UN JOYEUX NOEL
para todos muestros amigos Kristyanos....

Ke pasen fiestas maraviyozas kon sus keridos i
en mezas de allegriya....
 
Para los ke estan solos... Dingun mal ! Di-o esta
siempre kon mozotros.
 
Ademas aspero mi ijo, mi Papa Noel ke va yegar
de Londres a la tadre del 24 Decembre ! Una grande
fiesta para mi tambien ke konto selebrar kon pransos,
luzes, paketos, durante los 4 diyas ke va estar kon
mozotros.... A la buena hora.
 
I todo esto para kontarvos el kuentiziko muy savrozo :
 
 
 
LA LOJIKA JUDIYA
 
La buena esuegra judiya viene a kaza de su ijia
i topa su yerno furyozo i arrekojyendo i inchendo
sus kozasen en maletas. Demanda entera
alarmada kualo afito.
 
Jakob :
 
- Ke afito ? Te vo dizir lo ke afito !!!!
Le mandi un email a mi mujer dizyendole ke
iva yegar de mi viaje oy. Vine a kaza i endevina
lo ke topi... Mi mujer, si mi Ruth, tu ija, kon
un hombre desmudo en muestra kama ! Esto
es la fin de muestro kazamiento. Me vo !
- Kalmate, le dize la esuegra, deve de aver una
koza en esta historya de lokos ! Mi Ruth nunka
azeriya una koza asemejante ! Aspera un
momento !  Vo verifiyar lo ke afito.
 
Unos segundos mas tadre la esuegra entra kon
una grande soriza i dize :
 
- Ya saviya ke deviya de aver una simple
eksplikasyon.... Ruth nunka arresivyo tu mail ! 
 
Ke nunka vos manken las sorizas..... 
Sharope blanco

- Copyright © sefarad.org - 1997 - 2017

Retour au site sefarad.org -